Fa’aliliu e Maiava

Na fa’amanatu fiafia le Aso Kerisimasi e se tasi o aiga aupito to’atele i le afio’aga o Vailele, i le fa’atinoina o le latou ulua’i fa’atasiga fa’aleAiga. 

I tausaga ta’itasi, e potopoto ai suli ma feoi ma tama-fanau uma a le Aiga Sa-Faoasau e fa’amanatu fa’atasi le Kerisimasi i o latou ‘ele’ele ma fanua.

Peita’i, o le ulua’i taimi lenei talu ona fa’avae o lenei fa’atasiga fa’aleTausaga i le 20 tausaga talu ai, na ‘autasi ai toe-ulutaia o le Aiga, ina ia fa’atasi uma ai sui o le aiga mai so’o se itu o le lalolagi e fa’amanatu fa’atasi le Kerisimasi i o latou ‘ele’ele ma fanua i Vailele. 

E tolu aso o lea fa’amoemoega lea sa taualuga i faiga-saofa’i i le aso ananafi, Aso Gafua 28 o Tesema i le Malae o Niniva.

O tulaga masani lava fa’aleAganu’u na amata ai i le ulua’i aso na lagiina ai se pese na tusia fa’apitoa mo le fa’amoemoe o le Aiga a’o le aso lona lua, sa amata lava i ta’aloga e le gata mo fanau laiti ma tupulaga o le aiga, ae fa’apea fo’i le ‘Au-matutua.

O le Aso Sa, sa lolotu fa’atasi le mafutaga i tapua’iga masani i le taeao, i le malumalu o le Ekalesia Fa’apotopotoga Kerisiano Samoa i Vailele lav.

O le Aiga Sa Faoasau, sa latou foa’i atu lea ‘ele’ele e fausia ai lea malumalu, ma o se fa’ailoga o le tautua-ekalesia ma le fa’atuatuaga i le Atua ma Lana Galuega i le lalolagi nei. 

Na ta’ua e Faoasau ‘Aunese – le fofoga o le Aiga Sa Faoasau e fa’apea, e talitonu tua’a ma matua o le Aiga, ua o’o i le taimi ua tatau ai ma onomea le potopoto fa’atasi i le agaga fa’aleAiga, e toe tepa ai i tua, e le gata e manatua ai tua’a ua tofafa ua fai i lagi le folauga, ae o se fiafiaga fo’i e fa’amalosia ai so’otaga va-va-lalata o le aiga atoa, ae maise fo’i o le una’ia o sui uma e fa’amalolosi i so’o se fe’au o lo’o tautua ai i le ola nei.

E to’atele tama fanau a le Aiga sa avea ma o lo’o fai pea ma ta’ita’i e le gata i pisinisi ma falefaigaluega, a’o le nu’u ma so’o se fa’alapotopotoga fa’apea le itu tau-ta’aloga. E to’atele fo’i tama-fanau a le aiga o lo’o avea ma lupe-fa’alele au le Talalelei a Iesu i le lalolagi nei i ekalesia o lo’o avea ai ma ta’ita’i.

O le to’atele o sui o lea Aiga, e malaga mai atunu’u mamao ma o le a ‘auai i vaitaimi o aso fiafia i Samoa nei, e toe “fa’amanatu ma so’o-so’o tala fa’aAiga” a’o soifua pea le to’atele i Samoa ma le fiafia.

O nisi nei o ata o lea fa’atasiga fiafia a Sa-Faoasau i Vailele.