Fa’ate’ia le Soifua Maloloina ina ua ta’utino le solo a le tamaloa

Tusia Lanuola Tusani Tupufia ma Fa’aliliu e Maiava ,

187 Hits

Lea ua ta’utino e le kamupani-Fiti o lo’o ‘aumaia le ‘apa-pisupo o le Farmers Style, lo latou fa’aaogaina o le fatu-moa i le gaosiga o le pisupo, ina ia fa’amanogi atili ai. 

O lea fa’aaliga na saunoa iai le Fa’atonu Aoao o le Soifua Maloloina, o Leausa Dr. Take Naseri i le aso ananafi. 

I se talanoaga ma sui o le Samoa Observer, na ta’ua ai e Leausa, o le a faia sa la feiloa’iga ma se sui mai lea kamupani, e fa’amaonia ai isi mea.  

O saunoaga ia a Leausa ina ua fesiligia mo se tala lata mai o a latou su’esu’ega sa faia, i le ‘apa-pisupo lea na taofia e le Matagaluega i le masina talu ai. 

 “Ua ta’utino mai lava, o lo’o latou fa’aaogaina fatu-moa e fa’amanogi atili ai le pisupo,” o lana fa’aaliga lea. 

“Ua mae’a fo’i la ona matou fa’ailoa iai, e le taitai talafeagai mea ia (fatu-moa) ma mea o lo’o tusia i pepa-fa’ailoilo (label) i le tino o le ‘apa aua, ua manino ai, e iai le mea ‘ese lea ua i totonu o le ‘apa, e matua ‘ese mamao ma le pisupo. 

“Ua folafolaga mai fo’i, o isi ‘apa-pisupo o le a faia, e le toe avea iai ni fatu-moa.” 

Na ta’ua fo’i e Leausa, o le fa’aaliga mai le kamupani lea, ua nofo-masalosalo ai lava ae na fa’amanino lava iai, o le latou popolega tele, o le saogalemu o le atunu’u.   

“O le fa’anaunauga lava lea, ia matua mautinoa, e leai se mea e alia’e mai i le lumana’i, e mafua mai ona o fa’ama’i mai le ‘apa-pisupo lea,” o lana saunoaga lea. 

“O fa’afitauli na o lo’o popole iai ma o le mafuaga fo’i lea o le le-vave faia iai o se fa’ai’uga. O lo’o matou mulimulita’i lava i le Tulafono Tau Fa’aofi mo Taumafa.” 

E moni la ua ta’utino mai e le kamupani lo latou fa’aaogaina o le fatu-moa e ‘ese mai i le pisupo, ae na ta’ua lava e le Fa’atonu Aoao, na te le-taliā lava se isi fa’amatalaga e tau-‘alo iai, ona o le mea-sese, ma ua tupu fo’i.  

 “Atonu pe na latou faia ma le manatu e le afaina, ae ta’ilo iai. Lea ua fa’apea mai o fatu-moa sa fa’aaoga e fa’amanogi atili ai le pisupo, sa tatau la ona ta’ua i pepa-fa’ailoilo (label) ona mafai lea ona fai  iai o le filifiliga a le tagata, pe fa’atau pe leai fo’i.”

Ae talu ai e le gafatia e le Fa’alapotopotoga o Su’esu’ega Fa’asaienisi a Samoa (SROS) i Nafanua fa’apea le fale-su’esu’e i le falema’i ona fa’amaonia o mea sa i totonu o le ‘apa-pisupo ua vevesi ai nei, na saunoa ai Leausa, ua mae’a ona ‘auina atu ia vaega e su’esu’eina i Niu Sila.

O le taimi nei la, o lo’o tumau pea ona taofia ona toe ‘aumai o le pisupo lea i le atunu’u. 

E le’i maua se avanoa e ‘aumai ai se fa’amatalaga mai le kamupani lea mai Fiti. 

I le pepa-fa’ailoilo (label) o le ‘apa-pisupo lea (Farmers Style Corned Beef), o lo’o ta’ua ai vaega o lo’o gaosia ai, e aofia ai le a’ano o le povi, o le vai ma le masima (sodium nitrite).

O lo’o ta’ua ai fo’i, o povi o lo’o gaosia ai le pisupo, e ‘aumai i Niu Sila ae o lo’o tu’u-fa’atasia, tapena ma tu’u-‘apaina e se kamupani mai Fiti.

 I le Tulafono o Taumafa 2015, Vaega 2 Puipui 7, Fa’amatalaina Sese o mea’ai, o lo’o fa’amamafaina ai e fa’apea;  

(1) E le tatau i se tagata-ola ona faia ma tu’uina atu se fa’amatalaga sese i se mea’ai o fuafua e fa’atauina atu.  

(2) E le tatau i se tagata ona fa’atauina atu se mea’ai ua na silafia ma iloa e sese le fa’amatalaga o iai po’o le ono afaina ai o le soifua o se tagata o lo’o fa’alagolago lona iloa o sea mea’ai i fa’amatalaga o pipi’i ai. 

(3) O se tagata e solia le puipui (1) o lenei tulafono, ua faia se solitulafono ma e mafai ona molia ma fa’asalaina i se fa’asalaga e le sili atu i le 8,000 iunite tauFa’asalaga po’o le falepuipui fo’i mo se umi e le silia le tolu tausaga, po’o fa’asalaga uma e lua.

© Samoa Observer 2016

Developed by Samoa Observer in Apia