Ua lapata’ia le Malo e uiga i “tagata malaga e le faatagaina e le tulafono”

By Lanuola Tusani Tupufia 29 June 2016, 12:00AM

Ua faailoa atu i le Palemia o Tuilaepa Sailele Malielegaoi ma lana faigamalo ina ia mata’ala i le faatupula’ia pea o tagata malaga e le tusa ai ma le tulafono. O lea lapata’iga e mai Sui Usufono o le Palemene  i le Aso Gafua i le faagasologa o le talanoaina o le Tulafono Tau Faaofi Toe Teuteu Tau Sitiseni 2016.

Na faataatia i le Laulau-a-fono e le Sui Palemia o Fiame Naomi Mataafa, e fai ma sui o le Palemia o Tuilaepa Sailele Malielegaoi, o lea tulafono tau faaofi o loo sailia ai le toe teuteuina o le Tulafono Toe Teuteu o Sitiseni 2004, aemaise ai lava  le fuaiupu 7 o le Tulafono-e aofia ai le tupulaga lona lua o tagata Samoa e fananau i fafo atu o Samoa o latou matua poo matua o latou matua o se sitiseni Samoa i le aso na fanau ai.  

O loo aiaia ai foi ni mataupu feseeta’i e aofia ai tusi talosaga ia o loo taoto i le Matagaluega e faatali ai le faamaonia o le Tulafono Tau Faaofi..Ae peitai-na lapata’ina le malo  e faapea o le toe teuteuga e ono mafai ona tatala ai se faitoto’a i tua i tagata malaga e le tusa ai ma le tulafono ma tagata mai fafo e teu faafaigaluega a latou tupe o latou faamoemoega e le o manino lelei.. O le Faipule mo Salega Sasa’e o Olo Fiti Vaai sa matua tete’e malosi i suiga ua fuafua. Fai mai Olo ua matua popole lava o ia i lenei tulafono-talu ai ona ua pa’ia ai se mataupu o loo fai ma fatu o tagata Samoa uma-o le sitiseni lea. 

 “Ou te iloa o loo i ai vaega i totonu o le Tulafono Tau Faaofi Sitiseni tau teugatupe faafaigaluega-ae o le upu autu lava iinei o le sitiseni,” o lana faaaliga lea i le Palemene. :”Afai tatou te faatagaina lenei mea-o le tatou ioe lava lea i tagata faipisinisi uma mai fafo e teu faafaigaluega a latou tupe i totonu o Samoa (ma o latou aiga) “.Ae peitai, sa teena e Fiame atugaluga o Olo. Fai mai le Tamaitai o loo saunoga le Faipule o Salega i le isi tulafono, o le Tulafono lea Tau Sitiseni Tau Teugatupe Faafaigaluega. Ae peitai- sa finau atu pea Olo

 “O lo’u popolega e faapea afai o le tulafono tau faaofi o Sitiseni Tau Teugatupe Faafaigaluega e mo tagata mai fafo e teu faafaigaluega a latou tupe, o lona uiga-o lenei tulafono tau faaofi latou te avanoa ai foi (mo sitiseni), o lana faaaliga lea. “O le tatala atu o lenei tulafono i le tupulaga lona lua ou te popole ai ona e na o tagata Samoa e aafia ai. E mafai ona ‘ou faapea atu e tatala, aisea a le tatalaina ai? Ae e le na o tagata Samoa ia tatou te talanoa i ai. O lea tatou te talanoa i tagata mai fafo ia o le a avea ma sitiseni e ala ia latou teugatupe faafaigaluega ma mea faapena. 

I le faagasologa o se talanoaga ma le Samoa Observer i fafo ane o le Palemene, sa faailoa mai e Olo e anoano isi mea e faasino i le tulafono tau faaofi i lo mea o loo talanoaina. Na ia faamatalaina e faapea o le Tulafono Toe Teuteu o Sitiseni o se faitoto’a lea i tua e faaaoga e tagata mai fafo ia o loo ulufale mai i le atunuu ma maua o latou sitiseni e ala i le Tulafono o Sitiseni Tau Teugatupe Faafaigaluega.  O le pogai lea latou te le faatagaina ai le tulafono tau faaofi –e le gata ina aofia ai i latou ua i ai le toto Samoa atoatoa poo le 50 pasene o ‘afakasi,” o le faaaliga lea a Olo.. “O le tulaga faigata lena i lenei upu o le sitiseni Samoa. I lalo o le Tulafono o Sitiseni Tau Teugatupe Faafaigaluega, e na o le tagata talosaga ma lona to’alua ma lo la aiga e mafai ona maua sitiseni. 

 “O le taimi lava latou te maua ai sitiseni i lalo o le Tulafono o Teugatupe Faafaigaluega-ona mafai loa lea ona latou faagasolo atu i lenei faitoto’a i tua ma faaaoga le Tulafono o Sitiseni e aumai ai o latou tagata faagasolo i tua ma luma ma le tupulaga lona lua. “O le a o’o mai le taimi o le a ave ai e nei tagata uma mai fafo o tatou eleele., A tupu mai lena mea ma fai latou te nofoia lo tatou atunuu, o le a tatou se’e loa i atumauga e nonofo ai aua e leai ni a tatou tupe e tauva ai ma i latou. O nei tagata o le a latou faatauina o tatou eleele uma ma ave pisinisi. O lo’u popolega lena.” Na ula mai foi Olo e faapea atonu o le fetogia’iga i le va o le Palemia ma lana Minisita muamua o Tupe o Faumuina Liuga-ua aoga foi lea. 

 “Ou te manatu o le mea lenei sa taumafai Faumuina e ta’u atu ia Tuilaepa,” o le faaaliga lea a Olo. 

“Sa na ona faamanatu atu lava e Faumuia ia Tuilaepa e faapea e tatau ona tatou ati a’e Savaii ma tapena o ia e aga’i i ai pe a pulea Apia e tagata Asia ma liua e avea ma latou taulaga itiiti o Asia i totonu o le Pasefika.”

Ina ua toe taliu atu i totonu o le Palemene-sa faaalia foi e le Minisita Lagolago o Fesootaiga ma o le Faipule mo Faleata Sisifo o Lealailepule Rimoni Aiafi-ni ona masaloga e uiga i lea Tulafono Tau Faaofi. Fai mai a ia o le sitiseni o se mea lea e agavaa i ai tagata Samoa uma lava-tusa lava pe o fea o latou nonofo ai. 

 “O soo se tagata lava na fanau mai se tagata Samoa tusa lava mai mai le 1800 poo 1900, o loo ia i latou le aia tatau e avea ai ma sitiseni o Samoa,” o le faaaliga lea a Leala.  

O le faafitauli iinei o lo tatou tuuina atu lea o sitiseni i tagata e le o ni tagata Samoa ma o lenei mataupu e tatau ona toe iloiloina. Afai o loo faapea mai le tulafono tau faaofi e faapea o sitiseni e mo na o tagata Samoa, o se mea lelei lena. O loo i ai la’u mataupu pe a pa’ia sitiseni Samoa ia e tuuina atu i soo se tagata tusa lava pe o i latou o ni Initia, Saina poo se isi lava atunuu e mai ai i totonu o le lalolagi. O lenei mataupu e manomia ona toe faamalamalama ina ia puipuia ai le tulaga mamalu o a tatou sitiseni.

“Sa lagolagoina e Leala atugaluga o Olo e uiga i tagata malaga e le faatagaina e le tulafono. “O lea ou te taifauina se tusitusiga i totonu o le Island Business e uiga ia Saina i totonu o le Pasefika,” o lana faaaliga lea. “Ou te le tete’e i tagata Saina ae o se meaa lea e tatau ona tilotilo i ai, o manatu faaalia e uiga i le lolofi mai o tagata Saina i totonu o le Pasefika ma isi lava tagata malaga e le faatagaina e le tulafono i totonu o lo tatou atunuu.”.Fai mai le Minisita Lagolago e manaomia le toe faaupu ma le faaetete o le tulafono tau faaofi ina ia malu puipuia ai tagata Samoa..Sa ta’ua foi e Leala tagata mai fafo ua nonofo i Samoa nei mo le tele o tausaga ma ua fai o latou sao i lo tatou tamaoaiga-ae le mafai ona latou maua ni sitiseni ona o le taumafaiga taugata lea. Fai mai a ia o le itu foi lenei e tatau ona toe iloiloina.

By Lanuola Tusani Tupufia 29 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>