Solo lelei le soifuaga i Savai’i
O le maua ai e le Fofoga o Samoa o le avanoa e fa’atalatalanoa ai le tinā matua o Fa’ailoga Tuatai o Sapini i Faga o se fiafiaga tele lea lea i a te ia e fa’asoa mai ai le tele o tiute o lo’o feagai ma ia i aso uma.
O Fa’ailoga o lo’o aumau nei i Faga le afio’aga o le tamā o le aiga ae o lona alalafaga na soifua ane ai o Ti’avea.
O lona talitonuga - ‘o aso uma o lo’u ola o se meaalofa le aumaua e saunia pea e le Atua mo a’u ma lo’u aiga.
“Ia o le olaga i Savai’i nei ia o lo’o solosolo lelei mea uma leai se mea e tasi o fa’aletonu.
“O le fa’afetai lava i le Atua i lona agalelei ona o meaalofa e tele ua ia saunia mo i tatou lana fanau.
Na ia fa’ailoa o le tausiga o lona aiga i le taimi lenei e fa’alagolago lava i fua o fa’ato’aga lea e tele fo’i ina fa’atau i ona lumāfale ma maua ai nai tupe fa’asili mo aso ta’itasi.
“Ia o le mea lava lea o lo’o fai i aso uma, ia o le fa’atau atu o koko ua uma ona tu’i ia ma aumai i luma i’inei e fa’atau atu ai i le mamalu feafioa’i o le atunu’u ia ma totonu fo’i o le nu’u nei.
“O le galue malosi lava e maua ai lava nai fesoasoani mo le aiga.
Na ia fa’ailoa i le Fofoga o Samoa e to’afa tagata o lona aiga.
O se tasi o ona alo e faigaluega aua lava le tautuaina o le aiga i se tasi o kamupani pasi ia ma le isi o lo’o i le aoga.
“Ia e le tele ni totogi e maua mai, ia ae o le a lava le tupe, e talia lava ma le fa’afetai ma fa’apolopolo aua le aoga a si a’u tama laititi lea o lo’o i le aoga.
“A lelei lava le aso ia e $200 le tupe e maua ae a fa’aletonu, ia ua na’o se $5 pe $10 fo’i….ae pe lelei pe leaga fo’i aso ia e lagona lava le fiafia.
“O nisi o taimi ia ua sioki le koko latou ia mai le ma’umaga, ia ona matou o lea ua fa’atau mai koko mai le maketi ia ma toe fa’atau atu.
“Ia o tupe lava mea uma, aua e le alu atu loa aumai koko, e fa’atau.
E le gata i le tulaga i totonu o le aiga, ae na ia ta’ua e fa’apea fo’i i lo latou aiga potopoto.
“E pei o le tu lava ma aga a tatou, ia o le fetausia’i lava, o a ni mea’ai ma nisi vaega , ia e fefa’asoa’i e pei ona masani ai le tagata Samoa.
“O le tele o taimi ia e galulue fa’atasi lava lo matou auaiga i le tele o vaega, o lea lava le fa’amoemoega ia fealofani ma talitaliē fa’atasi.
“Ia e o’o lava i le fa’amatagofieina o ‘a’ai ma lumāfale ia e fa’apena lava e matou te omai fa’atasi e galulue aua lava le lelei alu i luma o le aiga.
“Ia e pei ona e maitau atu , ia o le nu’u nei e fai o le matagofie ae e fou lava le ea e manavaina i le tele o taimi , o se agaga fiafia lena i a te a’u ia.
“E fa’apena fo’i i mafutaga i totonu o le nu’u e pei ona o lo’o faia ai falelalaga, aua o lo’u ia lea talitonuga o le isi auala lea e fesoasoani tele mo aiga ia o le lalagaina o ie.
O le tinā i a Fa’ailoga Tautai ua 54 le matua o lona soifua.