O la’u tala fo’i

143 Hits

1. Matauina i Tala Fou le finagalo o le Minisita o Tamaitai, Atiina A’e o Nuu ma Aga Fesootai-ina ia faatoese le Komesina o Leoleo o Fuiavailili Egon Keil e tusa ai ma lana faaupuga fai mai e tutusa lava le aganuu a Samoa ma le faiga faa-fitafita poo le Faa-Militeli; ma o le faaiuga a le matai e leai se tasi na te fesiligia!

Ia atonu e moni le Minisita i se tasi itu- toe moni foi Fuiavailili -ae tatau foi ona silafia e le Minisita-ailoga na lava se taimi na soifua ai le Komesina o Leoleo i le soifuaga faa-Samoa?

Afai la o le tali e leai-ia e tatau foi ona tatou faapalepale-e fou le Komesina o Leoleo i ona tiute ma e lei leva foi ona suafa matai!  Afai la o le tulaga lea-o le Minisita foi ia o le Tamā o le Atunuu; ma afai foi ua lape le Komesina-ia atonu e le toe sese pe a lava lona silafia i le aganuu a Samoa! Ae ui o lea- ailoga o se lape o le Komesina? O le a sou taofi?

2. Matauina foi i Tala Fou se tasi o faalavelave tau taavale lea na tofu ai se taavale la’upasese i totonu o se utu i Vaitele! E ui lava la ina foliga mai e mafua ona ua pasia e le isi taavale-ae o le upu moni- ana faaeteete lava ia-e leai se faalavelave e tupu!

E pei lava ona faailoa so’o atu- e mafua nei mea uma- ona ua toatele avetaavale i totonu o le atunuu-ae tasi lona-ailoga na su’e nei avetaavale i ni su’ega e pei ona sa faia muamua e le Ofisa o Leoleo-ma pasi ai-ona faatoa ave lea i ai o se laisene!

Afai la o le toatele o nei avetaavale e le’i faia ni a latou su’ega tau avetaavale-o lona uiga-e le mafai lava ona ‘asa faalavelave faapenei i totonu o Samoa! A o’o i le po e te le mafai ona pupula i le malosi o moli o isi taavale, ae o le mea e sili ona leaga, e le iloa e ia avetaavale ona tu’u i lalo moli o a latou taavale-ma e na o faalavelave e tutupu mai ai.

A sau foi le isi taavale e tipi lata taavale- e te te’i lava ua oso ane i ou luma- ae le matua alu i luma ona faatoa oso ane ai lea i le vaega o le auala o e alu atu ai. A o’o foi i le fetaulaiga o ala-e te fiu e faatali-ae faatoa ‘emo lava le sign ina ua o’o mai ia te oe.

O lona uiga la o nei mea uma-e matua tele ma anoano galuega a le LTA  e tatau ona toe fai-e matua aoaoina lelei ai nei avetaavale- ona faatoa mafai lea ona faataga e feoa’i i luga o ala tetele! O le a sou taofi? 

3. Matauina i se malaga i Savaii ananafi le matagofie o le auaunga a le Faalapotopotoga o Vaa a Samoa i le va o Upolu ma Savaii! Ae tusa ai ma le vaai tino i ai- o se tasi o faafitauli o loo vaaia pea-o le tau-tulei lea o le pasese i le taimi o le a alu ese ai se malaga!

E le o mautinoa la le pogai tonu o lea tulaga-ae o le upu moni e tatau lava ona i ai se faiga e mafai ai ona fo’ia ai.

O le matau foi i lea aso- e peiseai e muamua ave taavale i luga o le vaa-ae mulimuli le pasese! O le mea ua tupu mai-ua faigata ona o le pasese i totonu ona ua tumu taavale! Faamata e le sili ona faamuamua tagata i totonu ae mulimuli taavale -ona alu ese loa lea o le malaga?  O le a sou taofi?

4. Matauina foi le matagofie o le tautua a taavale la’upasese (taxis) i Savaii pe a faatusatusa i Upolu nei. O le eseesega-e le soona saoasaoa taavale a Savaii.

E faaaloalo foi avetaavale. O totogi foi o a latou taavale-o loo talafeagai lelei lava e tusa ai ma le latou auaunaga. E loto fesoasoani i tagata o le atunuu tusa lava pe latou te masani pe leai!

Afai la o avetaavale -o i latou ia e muamua lava ona feiloa’i ma tagata tafafao mai fafo-e tatau foi la ona faaleleia atili le latou auaunaga, amio lelei ma lau fofoga fiafia ma loto fesoasoani e pei o avetaavale la’upasese a Savaii! O le a sou taofi?  

© Samoa Observer 2016

Developed by Samoa Observer in Apia