Ato i fafo e le Malo faiga-taufa’asese

29 December 2015, 12:00AM

PaiMulitalo Ale

Fa’aliliu e Maiava

 Ua lapata’ia e le Faletupe Tutotonu o Samoa (CBS), e matua le-taliaina lava e le malo “su’ega-tupe e fa’aaoga ai ‘auala tau-fa’asese” ma tagata mai fafo e o-mai e “fa’avalea tagata Samoa le-malamalama” e fa’aaogaina ai “’auala-su’etupe fa’asolitulafono.” 

O le lapata’iga mai le Kovana, Maiava Atalina ‘Ainu’u-Enari, e afua mai, ina ua māua e le Faletupe ma fa’amanuiaina ana taumafaiga na molia ai nisi se to’alua na tu’ua’ia i le faia o se faiga sa’ili-tupe i ‘auala tau-fa’asese i Samoa nei.    

O latou sa molia – lea na taofia e le Fa’amasinoga Maualuga le fa’alauiloaina o latou igoa i le taimi o fa’agasolo taualumaga a le fa’amasinoga – sa fa’amaonia i le vaiaso talu ai o latou moliaga i le faia lea o se pisinisi fa’asu’e-tupe i ‘auala tau-fa’asese ae maise le faia, fa’aaogaina ma le fa’aseseina o fa’amaumauga tau-tupe. 

O le i’uga lea na tu’uina mai e le Afioga a le Fa’amasino Sili, Patu Tiava’asu’e Falefatu Sapolu i le Aso Tofi talu ai. O le a tu’uina mai i se taimi vave mo itu uma o le fa’amasinoga, mafuaga o lea fa’ai’uga ma ua fuafuaina fo’i le lauina o fa’asalaga o e ua molia i le Aso 02 o Fepuari, 2016.

I le taimi nei, e toe fa’ailoa atu e le Faletupe Tutotonu, o le a tu-malosi le malo e puipui ona tagata-nu’u mai a’afiaga o nei faiga fa’asolitulafono.

I se fa’asilasilaga na tu’uina atu e le Faletupe ina ua mae’a ona lauina o le i’uga o le fa’amasinoga, na ta’ua ai e le Kovana o le Faletupe, sa galulue so’o-so’o-tau’au lava ma le Ofisa o le Loia Sili fa’apea le Matagaluega o Leoleo, mo le puipuia o tagata-nu’u Samoa mai le a’afia ai i nei faiga tau-fa’avalea.

Na ta’ua e Maiava, o soligatulafono nei e “tutupu fa’ava-o-malo”, o lona uiga, sa fafauina e tagata mai fafo ona taumafai lea e fa’avalea ai tagata le-magafagafa mai isi atunu’u.

“O se fa’afitauli tuga ua avea o se finauga ma atunu’u o le lalolagi,” o lana fa’aaliga lea. “O le a matou galulue fa’atasi ma pulega mai fafo fa’apea pa’aga uma mo se fesoasoani mo le puipuia o Samoa e ala i le fa’amutaina o su’ega-tupe e faia i ‘auala tau-fa’asese.”

Na ta’ua fo’i, e ao i tagata-nu’u Samoa ona fa’atino le mea aupito talafeagai ma ia mata-ala.

“O le fa’aaoga lelei lava o le mafaufau ma fuafua lelei,” o lana tima’i lea. “A ofo atu e se tagata se fa’amanuiaga e faigata ona talitonuina, o lena lava, ‘aua le talitonu iai!

 “Pe o se teuga-tupe, o le fa’atauina o ni oloa po’o se ‘au’aunaga po’o se foa’i tau-tupe tele, ia manatua lelei, ia fai lelei iai sau sa’iliga au’ili’ili a’o le’i tu’uina atu o se tupe tele.

 

“Manatua, e ono ta’aina ‘Oe e nisi o lou lava aiga po’o uo fo’i i ‘auala tau-fa’avalea nei e aunoa ma lou silafia, o se faiga tau-fa’asese.” 

Fa’ailoilo masani o faiga tau-fa’avalea:

• O le ofoina atu o se avanoa e ‘auai ai i se vaega, se fuafuaga, po’o se polokalame fo’i e mo’omia ai le avea o ‘Oe ma se sui fou ae maua ai tupe.

• E matua tetele tupe totogi mulimuli ane.

• E fai e le tagata o lo’o una’ia lea faiga, se tala fa’apea “e le o se faiga tau-fa’avalea lea” po’o le “ua aloa’ia fa’aleTulafono lenei fuafuaga.

• E matua fa’atopetope mai lava ma taumafai e fa’avevesi lou mafaufau, o se fa’ata’ita’iga, “e tatau ona e ioeina i le taimi nei lava.”

• E fai atu se fa’aaliga, e mautinoa lou maua o se fa’amanuiaga tele.

29 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>