Fa’amuamua le aiga

By Vatapuia Maiava 29 October 2016, 12:00AM

Na filifili le ali’i talavou i a Toga Maulolo o Malie  e tu’ua le aoga ina ua Vasega 10 ae nofo e fesoasoni i le tausiga o lona aiga.

O lea filifiliga na ia ta’ua ‘e le’o se loto o si o’u tinā, po ua ou le mafaia le aoga ae ua ausage si o’u aiga, ua toe o si o’u tinā , o si o’u uncle matua ma nai o’u tei laiti le aiga.

“O si o’u aiga e lima vaivai i a a’u lava ia e sili lou nofo e fesoasoani aua ua leai nisi.

“Ia na ou nofo  loa  tōtō loa fa’i ma talo o la’u ma’umaga  aua lo’u aiga.

O lona lea fiafiaga i le taimi lenei ua 21 ai lona matua e ola e ‘au’auna ma tausi fa’amaoni i lona aiga.

“Ia e pei ona ou fai atu e ave la’u fa’amuamua i lo’u aiga, sa tele lava na fa’apea mai pe aisea, ae na ou tali fiafia lava i ai , ou te alofa i si o’u aiga.

“E tiga lava fo’i ona mana’o si o’u tinā i a te a’u ou te alu pea i le aoga aepeita’i ua ou filifili lava ou te sau e fai le ma’umaga.

“Ia lea la ua alu ai lava i le taimi lenei.

O lona talitonuga, ‘e ese’ese lava taleni na aumai e le Atua i le tagata.

“Ia o lo’u iloa e le gata o la’u taleni lea ua aumai e tausi lelei ai lo’u aiga, o a’u e tausi aiga ae o lea ou te iloa fo’i e fa’amanuia mai ai fo’i le Atua.

“E talu mai lava ona fai le ma’umaga o le aiga, ia ua matua’i fesoasoani tele i si o’u aiga i le tele o mea mana’omia o lo’o tausi ai le ola nei.

“O le fa’anaunauta’iga i a te a’u, ia fa’aauau ai pea lea itu ua ou filifili ai.

“Ia o le tele lava o talo ma fa’i ia e tau le fa’atauina ae o lo’o aumai mo mea’ai ia o lo’o sologa lelei lava le tele o vaega i aso uma lava o lo’o i ai.

“O le a ou fa’amalosi pea e tausi si o’u aiga.

O le a sau polokalame i taeao uma?

“Ia ou te usu mai lava e le’i taina le ono , e tulituli mai ai ia aua nei maua le la, ia a vevela loa le la, ia ona malolo loa lea.

“Ia o aso ua alu, o aso ua malolo, aua o le lelei lava lea o le nofo ai le ma’umaga a fa’alogo atu lava ua lelava ia fai sina koma.

“Ia o a’u ou te le inupia pe ou te ulaula fo’i .....ou te iloa e le fiafia lo’u tinā pe a ou fa’atinoina ia vaega.

“Ae  o le taimi lenei ua lelei lava si o’u aiga.

“O le itu pito sili ona lelei, o lo’o fiafia ma manuia si o’u tinā.

By Vatapuia Maiava 29 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>