E tatau ona ave le fa’amuamua mo Savai’i

Tusia Pai Mulitalo Ale ,

128 Hits

Lemoa Isitolo o Pu’apu’a.

Lemoa Isitolo o Pu’apu’a.

O lea le aotelega o le finagalo o le tamā i a Lemoa Isitolo o Pu’apu’a i le fa’atalatalanoaga ma le Fofoga o Samoa.

O lona talitonuga, ‘afai e telē Savai’i, o le fa’amuamua la e tatau pea mo Savai’i.

 “Ia a ou alu atu i Upolu ia  e tau ai lava se manatu fo’i lea po o le mea ea e tusi’esea le motu nei e le malo.

 “Ia o le mea lea e i ai ua ova tagata e omai ma tauto mai o lea o le a fai?...  o lea vaega o le a fa’atinoina ae leai lava se tino mai o se mea e tasi pe lua.

 “O le mea lea e ao ai lava i le malo ona silasila lelei i so’o se vaega ma ia sa’o a latou fa’aiuga ma le fa’amuamua e tatau ona ave i le atunu’u.

“E ao lava ona toe tagataga’i i tulaga tau a’oa’oga ma e tatau ona tutusa lelei Upolu ma Savai’i.

O lea lona finagalo ma lona naunauta’iga ia maua le avanoa tutusa ma e ao lava i le malo ona silasila i se isi faiga talafeagai mo vaega uma nei.

Na ia fa’amamafa lea tulaga ma ia ta’ua ai e ono avea le leai o ni avanoa fa’apea mo Savai’i ma mafua’aga e aga’i mai ai le tele o le fanau i Apia.

“Ia aua e fai atu la’u tala, o le tele o aoga lelei, iunivesite ma le tele lava o avanoa faigaluega ia e pei o Upolu uma.

O le 60 ai o le matua o le soifua o le tamā i a Papa Isitolo e le’o avea ma mafua’aga e fa’avaivaiina ai lona ola galue aua le manuia o lona aiga aemaise o  ona alo e to’alua.

 “O le tausaga 1994 na omai ai ma le aiga iinei ae o le aiga nei sa i o lava i le ‘a’ai.

 “Ia o le olaga lava ia o le Samoa ia o mea fai lava o le lotu, ekalesia ma le nu’u.

 “O nei aso ia o tupe lava mea uma…ia o lo matou aiga e pei na’o a’u lava o lo’o galue mo le  tausiga o le aiga.

 “Ia ua i ai lava itu ua fa’afaigata ai nei vaitau, o aso la sa televave le la’a ia ae ua sau le matua ia ua tau le mafai ona savali umi i le tele o taimi.

 “O lo’o i ai matou fanua galue ia e maomao ese i uta, ia a o’o le taimi e alu ai sa matou galuega ia e la’a i le pogisa ina ia mafai ona alo mai ai le vevela o le la i le taeao.

Na ia ta’ua fo’i le leai ai o ni avanoa faigaluega mo Savai’i pe a fa’atusatusa i Upolu i le taimi lenei.

 “Ia o le to’atele o tagata faigaluega e fai lava si maomao mai Savai’i ma o se itu e ao ona silasila toto’a i ai le faigamalo.

 “E sa’o o lo’o i ai faletalimalo i Savai’i nei ia ae le taitai ona lava ni avanoa faigaluega mo le to’atele i lenei itu o le atunu’u.

 “E le gata i lea , e ao lava ona tele fo’i ni aoga iinei, lea e lelei le tulaga tau i Kolisi Maualuluga ae o Iunivesite ia e ese la.

“O le to’atele o matua ia e le lava ni tupe mo Iunivesite, ia a leai lava se tupe mo Iunivesite ia e leai lava.

© Samoa Observer 2016

Developed by Samoa Observer in Apia