E sili lava Samoa

Tusia Sarafina Sanerivi ma Vatapuia Maiava ,

143 Hits

Maryanne Petelo mai le afioaga o Nu’u-Fou.

Maryanne Petelo mai le afioaga o Nu’u-Fou.

O le finagalo o le tina ia Maryanne Petelo, e leai lava se isi nofoaga e sili atu i lo Samoa. 

Na ia fa’aalia mai i le Fofoga o Samoa, o lo’o sologa lelei lava le olaga i Samoa ma o le ala lea o lona fiafia ai lava e nofo ma aumau ai i Samoa. 

O le tina ia Maryanne, e 44 ona tausaga mai le afioaga o Nu’u-Fou.

“E lelei lava le tulaga o iai le olaga i Samoa. Ta’ilo lava i nisi aiga, ae o le matou ia aiga, o lo’o sologa lelei lava mea uma.”

Na ia ta’ua o le tulaga e lelei ai le olaga i Samoa, ona o lo’o ola sa’oloto lava tagata i o latou fanua ma ele’ele.

“O le tulaga lava o lo’o lelei ai le olaga o Samoa, o lo’o taugofie le tau o oloa aemaise foi o lo’o fa’alagolago lava le tele o aiga i fa’atoaga mo le tausiaina o aiga. 

“E faigofie lava mea uma iinei i Samoa. A leai lava se tupe o lo’o maua lava i fanua ma le sami mea e tausi ai aiga ma fai ai meaai.”

A’o iai foi la le lalolagi atoa ile vaitau o asofiafia, na ta’ua ai e Maryanne, e sili lava le fiafia i Samoa ma fa’amanatu fa’atasi aso fiafia ma aiga.

“E manaia lava le fa’amanatuina o aso fiafia iinei i Samoa nai lo’o se isi lava atunu’u. E leai lava ni vevesi ma ni mea e popole ai. 

“E fiafia lava tagata uma ma e maua lava le agaga o le fiafia pe a fa’atasi nei ma aiga.”

E le gata i lea, na ia ta’ua o le auala lava e fo’ia ai ni fa’afitauli i totonu o aiga, o le tulivae lea i le Atua e ala ile tatalo.

“O si o matou aiga, o lo’o sologa lelei pea lava mea uma.

“O le tatalo lava i le Atua ma fesoasoani mai i le tausiga o aiga. E foa’i mai lava e le Atua meaai e tausi ai aiga i lea aso ma lea aso. 

“A fa’amoemoe lava i le Atua e faigofie lava mea uma ma manuia aiga ma fanau.”

Ae le gata i lea, na ta’ua e Maryanne, o le fa’ato’aga lava o lo’o fa’amoemoe iai le manuia ma le tausiaina o si o latou aiga. 

“E iai le fa’ato’aga talo, fa’i aemaise foi o fuala’au aina. 

“O nai mea na o lo’o fa’amoemoe iai le tausiga o si o matou aiga. Ae ia te a’u lava ia, o lo’o lelei atoatoa mea uma i Samoa e leai foi se mea e popole ai.”

© Samoa Observer 2016

Developed by Samoa Observer in Apia