Leai se fa’amoemoe mo Ta’aloga a le Olimepeka

By Deidre Fanene 29 July 2016, 12:00AM

Lea ua fa’asa’o mai e le Peresetene o le Asosi Afeleti a Samoa, o Tuala Tommy Stancil, ma fa’amuta ai fo’i le tu’u-fesilisili pea o nisi, pe ono-aofia i le ‘Au a Samoa mo Ta’aloga a le Olimepeka, le tama’ita’i-ta’alo Samoa e fa’amautu i Niu Sila, o Kasandra Salamasina Le Tafa’ifa Vegas.

“E le agava’a mo le ‘au-atoina o le samala,” o le fa’aaliga lea a Tuala i le Samoa Observer.

“Pau le to’alua ua agava’a mo le Olimepeka, o tagata-ta’a’alo o lo’o fa’amautu nei i Amerika, ae mo Kasandra, e le-agava’a ma o le mea moni lena.”

Na fa’afeso’ota’ia Tuala mo se fa’amalamalamaga, talu ai le fa’aaliga a le faia’oga a Kasandra, o Shaka Sola sa fa’asalalauina e le Weekend Observer, lea o lo’o ia una’ia ai sona avanoa mo Ta’aloga. 

 “O Kasandra o lo’o umia i le taimi nei, le matati’a a Samoa i le ‘au-atoina o le samala i le itupa o tama’ita’i, ma e fa’alua ona ia ‘ausia le matati’a lea sa fa’atuina e Margaret Satupa’i, latalata i le sefulu tausaga talu ai,” o le fa’aaliga lea a Shaka Sola.

“Ae sa tumau pea le lelei o lana taumafai ma si’isi’i ai pea, lea fo’i sa ia maua ai se pine mo Samoa i lea lava ta’aloga, fa’apea le togiina o le pulu-mamafa ma le veloina o le tao, talu mai Ta’aloga a le Itulagi i le 2014 (Oceania Championship 2014) i le Atu Kuki,  le 2015 i Cairns Ausetalia, Ta’aloga a le Pasefika i Papua Niu Kini i le tausaga talu ai fa’apea Ta’aloga i Papae’ete Tahiti i le amataga o le tausaga nei. 

“Sa filifilia fa’apitoa lava i le Vaega Maualuluga o ‘Au-ta’a’alo Afeleti a Samoa mo tausaga soso’o e fa, talu ai lava le lelei tele o ana taumafaiga.” 

Mo ana tapenaga mo ta’aloga a le Olimepeka, sa fa’aauau pea ona ‘auai Kasandra i tauvaga o sa’iliga-siamupini a Niu Sila aoao.  

 “A’o le amataga la o le tausaga nei, o lo’o fa’aauau pea ana polokalame o koleniga i Portland Oregon i Amerika, lea sa ia fa’atuina ai le matati’a fou mo Samoa i lea lava ta’aloga, a’o ‘auai i sa’iliga-siamupini a le Fa’alapotopotoga o Ta’aloga a le Setete o Arizona,” o le fa’aaliga lea a Shaka.

“O Kasandra, o le tama’ita’i numera tasi lea i Samoa ma le Itulagi nei, i le ‘au-atoina o le samala-mamafa ma e le tau-fa’amatalaina lea tulaga. E na o ia fo’i le tama’ita’i-ta’alo i lea ta’aloga i totonu o le atunu’u, ma sa tu’u atoa lona malosi i ana taumafaiga i le tele o tausaga ma ua fa’amaonia fo’i lona lelei e ono maua ai se pine mo Samoa.” 

Ui i ia fa’aaliga, ae ‘ese lava le finagalo o le Peresetene o Tuala, lea e fa’apea mai, e le’i ‘ausia e Kasandra le tulaga mo’omia e filifilia ai mo le Olimepeka.  

“Aisea o le a matou taofia ai e fai ma sui o Samoa i le Olimepeka, pe ana agava’a? o le fa’aaliga lea a Tuala.

“Ma’umau e, matou te matua manana’o e avea ma sui o Samoa i le ‘au-atoina o le samala mamafa pe ‘ana agava’a, a o le fa’anoanoa lea, ona e le-fa’apena.

“O le mea moni lava, ina ia agava’a mo ta’aloga a le Olimepeka, e tatau i se tagata-ta’alo ona ‘ausia le 74 mita le mamao e atoina ai le samala, peita’i mo Kasandra, e na o le 54 mita le mamao na te gafatia. 

“Ua mae’a lelei ona matou fa’amatala iai lea tulaga, e fa’apena fo’i ona saunoa iai le Peresetene o Ta’aloga a Samoa ma le Komiti o le Olimepeka,  ma o le tala lena, e le agava’a.

 “Lea ua silia nei i le lua vaiaso talu ona mae’a lena mata’upu ae ‘ou te le-iloa la le mea lea e una’i mai pea, a’o le mea moni lea ua ‘ou fa’aali atu, e le-agava’a mo Rio.” 

Na fa’amalamalama mai fo’i e le Afioga a le Peresetene, e le’i manumalo Kasandra i se pine-‘auro i Papua Niu Kini i Ta’aloga a le Pasefika i le 2015, na o le pine apa-memea.

“Ua mae’a lelei ona matou talanoa ma fa’amalamalama iai mea uma ma mafuaga, ma ua malilie fo’i. A’o lea fo’i la ua toe ‘aumai nei i le pepa, matou le-iloa la po’o le a le mea lea e saga una’i mai ai pea.” 

O le ‘Au-afeleti a Samoa ua filifilia mo Rio, e aofia ai ali’i-ta’a’alo e to’alua. O Jeremy Dodson mo le tu’uga o le 200 mita ma Alex Melei Rose mo le togiina o le ma’a-mafolafola. O Tuala ma Ah Chong Sam Chong, o ali’i-ofisa ua filifilia e malaga fa’atasi ma le ‘Au a Samoa.

By Deidre Fanene 29 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>