1.Matauina i Tala Fou se Ulutala fai mai –“Ua matua gūgū lava le Taitaifono o le Komisi Su’esu’e a le Palemene- lea na tofia na te suesueina le faatinoina o galuega a Ali Faamasino o le Faamasinoga o Fanua ma Suafa.

O le matau la i le fesili na tuuina atu e tusitala o nusipepa-“o se tulaga ua o’o i ai taualumaga a lea Komisi Su’esu’e. A fua la i le Tulafono Tumau e pei ona faaalia ma ona aiaiga-‘e tapu ona faailoa atu le lipoti ma taunuuga o suesuega a le Komiti Filifilia! Ae o le itu lea na fesiligia e tusitala o Tala Fou-“o le taualumaga ua o’o i ai suesuega a le Komiti Filifilia. A fua la i le tali a Lopao’o-e matua eseese mamao lava ma le fesili. E le o faailoa maia foi pe o le a le solitulafono lea na ta’ua e Lopao’o e tusa ai ma Tulafono Tumau a le Malo.

O lea foi ua fai mai le Faipule ua pupuni lona fofoga toe loka ma ona vae! Afai la o le faiga lea o le a fai ai Faipule o itumalo uma- o le pupuni o latou fofoga toe loka ma o latou aao-‘a faapefea la ona faaleo finagalo o itumalo e ala i o latou Faipule pe afai o le faiga lea? Afai la o le tulaga lea o le a o’o i ai faipule uma o itumalo-o le a la le aoga o lea ta’u o le sui o le nuu ma le itumalo-ae o lea e le mafai ona tali mai i le atunuu? O le a sou taofi?

2. Matauina i Tala Fou se ata o le Pasi lea na lavea i Tiavi atoa ai ma se faatoesega a Tiatia Noa Tiatia-le alii e ou lea pasi. E ui lava la ina o se faalavelave ua afaina ai nisi-ae o mea faapenei -e mafai ona tutupu i taimi uma-pe afai tatou te le faatauaina.

O lenei foi faalavelave-ia atonu e fai mai nisi o le saoasaoa ua pogai ai le faalavelave! Ae ia manatua foi-poo le a lava le saoasaoa-o le avetaavale lava ia ua a’oa’oina lelei i tulafono tau feoa’iga i ala tetele-na te iloa lelei lava le mea e ono tupu mai pe a saoasaoa-ma e tatau foi ona matua malamalama lelei i le mea e tatau ona fai –pe a tulai mai nei ituaiga o faalavelave. Afai la o lea avetaavale-e le o se avetaavale na fai sona su’ega e le Ofisa o Leoleo-ona faatoa tuuina atu ai lea o lona laisene-ailoga la e tatau ona tupu lea faalavelave?

O le uiga o le faamatalaga-‘ana malamalama lelei la lenei avetaavale i tulafono o femalagaiga e ala i le su’e i le suega aloa’ia mo avetaavale uma-e leai se mea e tupu! E mafua ona ia su’ega e anoano mea tau feoaiga i ala tetele e aoaoina ai-e pei o le mea e fai pe a a’ea se a’ega ma le mea e fai pe a faaifo le taavale i lalo o le a’ega! Afai la ua afaina nisi ona o lenei faalavelave-e tasi lava le vaifofo e titina ai-“o le ave uma lava lea o avetaavale o pasi la’upasese –e fai muamua a latou su’ega-ona faatoa mafai ai lea ona laiseneina mo pasi la’u pasese! O le a sou taofi?

3. Matauina pea le anoano o taumafaiga o loo fai nei-ina ia tineia le sauaina o tamaitai! O lenei la faafitauli-e aliali mai ua matua tulaga ese lava lona tulai mai i aso nei-ma afai e fesiligia le mafuaga-o le tali moni ma le faamaoni-e mafua mai le suiga tele ua i ai nei Samoa! O le a lea suiga? O le suiga fai mai e tutusa aia a tagata uma o Samoa-ma o le upu moni lava-e le o se mau lea a Samoa-ae o se upu na afua mai fafo-talu ai nei mea o faigamalo faa-temokalasi! O le tulaga faigata la ua o’o i ai-o le aafia ai lea o Samoa-ae leai se mea faapea i Samoa nei! O le pine o lenei mau-e ese sauniga e fai mo le fanau mai o se tamaitai-ese le tama!

A o’o foi ina matutua-o le tapu i lo la va talu mai ona latiti-e faaauau pea lava-se’ia o’o ia latou fanau ma fanau a latou fanau! O lona uiga-o le tapu e o’o i le faavavau. O lona uiga-o se mea e le toe mafai ona toe suia-o le faavae na fai se’ia o’o i le faavavau. Afai la ua soli lenei faavae-o le a le mea o le a tupu mai ai? Ia silasila la i olaga o tupulaga tama talavou i aso nei! E a? Ua taulamua i mea leaga-ua faatupu vevesi-ua soli le tulafono-ua le mafai e le Falepuipui ona taofi-ua sosola i tua ma fai amioaga mata’utia ma laumanu’ia i le lalolagi atoa ae ta’u ai ma Samoa! O le uiga la o se faamatalaga-afai o le tamaitai o le feagaiga a lona tuagane-o ai la e malaia ai pe a le tausisia?

O le tali-o lona tuagane! Afai foi la e faapelepele le tama i lona tuafafine moni-aisea la e fasi ai lona to’alua? E i ai lava se tagata e sa’o atoatoa i lalo o le La? Afai la e avatu le tuafafine pele o le isi alii-poo le feagaiga ma le ‘auga-faapae a le isi aiga- ae fai ma polotu’i a le isi alii-o le a le uiga o lea mea? O lona uiga-o lea alii-e le alofa foi o ia i sona tuafafine-ma afai o lea-o lona uiga-ua faamalaia e lona tuafafine! O le uiga la o se faamatalaga-e le avatua tama pele a isi aiga e fai ma au polotu’i-ae alu oe e faatau sau polotu’i- pe afai e fai ni polotu’i a le tou aiga! O le a sou taofi?