Lauga - “O le Atua o le alofa lava ia”

Tusia Rev. Petaia Setu ,

1739 Hits

Rev. Petaia Setu

Rev. Petaia Setu

E le sili lava le alofa o se tasi i lenei alofa “O le upu lea a Iesu (Ioane.15:13). A o lana lauga foi i luga o le mauga o Olive na ia faailoa ai i lona ausoo ma le motu o tagata e toatele, e leai se pa tuāoi o le alofa o le Atua. E tutusa i le alofa o le Atua tagata uma (Mat.5:45), auā o le Atua, ole alofa ia. O loo iloa i le mataupu nei. O le ’alaga i le fia ola; ua saili i se alofa. Ua faafofoga, ua lagona; ua tali mălie i manaoga (f.13,14). Auā o lona lea natura e tumu i le alofa (Ioane.1:16).

O le ma’i leaga. E inosia e tagata. E tapu i le si’omaga o tagata. ’Ai ona o le ma’i e televave lona pipisi, e pu’e uma ai ē matutua atoa ma tamaiti. Sa ou faalogo e faapea i atumotu o le Pasefika anamua. E ave tagata uma ua maua i le ma’i lepela i le atu Mariana. O lona uiga, e le talia i lo tatou si’omaga. Ae ese le manaia o lenei tala. Ua na o Luka lava o loo ia faamatala.

O le malaga a Iesu mai Kalilaia ma Samaria e aga atu i Ierusalema, ae fetaia’i ai ma tagata lepela. Fai mai Luka, “ua tutū mamao mai i latou.” Ua tatou iloa o ma’i uma e finau e fia oo, e fia pa’i, ma se’i vaai ma faalogo lelei i le fomai. Ae leai! Ua tutū mamao mai. O loo ia i latou le faaeteetega. Ua malamalama i lo latou siomaga. O latou o tagata ua faatāfea.

Ua tuliesea. Ua faanofoesea. Ua mata’esea e tagata. E sa i le aai. Ua mau i tuā pa. E nofonofo solo i totonu o āna. E ufi uma le tino ma mata. E fefe i le malamalama. E gē i tagata. Faamata e le o ia te oe ni lagona faapea? Talofa e, ua faatusatusa lava fua oe i lea ma’i leaga a ea? Ioe, e gata lau vaai i le molemole o lou tino; a ua e le iloa o loo ua mafiafia le ma’i lepela i lou loto! E te iloa, e tutusa lelei lagona o le lepela o le pa’u ma le lepela o le loto. O lagona na o le tagata ua na iloa o ia o le tagata agasala.

O le itū taūa lea; ua lagona i le loto, o oe ma a’u o le tagata agasala. Ua na o le tagata e faamaoni lona lagona e moni lona saili i le ola. Manatua le faataoto a Iesu i le ao lafoga na alu i le malumalu e tatalo. Fai mai Iesu, “A o le telona, ua tu mamao atu, e le mafaia ona tepa a’e ona mata i le lagi.” Ua mā! Ua punou; ua pōpō lona fatafata.

Ua faaeteete. E le taumasina ma le Atua. O lagona ia Samoa. Faalogo i le loto ua fia ola, “Le Atua e, ia e alofa mai ia te au le tagata agasala.” (Luka.18:13-14). E tutusa lelei lagona o lepela ia e to’asefulu. Ua vavane tonu lava e le telona le natura o le Atua Faaola. Ae faalogo foi i lepela, “Le Alii e, Iesu, ia e alofa mai ia te i matou.”

Ua manino lelei, e leai se tagata e alofa i ia ituaiga tagata. A o le Atua, o lona natura lea – ole alofa. La lea ua tuu sa’o lava iai le fanoga.

Taatia ia le silafia e Iesu o mea uma. A ua tatou iloa, soo se ma’i ma le au sii ma’i e saili lavea’i, e ta’u le ma’i. peitai nei lepela, ua le o le ma’i, a o le alofa. Ua saili i le alofa faaola. Le alofa na fofoa ai le ola. Le ola e tua ile saolotoga.

Samoa e, o se ata manaia tele lea i le tagata agasala ua salamō. Ua lagona i le loto ua faanofoesea mai mafutaga mafanafana. Ua inosia  e tagata. Ia faaeteete i le va tapuia ma le Atua (Esoto.3:5). Ia e iloa i le aso nei, o oe o le isi lepela. E tatau ona e talia la lea mau. A o o tatou lepela e le mafai e vailaau ma togafitiga a le lalolagi. O le itū taūa, ia sa’o le sailiga. Ia sa’o le fomai. Ia sa’o le mana’o.

Silasila i le mătua, e te le tau faamatalaina ou ma’i ma ou vaivaiga i le Alii. E le talatalaina lou gaoi ma lou le popoi.

Lou amioleaga ma lou fai mea matagā. Lou faamaualuga ma lou faalumaluma. Lou le alofa ma lou le faamaoni. E taūa lou iloa o Iesu. Ia iloa lou va ma le Atua. Faamaualalo ma faaaloalo. Salamō ma ia sa’o. Fai mai Luka, Ua silafia e Iesu (f.14). E le i fesili Iesu pe se a se mana’o. Ua silasila Iesu i le va o loo tausi e le tagata mafatia. Ua faafofoga o ia i lo latou naunau mai. Ua mălie le vaai ma le faalogo. Auā ua faaalia i leo ma taga o latou loto. Ua tali le mana’o. Ua le tu’ua seia taeao a’ena. O nei lava.

Samoa, o le alofa o le Atua e le teūa mo taeao i le tagata ua moni lona loto i le Alii. “Inā o ia”. O le taimi nei. Ō se i vaai le faitaulaga i o outou tino ma le tulaga ua iai lo outou soifua maloloina. Ō se i molimau le faitaulaga i le silisili ese o le alofa o le Atua. Ō se i faailoa atu i le lalolagi uma, o le Atua o le alofa lava ia.

O le mau ofoofogia a le tusitala, e le i oo ile faitaulaga, a ua faamamāina i latou i le ala. Maifea le mana? O le alofa o le Atua. Maifea ona saoloto? Maifea le fiafia? O le alofa o le Atua. o le taimi lava na ō ai, o le taimi foi lea na malolo ai. E le fua faatatauina le alofa o le Atua i le tele poo le itiiti o au amioleaga; i le mamafa poo le māmā o lau agasala.

A o le alofa e tu i le noa. E tu i le laolao. E avanoa mo tagata uma. O le alofa e tupu pea, tupu pea lava pea. E mai le vavau lava ia, e oo i le faavavau. Fai mai le fai Salamo, o le alofa o le Atua e le liu. O ananafi, ole asō, e faavavau lava. O la le fatu pese, o lona alofa ua tumau, e le liu e oo i le faavavau.

Samoa pele e, o le ma’i faigata le lepela. Ae tele foi ituaiga lepela. O ila eseese ma mea faapaupau poo se lupea, e iloa lelei e le faitaulaga; na te avatu ia te oe se tala. A o mā’ila eseese o loo faataugaina lou olaga ile lepela agasala ua lilo lava ia i le Atua ma lana silafaga. Oe le lepela e le o iloa! Oe le lepela lilo! E faapefea ona e faailo?

Se a se upu e te tautala atu ai i le Atua? Poo e iloa o loo silafia mamao mai e le Atua lou loto? Poo e iloa e alofa le Atua ia te oe? Masalo ana iai se Samoa i lepela ia e toasefulu, o ia lea e faia le lauga. O lona uiga e lua i le tolu itula o tūtu ai pea Iesu e faalogologo poo le a tonu le mana’o. Ua tatou masani i lea foi uiga, a telē le mana’o, o le tele foi lena o upu ma umi ai. Ae faafofoga foi, “Le Alii e, ia e alofa mai ia te i matou.” Pau a ia o upu. Pau foi lea o le ituaiga sa’o o loo fia faafofoga mai iai Iesu. ‘Aua le faainuinu e iloa ai le taufaasee ma tupu tele ai le pepelo. O le Atua e faamaoni lona alofa. E le maīleia foi i le suamalie o upu a le atunuu le alofa o le Atua. Auā o le Atua o le alofa lava ia.

Lou atunuu e, Samoa, e leai so tatou e sao mai lenei ma’i tūgā o le loto. Tatou te mama’i uma lava. A o le itū sili ona tāua, ia tatou lagonaina, o tatou o tagata ua afaina.

Ia tatou salamō, ma talitonu i le alofa faapalepale o le Atua. Tatou faailoa atu tatou i le Alii lo tatou Atua, auā e le liu lona alofa. Faauta i lona alofa e le faatuaoia, na faalavā’au ile laolao i Kolokota, ina ia e maua le saolotoga. Ina ia avanoa lau fanau ma lou aiga i le malologa.

Ina ia sao atu tagata uma ua lailoa i ma’i faigata o lenei olaga i le ola. Valaau! Tautino i le Alii lo tatou faananau i lona alofa. Auā o le alofa ua iai le pule ma le mana; ua iai le saolotoga ma le maopoopoga; ua iai le manuia ma le ola. O la Paulo, “e le mafaia e se tasi lava mea na faia ona faate’aeseina mai i tatou i le alofa o le Atua, o loo ia Keriso Iesu lo tatou Alii. E moni, e le mafai, auā o le Atua o le alofa lava ia.

 

 

Amene

© Samoa Observer 2016

Developed by Samoa Observer in Apia