Fa’amalosia faiganu’u i afio’aga uma
O lea le finagalo o le tinā i a Dela Savea i le fa’atalatalanoaga ma le Fofoga o Samoa i le aso ananafi.
E to’atasi lo la alo ma lona to’alua ma o lo’o ua nonofo i Falelauniu i ona matua.
Na ia fa’ailoa o lo’o sologa lelei mea ae e pei e tasi lava le fa’afitauli o lo’o tele na feagai ma lea vaega o le atunu’u.
“O le onānā ma fa’apisapisaō ai luga o le auala, ma e pule lava le tagata ia, aemaise lava i fa’ai’uga o vaiaso.
“Ia e mo le silafia ai e pei o lenei pito ia o tagata mai i’i ma o le lalolagi, ma o se itu faigata ai lea, aua e pule lava le tagata i lana mea e fai.
“E le mafai ona vaoia e se tagata aua e na’o le mea e lavelavea ai, ia ae se’iloga lava ua fa’afeso’ota’i e nisi leoleo ia fa’atoā mapu fo’i lea o le tele o taliga o le to’atele o aiga o lo’o i uta nei.
Na ia ta’ua e le fou lea tulaga i lea vaega o le atunu’u.
“Ia ai ona e manatu tagata e leai ni faiganu’u e mafua ai lava ona so’ona faia ia amioga le talafeagai.
“O se itu taua tele lea ina ia toe silasila i ai le malo mo se faiga se’i mapu ai le to’atele o nai tagata o o’o i uta nei, aemaise lava o fanau o lo’o ola ane ma va’ava’ai ma fa’alogo i nei upu so’ona talafo.
O lona finagalo ua tatau ona fa’amalosia faiganu’u mo afio’aga tu taulaga.
“O lo’o tele le ese’esega o tupulaga o lo’o ola i afio’aga pei o iinei ma afio’aga o lo’o fa’atinoina ai faiganu’u a matai.
“Ia o lo’u iloa i ai o lo’o sologa lelei lava le tele o tupulaga i Savai’i ma le tele o nu’u i tua o le la fo’i itu o le atunu’u, ae e pei o lo’u ia iloa i ai , ona o le mamalu o le pulega a matai.
“Aua ua o tatou silafia uma lava e pei o vaega nei o lo’o fa’atinoina i totonu o faiganu’u nei, e mo le lelei lautele ai o le tele o vaega o le atunu’u.
“O la’u ia fo’i tatalo i le malo ina ia silasila ina ia vave ona faia ni faiganu’u i totonu o le tele o afioaga e aofia ma i matou nei.
“Ae o lo’o sologa lelei lava le tele o vaega i lenei vaitau.