FAAFETAI! FAAFETAI! FAAFETAI!

Tusia Rev Opapo Soanai Oeti ,

1026 Hits

Rev Opapo Soanai Oeti

Rev Opapo Soanai Oeti

Oute muai taia le tutafa’itoa ma ou tapui le tapu a Tupo e pei o le upu i le taotolima a Galumalemana aua e faigata Samoa o le Ao mamala i le faasouga o ao ma le atu folasa. Tulou Tulou Tulouna lava. 

O lea le oo lou leo i le vao filifili o Samoa o le ia e iviivia, nei fai ma lape o se faamatalaga a le auauna faatauvaa, ae tau ia o se avanoa e faaleo ai se faafetai mo e sa tapuai tatalo ma agalelei mo matou.  

E ao lava ona mua pea mea i Matautusa ma molimoli lapalapa o malo aua se taulaga faafetai i lo tatou Keriso Toetu ona o lona amanaia o Samoa e tusa o lenei faamanatu mo lo tatou faaolaina. 

Faafetai i le tapuaiga tatalo a le Afioga i le Ao o le Malo Samoa ma lana masiofo, Afioga i Fono a Sui Tofia ma Masiofo, Afioga i le Alii Palemia, le Fofoga Fetalai, le mamalu i le Kapeneta ma sui mamalu o le Palemene o Samoa, tainane le Faamasino Sili ma le paia i le Ofisa o Faamasinoga. Faafetai i le tapuaiga tatalo a Taitai o le nofo a Ekalesia Kerisiano uma i Samoa. Faafetai mo talosaga a le paia o Samoa aoao ona o le feau na tuua ai le atunuu. 

Faafetai faapitoa mo le Afioga i le Akiepikopo ia Lui Matailiga ma le au Ositaulaga ma le Ekalesia Katoliko i Samoa ona o le faamalosiau, o le agalelei ma talosaga, aemaise foi o nai Patele ma Tauposa na fesoasoani i le Konesula ia Papalii John ma Margi sa fai mo matou aiga i Roma, aemaise o le galulue faatasi mo le tuuina atu o lenei mataupu i totonu o le Vatikano.  

Faafetai i le Taitaifono o le EFKS, Toeaina ia Tautiaga Senara ona o talosaga ma le avanoa na faatagaina mai mo le Malaga atu i Roma ona o lenei mataupu, ae le galo foi i le loto le faafetai i tatalo a Tama o Ekalesia aemaise o le tapuaiga a le EFKS e pei ona auauna ma galulue ai. 

Faafetai mo o ma aiga i le lagolago mai, ae faapitoa le faafetai i la matou aulotu i Siufaga i Falelatai ona o lo outou faatuatua, aemaise ua faamativaina outou i le tau sailia o ni fesoasoani mo la matou Malaga i Roma e tusa o le faaaliga na faailoa mai e le Alii e ala i la tatou Ekalesia i le Aso Maliu. 

Faafetai faapitoa mai le taele o le agaga i le Afioga i le Alii Palemia ia Tuilaepa Dr Sailele Malielegaoi ma lou faletua ma le nofoaalo ona o le agalelei ma le alofa foai ma le lagolagoina o lenei misiona ua faamaumau ai lo oulua tamaoaiga i o matou tagata faatauvaa. Faafetai foi mo e uma na agalelei e pei ona faamaopoopo ma faaoo atu i Roma ia foai loto malie e fesoasoani mo matou i atunuu ese. O lo’u satauto lea ua amoina nei ona e le mafia e lo matou mativa ma le toalua ma le fanau ona toe totogi lo outou afu maligi ua matou faaaogaina ona o lenei feau. 

O Iesu Keriso lava na fetalai mai “Aua na outou faia i se tasi o e aupito itiiti o ou uso nei, o au lava le ua outou faia iai”. Ou te tatalo i le Alii e ou le manuia ina ia faatumu ma faatele atu e le Alii lona tamaoaiga ua toesea ona o le feau a le Alii. 

Faamagalo mai matou pe a fai ua afaina se finagalo o se tasi i le ala ua saunia e le Alii e aumai ai lenei feau, ae ia avea le pepe o le Kirisimasi e fanaufouina ai lo tatou faatuatua i le Talalelei a le Alii.  

Ia maua e Samoa uma se faamanuiaga faale agaga mo lenei Kirisimasi ao se Tausaga Fou e tumu i faamanuiaga mai le Atua ua faavae ai lo tatou Malo. 

  

Soifua: Rev Opapo Soanai Oeti

© Samoa Observer 2016

Developed by Samoa Observer in Apia