Tele Suiga o Samoa

Tusia Ulimasao Fata ,

86 Hits

Simeona Lafai mai le afioaga o Faleula.

Simeona Lafai mai le afioaga o Faleula.

Ua fa’atuputupu laia le tele o suiga o Samoa, ma ua aafia ai le mamalu lautele o le atunu’u.

Na feiloa’i atu le Fofoga o Samoa i le Tama ia Simeona Lafai mai le afioaga o Faleula ao fa’agasolo malologa mai galuega o le taeao.

Na fa’asoa mai le Tama ia Simeona Lafai e ala i suiga ua faapena ona i ai i le tatou atunuu.

“Ua matua tele lava suiga ua iai nei i totonu o Samoa, i le vaai atu foi ma fa’alogologo atu i Tala fou ua le asa lava ma se fa’afitauli ae o nisi o nei fa’afitauli e le masani ai si tatou atunuu.”

“O le tupulaga talavou ia i lenei vaitau ua matua ova lava le amio le pulea ae ua matua fa’atuputupu laia ai lava le maualuga o le numera o tagata falepuipui i Samoa.”

“E le gata i le mau fa’afitauli ua lolofi mai i le tatou atunu’u ae o le tele o fa’ama’i ese’ese ua faapena ona aafia ai le mamalu lautele o le atunu’u.”

“E le masani lava ona ou fa’alogo i lea fa’ama’i o le kanesa ae ua ese lava lenei vaitau i le fotua’i mai o nei mau fa’ama’i.”

Na fa’asoa mai foi le Tama ia Simeona Lafai i le mafua’aga o nei fa’afitauli ua tutupu mai.

“O le mafua’aga lava lea ona mafua nei mea ona ua galo ia tatou le fa’avae o le tatou olaga, ua le toe iai foi le taulogologo a matua i fanua.”

“O le isi tulaga i le tele o fa’ama’i ese’ese ua lolofi mai i le atunuu talu ai le mamafa tu o le tau o le soifuaga ua iai nei Samoa, ua mafua ai ona fa’atau e tagata Samoa mea taugofie ae le lelei mo le soifua maloloina.”

Na fa’aalia foi e le Tama ia Lafai ua tatau ona nofo uta i le saoasaoa lea ua iai nei auala fa’atekonolosi ua iai le tatou atunuu aemaise le fanau.

“O le fanau ia i lenei vaitau ua na’o le Facebook a le ma le Youtube le mea lae fai ae ua le toe ano i meaaoga.”

“Ua tatau ona nofo uta i ai matua ma silasila toto’a i lenei vaitau ua i ai le olaga i Samoa, ua taugata le soifuaga ae ua faigofie le malamalama o le fanau i mea e le tatau ona o’o iai.”

“O le fofo lava o lenei fa’afitauli o le mata’itu pea lea e matua o le olaga ua iai le fanau, ma aua le vaivai e fa’atonu ma a’oa’i le tamaititi.”

© Samoa Observer 2016

Developed by Samoa Observer in Apia