Usita’i i faiaoga

By Ilia L Likou 28 September 2017, 12:00AM

“E fia avea lava a’u ma loia i le lumana’i”

O lea le manatu fa’alia o le tama’itai o Eseta Fuiava i le Fofoga o Samoa i le aso ananafi ma o lo’o aoga o ia i le Kolisi o Leulumoega i le taimi lenei.

Na ia fa’ailoa o so’o se tagata lava e tatau lava ona i ai se miti i le lumana’i ona galue ai lea aga’i i ai.

“Ia e pei fo’i la o a’u, o lo’u ia le manaoga e tatau ona ou o’o i ai pe a ou matua, o le fia avea ai lea ma loia.

Na ia ta’ua o le taimi lenei o lo’o fa’asoasoa lava tupe maua aua le tausiga o le aiga fa’atasi ai ma aoga a ia ma nai ona tei laiti.

“O a’u o le u’i’i o le fanau a ou matua ma o se fiafiaga tele lea i a te a’u o le mafai ai pea lea ona ou alu i le aoga

“O le tele o nai isi tamaiti ua le maua se avanoa ona ua le gafatia e nai aiga nisi o vaega ona o le itu tau tupe.

O lona manatu e tatau lava ona fa’ataua e i latou o fanau le tulaga tau a’oa’oga.

“Ia o lo’u ia lea iloa i ai, a lelei aoga ma fa’alogo lelei i faiaoga e le taumateina lava le tulaga e o’o i ai ma manuia ai so’o se taumafaiga.

“A maua le poto e le gata e ausia ai le miti o lo’o ua i ai nei e avea ma loia, ia ae e fesoasoani ai tele ai si o matou aiga i le taimi lenei.

“O lo’u iloa i ai ua faigata nei aso, a le alu le aoga ia ua le maua fo’i se lumana’i lelei ae a to’a’aga lava i le aoga ia e maua le mea lelei mo le lumana’i.

“Aua o le potuaoga e na te saunia le lumana’i manuia o so’o se tama ma se teine aoga.

Na ia ta’ua o lo’o ia iloa lelei lava le tulaga e o’o i ai pe a le to’aga i le aoga.

“Ia a fa’aletonu mai le aoga, ia o lona uiga o le a leai se mea e fa’amoemoe ai pe a ou matua.

“E lelei lava i tama aua e mafai ona maua so’o se galuega, ae o teine e pei e tele fa’afitauli pe a le maua lelei se galuega.

“O le mea lava la lea o lo’o taumafai ai lava ia ou alu i le aoga ma usita’i le faiaoga e maua ai le mea lelei.

By Ilia L Likou 28 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>