O la’u tala fo’i

166 Hits

1. Matauina i Tala Fou ananafi se mea uiga ese ua tupu i totonu o Samoa, ma o lea mea uiga ese-o le tofia lea o ni sui faipule o le HRPP i le Fono a Sui Tofia. O le tulaga uiga ese la o lenei tala fou-e le o le taimi muamua lenei ua fai ai e le faiga-malo a le HRPP lea mea. Ua outou silafia Samoa i latou na tofia muamua e le HRPP i le Fono a Sui Tofia. 

O le a la le mea na o’o i ai? E leai lava se isi na ola-na vave ona feoti! Aisea? Leaga o le mea tonu lava lena e igoa o le soli faavae! Ia silasila la i le mea ua tupu nei-o lea ua tofi e le HRPP ni sui faipule i le Fono a Sui Tofi-ae o lale ua uma ona tofi i ai le Tama-a-Aiga o Tuimalealiifano! 

O le mea lea ua fai nei e le faiga-malo a le HRPP-sa sili ai ona fai i le Tamaaiga e faamavae-ona faatoa fai ai lea o a latou polokiki eleelea. Ua outou silasila la Samoa i le mata’utia o mea o faiga-malo a vaega faa-upufai? O le mea tonu lava lea e igoa o le “to o le mama” mai le fofoga o le Tamaaiga-tulou! Ua o’o i mea e gata i Tama ma o latou Aiga o fiapule  i ai le HRPP! Ia-afai la ua faasoa e le HRPP mea e gata i Aiga Tau Tupu o Samoa. 

O  le fesili la i le Palemia ma lana HRPP-o le a le pogai na fai ai le Fono a Sui Tofia ina ua uma ona ioe Samoa e “Ao Soofaatasi Malietoa ma Tupua Tamasese”-“Palemia Fiame Faumuina Mulinu’ū II?”

E manaia pe a outou o e faitau lelei i taualumaga uma o le Fono Faavae mai le 1959-1960-ona outou iloa lelei ai lea-e le’i faia le “Fono a Sui Tofia” mo se isi lava tagata se’ia vagana ai Tuimalealiifano! Aisea? Leaga o Tuimalealii lava na tulei saunoa e fai ma sui o Aiga ina ua fesiligia e le Palemene se finagalo o aiga –“pe o ai e avea ma Ao o le Malo? O le tuleiga a Tuimalealiifano fai mai-“Samoa –tou te le masalomia Aiga-ae o lo’u manatu e faapea-“Avane Malietoa ma Tupua e avea ma Ao Soofaatasi-avane Fiame Mulinu’ū e Palemia-ae o a’u –ua lava a’u i le Tofi o le Faufautua…! Ua outou silasila la-e le’i faia se Fono a Sui Tofia mo se isi lava-na fai faapitoa lava mo Tama –a-Aiga a Samoa! Ae afai lava ua o’o foi i ai le fia pule aoao o le Palemia- e na o toe faamanatu atu-“Ua uma ona fai muamua i le taimi o Tofilau Eti Alesana! O le a le mea na o’o i ai? Na ifo uma lava i le eleele-ona taatia ai lava lea-ae o lea foi ua toe lalaga mai! O le tu’u-a-lalo la-ona pau lena o le ala e vave ai ona oti! O le a sou taofi? 

 

2. Matauina foi se fautuaga mai le Minisita Lagolago o le Siosiomaga o Faumuina Tiatia Liuga ina ia talia e Samoa ni tagata sulufai mai atumotu laiti e latalata mai i Samoa e pei o Tokelau ma Niue! Manaia foi le finagalo o le Minisita aua e le taumate lava e i ai lava so tatou sootaga tau toto ma ia tagata. O ia lava tagata ua fia o ese ona ua afaina tele o latou motu i le maualuga o le suasami ma isi lava faafitauli! 

E manaia la le finagalo o le Sui Minisita-ae ia manatua-afai foi e o mai ia tagata-latou te moomia ni fanua ma le fale e nonofo ai! Ia afai la ua taulamua le Faipule o le Itumalo o Palauli Le Falefa i lea tulaga-e tatau foi la ona tele sana fesoasoani e tausi ai ma faamautu ai nofoaga mo ia tagata. Ae ,manaia foi le itumalo o le faipule aua e tele eleele o loo avanoa e nonofo ma fai ai ni faatoaga a ia tagata! O le a sou taofi? 

 

3. Matauina foi i Tala Fou se faaletonu o loo feagai ma le Matagaluega o le Soifua Maloloina. O lea la faaletonu-fai mai le Faipule o Vaisigano Nu.1 o Tufuga Gafoaleata-o le leai lea o ni foma’i faapitoa! Ia afai e moni lea mau-o lona uiga-e le o faatauaina e le faiga-malo le soifua maloloina o le atunuu! Atonu e tau feoloolo pe a faaletonu auaunaga a isi matagaluega-ae a pa’ia loa le Soifua Maloloina ma le Falema’i Tele i Motootua-o iina e faamaonia ai-e le o faatauaina e le Malo le soifua maloloina o le atunuu! Ia atonu  e mafua ona e le maua ai ni palota-ae faataua isi auaunaga-e maua ai palota!Maumau la pe ana faapea a gasegase le atunuu ona ave leaiI fafo e pei o taitai o le malo-ae o le faalavelave-tatou te le avanoa i lena tulaga ona e le o i tatou o ni ta’ita’i o le Malo. A tatou tilotilo la i nei mea uma-e tasi lava le faiga e mafai ai e le atunuu ona una’ia ai le faaleleia o lea auaunaga-o le palota lea i le mea e manuia ai ae le o le vaai atu lava o le mala le mea-ae palota lava i ai! O le a la sou taofi? 

 

4. Matauina foi i Tala Fou se misionare ua tuuina atu i le falepuipui ona o le gaoi taavale ma isi lava solitulafono. E le o iloa la pe o se misionare o le fea ekalesia-ae peiseai ua aliali mai-o se misionare lava mo le matagaluega o falepuipui. 

E ui foi ina o loo faaalia ai ma se tamaitai Samoa, ae peitai e le o se misionare-aua o lea ua toe faaopoopo aso e nofo ai le falepuipui. 

Ia o le soifuaga nei e moni lava e pule le tagata ia e pei ona manatu ai isi-ae o le faalavelave-a soli loa le tulafono-ona le toe pule loa lea a ua pule ai le tulafono! O le a sou taofi? 

© Samoa Observer 2016

Developed by Samoa Observer in Apia