E faigata le lē mafuta fa’atasi o aiga

Tusia Sarafina Sanerivi ma Vatapuia Maiava ,

124 Hits

Mavaega Tauese e 55 tausaga mai le afioaga o Faleula-Uta.

Mavaega Tauese e 55 tausaga mai le afioaga o Faleula-Uta.

A’o feagai ai le atunu’u ma le lalolagi ma le fa’amanatuina o le fanau mai o le fa’aola aemaise o le agai atu i le tausaga fou, e tasi lava le mea e tulimata’i e le to’atele, o le fiafia fa’atasi lea ma aiga ma fanau.

E pei o le vaitau tonu lava lenei e mafuta ai aiga ma fiafia fa’atasi. 

Peita’i ua lē fa’apena le tulaga o iai le aiga o le tina ia Mavaega Tauese e 55 tausaga mai le afioaga o Faleula-Uta.

O Mavaega o lo’o alala nei ma nai ona alo i lo latou fale i Faleula-Uta. 

Ua toe nei na’o ia o lo’o ua va’aia ma tausia le aiga, ona ua fā-i-lagi le folauga a le tama o le aiga.

Na ta’ua e le tina ia Mavaega, e fai lava si faigata o le olaga o lo’o latou ola ai nei, talu lava ona maliu le tama o le aiga.

 “Ia o le vaitaimi lenei, i le olaga lea ua iai si o matou aiga, ua tu’ua nei na’o a’u ma le fanau. 

Ua maliu le tamā o le aiga. 

“O le faigata lena o le olaga ua iai i le taimi nei. Ia o a’u e to’avalu la’u fanau, ae toe to’afa lea matou te nonofo ai i lenei taimi. 

“O se avega mamafa lea e ia te a’u, ona toe o a’u ma si a’u fanau.”

E le gata i lea, na ta’ua e Mavaega, o le isi avega mamafa o lo’o feagai ai nei ma ia o le lē fa’atasi ai lea ma se tasi o ona alo.

“O le isi mafua’aga, ua atoa nei le tausaga matou te le’i mafuta ma se tasi o le fanau. 

“O lo’o i le to’ese i Tafa’igata, ma o le ala lea ua matou le mafuta ai i lenei vaitau o aso fiafia. 

“O se avega mamafa lena ia a’u le tina. Na’o nap au lava na o nai fa’afitauli o lo’o iai nei.

“O le tausaga lea ua te’a nei, sa potopoto uma mai si a’u fanau i vaitaimi o aso fiafia. Ae pei o le tausaga nei, ua le atoa mai si a’u fanau aemaise o le matou aiga. E pei o le avega lea o lo’o feagai ma a’u i lenei foi vaitau o aso fiafia. 

“E pei o le tele lava o aiga, o le taimi lava lenei e mafuta uma ai aiga ma fa’amanatu fa’atasi aso fiafia. Ae pei o si o matou aiga, ua le tutusa lava.”

Na ta’ua e Mavaega, o le fa’ato’aga lava o lo’o fesoasoani i le tausiga o lona aiga.

“Pau lava mea o lo’o maua ai nai seleni o le matou aiga, o le fa’atauina lea o fa’i ma tipolo e maua mai ai nai seleni e fesoasoani i le tausiaina o le fanau aemaise o le aiga.

“Sa iai foi talo, ae o le taimi nei e pei lava o le fa’i lava lea e fesoasoani tele i le tausiga o le aiga.”

© Samoa Observer 2016

Developed by Samoa Observer in Apia