Mana’omia se suāvai

By Pai Mulitalo Ale 29 September 2016, 12:00AM

Ua tele ina o tatou fa’alogo o fa’apea nisi – O le mea e lelei i Upolu e lelei fo’i mo Savai’i!

Aepeita’i o nisi o ‘au’aunaga lelei mo Savai’i o lo’o tele ina fesiligia ona e le’o mafai ona o’o atu le tele o afioaga.

O se tasi o ia ‘au’aunaga , o le suāvai.

O le taunu’u atu ai o le Fofoga o Samoa i se tasi o vaega e 20 maila mai Samalaeulu e tele ina silafia e le to’atele ma ta’ua o le Vaotele, na fa’ailoa mai ai e le tamā i a Louā Lemo, le pagatia o lo’o feagai ai ona o le leai o se  suavai.

 “O lo’o i ai lava le vai a le pitonu’u nei e tele ina fa’aaoga ae o le paipa mo le malo e fai lava le mamao mai ma le nofoaga o lo o matou nonofo ai.

Na ia ta’ua o le le lava o se tupe o le mafua’aga lea ua fa’afaigata ona fa’atau ni paipa e fa’aau ane ai le suavai i le vaega tonu o lo’o nonofo ai ma lona aiga.

 “E pei ona silasila mai , ia e tusa lava po o le tulata i luma o lo’u fale ae le mafai lava ona o’o mai le vai i tua nei.

 “O le taimi lenei ia e fai lava sina maomao pe tusa ma le 300mita le mamao o le vaega o le nu’u e o i ai lo matou aiga mo le suavai.

 “Ia o se avega mamafa o lo’o tauamoina i aso uma ona o le suavai, e pau le taimi e tau maua ai se suavai pe afai lena e timu, ia ona fa’atali ai loa o le timu aua mea’ai aemaise o nisi o vaega e mana’omia.

Ua lima ai nei masina talu ona nofoia e  Lemo ma le tinā i a Elisapeta ma le fanau e to’alima lea vaega o le motu.

 “Sa nonofo muamua i le vaega e tulata i le Mali’oli’o ae ona o le manumanuga i le ola o lo’u aiga pe a pa le vaitafe e pei o lea lava le tulaga ua mafua ai ona o’o mai iinei.

Na ia fa’ailoa fo’i o le aga’i ese ai mai le vaega o le afio’aga sa i ai muamua e le’i i ai lava se faigata sa i ai.

Na fesiligia fo’i e le Fofoga o Samoa le tulaga o lo’o feagai ai ma ia i le tausiga o lona aiga ma na ia fa’ailoa o nisi o le fanau o lo’o i atunu’u mamao ae o nisi o lo’o i galulue i Apia nei. 

 “Ia o le tupe faigofie lava e maua mai i fua o fa’ato’aga lea o lo’o fesoasoani tele i le taimi lenei.

Na ia fa’ailoa mai o lana galuega o lo’o faia i aso uma ma taumafai ai lava o le atina’eina o le aiga i aso uma.

Na talosaga fo’i i le malo ina ia savavali i folafolaga na fai.

By Pai Mulitalo Ale 29 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>