Fa’alagolago lava oe ia oe
Ia avea oe ma ou oe lava pule.
O le manatu fa’alia lea a Ropene Faanofo mai Fagalii, e faatatau lea ia te ia, aua e lei fai aiga o ia ma o loo iai foi lana ia galuega e tua iai.
O le faatalatalanoaga a Ropene ma le Fofoga o Samoa, sa ia taua ai, o ia e faigaluega i le malae tapolo a Fagalii, e ala lea ile faamamaina ma o le mafuaaga foi lena ua o’o mai iai i Tuanaimato ona o lona fia matamata i taaloga sa fai.
“Ou te faigaluega i Fagalii ile faamamaina o le fanua.”
O Ropene e 43 le matua o lona soifua ma e lei iai lava sona aiga.
“O au matou te nonofo faatasi ma uso ma tuafafine ma e ola a le tagata ia i lana ia galuega.
“O le olaga a lea e faapea, e te faamoemoe a oe ia oe.
“O le galuega a le tagata e taua aua a leai se galuega, e le mafai ona e ola.
“O le galuega e maua ai se seleni, ma e tatau lava ona fai sau a ia galuega aua o oe lava e te faamoemoe ai i aso a sau.
“O au ou te faalagolago a au ia au, ou te tua i lau galuega ma e iai foi lau faatoaga, ou te faalagolago ai i isi taimi pea le lava le seleni.
Sa taua foi e Ropene, e leai se leaga o lou ola tutoatasi aua e iai taimi e te le toe faamoemoe ai i lou aiga ae la ua e iloa tausi a lou oe lava ia tagata.
“E iai lava faigata o le olaga ae a tatou faavaivai e faapena foi ona tele mai.
“E le faapea tatou te mafuta ai pea ma o tatou aiga ma e o’o foi se lagona lelei ia te oe pea e ola lava oe i au galuega.”