Fa’alavelave matuiā a ua uma le Kerisimasi

29 December 2015, 12:00AM

Ripotia e PaiMulitalo Ale

Fa’aliliu e Maiava

E to’alua na maliliu i le Aso To’ona’i ua mae’a le Kerisimasi – ae ono to’atolu – ina ua tupu se fa’aletonu i se ta’elega sa faia i Mulinu’u.

O i latou ua maliliu e aofia ai se tamaititi e fitu-tausaga ma lona tina na malelemo. O le isi, o se ali’i e fa’apea na maliu ai fo’i i lea lava nofoaga. 

E ono o’o lenei fa’alavelave i se tulaga matuiā pe ana le-seanoa le toa ma taumafaiga lelei a se tasi o Ali’i Leoleo, o Alesana Ieremia, lea na ia lavea’ia se tasi o tamaititi.

O ananafi na fa’ailoa mai ai i le Samoa Observer, e le tamā o le tamaititi ua maliu,  le susuga a Paul Amerika e fa’apea, e le talitonu lava i le mea na tupu.

Ui e le’i maua se feso’ota’iga ma le Matagaluega o Leoleo ananafi, ae na ta’ua e Amerika, o le ali’i leoleo o lo’o i le falema’i, na ia sefea le ola o le isi tamaititi.

“Na ‘ou alu ananafi e va’ai le ali’i lena i le falema’i ma ‘ave iai la’u fa’afetai ona o lana galuega lelei sa fai ua fa’asaoina ai le ola o se tasi tagata,” o le fa’aaliga lea a Amerkia.

Na ta’ua e le tama lea, o le Leoleo o Ieremia sa tiute-fealua’i ae tau atu ai i le fa’alavelave lea. Na nofo vili le Vaega mo Fa’alavelave Fa’afuase’i peita’i na tuai ane ma le fa’atali ai loa se’ia taunu’u mai, ae fa’asasa’o loa ia e fai le galuega fesoasoani.

I le Ofisa o Leoleo ananafi, na fa’afetaia ai e isi leoleo le lotoa o le Ali’i Leoleo o Ieremia ae maise lana galuega lavea’i sa fai.

Na fa’aalia e Amerika, e to’alua lana fanau-tama latou te nonofo fa’atasi i Vaitele. Peita’i, na mana’o atu lo la tina ia latou tafafao i le Aso Faraile. Ona alu lea momoli iai, ma o le taimi mulimuli fo’i lea na va’ai-tino ai i lana fanau.

 “Fa’atoa ‘ou iloa lava le mea ua tupu i le taeao o le Aso Sa, ina ua ‘ou alu e asi ‘ou matua i Nofoali’i,” o le taumafai mai lea a Amerika ma loimata.

“O le mea ‘ou te fa’anoanoa tele ai, ona e iloa lelei e le aiga o lo’u to’alua-maumua le mea ‘ou te nofo ai ae maise fo’i la’u telefoni, ae matua leai ma se popole e fa’ailoa mai le mea ua tupu.” 

Na ta’ua e Amerika, e matua faigata tele ona ia fa’agalo lenei mea ua tupu.

29 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>