Vivi’i fa’atasi Ekalesia ona o ‘ele’ele ua foa’ina

Tusia Ilia L. Likou ma Faaliliu e Maiava ,

140 Hits

LOTU O LE FA’AFETAI: Nisi o sui o ekalesia e lima sa ‘auai i le lotu-tu’ufa’atasi a le afio’aga o Satuimalufilufi.

LOTU O LE FA’AFETAI: Nisi o sui o ekalesia e lima sa ‘auai i le lotu-tu’ufa’atasi a le afio’aga o Satuimalufilufi.

O ananafi na faia ai le sauniga-lotu tu’ufa’atasi a le afio’aga o Satuimalufilufi, lea e faia i tausaga ta’itasi. Sa tumutumu ai le afio’aga i lea sauniga, sa fa’atasia ai ekalesia e lima i le Malumalu o le Ekalesia Metotisi.

Sa momoli ai le fa’afetai a le afio’aga, ona o fa’amanuiaga ua sasa mai mo le nu’u, ae maise o le fa’afo’i atu o le Vi’iga i le Atua, ona o le 72 ai lenei o tausaga, talu ona fa’amatu’uina atu o ‘ele’ele e umia sa’oloto ma soifua fiafia ai. 

Na fa’aalia e Peipeigamalie Sola, o se matai o le afio’aga: “O le sauniga fa’apitoa lea a le matou nu’u na amata i le tausaga e 2014.

“I le taimi na sainia ai se feagaiga a le malo ma le nu’u nei, e fa’amatu’u mai ai le pule mo le fa’aaogaina o ‘ele’ele nei ma pulea sa’oloto ai e aiga o le nu’u.

“I luma atu, i le 1942, na ta’u mai ai e le malo ia matou o-‘ese ma le ‘ele’ele sa fa’aigoaina o Satuimalufilufi, ma matou o-‘ese ai ae fausia ai le malae-va’alele i Faleolo.

“Moni lava la ua matou se’e mai i le nofoaga lenei, ae sa pulea lava e le malo se’ia o’o mai i le 2014. O le tausaga lena na malilie ai e fa’amatu’u mai le ‘ele’ele la lenei i Ali’i ma Faipule o Satuimalufilufi. 

“Ua le-toe iai la se ‘ele’ele o le malo, aua o lea ua pulea nei e matou.

 “O le sauniga-tu’ufa’atasi la lenei, e manatua ai galuega lelei uma sa faia e o matou tua’a ua tofafa mai tu’ugamau. Matou te manatua ai fo’i tupulaga o aso nei, ona o tatalo le-aunoa e tu’uina atu ae maise lo latou talitonu maua’i i Le Atua Silisili’Ese o lo’o tapua’ia iai, lea e tatala mai pea le faitoto’a mo so’o se tasi e tu’itu’i pea ma tu’itu’i pea mo se fesoasoani.” 

“O le tolu lenei o tausaga talu ona amata lenei sauniga ma o le ‘autu lava lea, o le si’i o le Vi’iga ma le Fa’afetai i Le Atua, ona o Lona Alofa ua tali mai ai i a matou talosaga sa tu’uina atu pea.

O ekalesia o lo’o i totonu o le afio’aga, e aofia ai le Ekalesia Katoliko, le Metotisi, le EFKS, Le Leo o Keriso, le Fa’apotopotoga a Le Atua ma le LMS.

 “Moni e fita le ‘ala sa asa mai ai, ae le uma ai le fa’afofoga pea o Le Atua i a matou talosaga; le filemu ma fa’amanuiaga mo si o matou nu’u nei,” o le saunoaga lea a le Tausi-Matagaluega o Iakopo Falefitu, o le Ekalesia Metotisi.

“O le ulua’i sauniga-tu’ufa’atasi lava, sa faia lea i le EFKS, soso’o ai ma le Katoliko i le 2015 a’o le tausaga nei la, lea ua o’o mai i le matou ekalesia. O le lotu-fa’amanatu o le 2017, o le a se’e atu i le Leo o Iesu Keriso. 

“ E mata’utia lava le alofa ma le agalelei o Le Atua ma o Ia lava le ala moni mo mea lelei uma.

© Samoa Observer 2016

Developed by Samoa Observer in Apia