O LA’U TALA FO’I

123 Hits

1. Ua matauina i Tala Fou se ulutala fai mai-“Ua poloa’iina e le Palemia le faia o se Komisi Su’esu’e faapitoa-e su’esu’eina le faatinoina o galuega a le Faamasinoga o Fanua ma Suafa! O lea foi Komisi Su’esu’e- o le a na fai ai se tonu- pe o faatino e Faamasino le mea e tatau ona latou faia. Fai mai e tatau lava ona fai ma siaki tama’ita’i ma alii faamasino o le Faamasinoga o Fanua ma Suafa.

Afai la e le o faaleleia e le Faamasinoga o Fanua ma Suafa ana mataupu tau lo latou lotoifale-o le tiute la o le Palemene- o le fai lea o se poloaiga e ala i le lalolagoina e le lua o vaetolu o le sui usufono o le Palemene….!

Fai mai la le Palemia e mafai e le Palemene ona tuuina atu se talosaga i le Ao o le Malo ina ia aveese soo se Faamasino e le o faatinoina ma le faamaoni ona tiute……! Ia-o le faamatalaga atoa lena Samoa-ma o le itu ua manino mai-ua popona tele le Palemia i le le faamaoni ma le le amiotonu o isi tagata-ae faapefea o ia ma lana faigamalo?

Aisea ua tuai ai ona fai sana faiga i le faitau miliona ma miliona o tupe a le atunuu ia na maumau i faiga pi’opi’o a lana faigamalo-ma taupulepulega lea a tagata faigaluega o le Malo e faaaoga sese tupe a le atunuu?

O le a la le pogai e inainā ai  i le le faamaoni o isi- ae faapefea o ia ma lana faigamalo? A faate’a la Faamasino ua le faamaoni- ae faapefea le Palemia, Minisita ma lana faigamalo-aemaise ai o le aufaigaluega a le Malo ma taupulepulega na latou faia -lea ua maumau ai le faitau miliona ma miliona o tupe a le atunuu ua maumau?

O le a la le pogai e faatonu ai isi -ae le faatonu muamua e le Palemia –o ia lava? O le a le mea e inainā ai i le le faamaoni o isi -ae faapefea le le faamaoni lea e i lalo tonu lava o lona isu? Afai o le Taitai o le Atunuu-o ia e faia le faata’ita’iga lelei e mulimuli ai le atunuu!

O lona uiga-a faamaoni ma faimea tonu lana ta’ita’iga-e faapena foi le atunuu! O le mea lea e igoa o le tau ‘alalia solo ae pa le no’o! Afai la e moni o i ai ni Faamasino e le o faamaoni- e mafua ona e tiga lava ona le agavaa ae tofi lava! O le a sou taofi?

2. Matauina i Tala Fou se isi foi faalavelave mata’utia tau le fasioti tagata-e pei ona lipotia mai Fale’ula-uta-ma o le tulaga la ua manino mai- o se solitulafono lenei e le toe mafai ona taofia! E mafua ona –e le o se mea lenei e masani ai Samoa o le nofo o le isi Samoa ma fana oti le isi Samoa-ae ua mafua ona faatetele-leaga e leai se mea e tasi o faia i ai-e taofi ai lenei solitulafono.

Na faapefea ona maua e nei tagata ia fana ua tafana ai isi tagata Samoa? O ni fana o laisene- pe o ni fana solitulafono? Afai o le Matagaluega o Leoleo o loo gafa ma lenei matafaioi-o le a se faiga o latou faia ina ia mautinoa ai o nei laau malosi uma o loo laisene ma o loo umia e ni tagata faatuatuaina mo ni faamoemoega talafeagai-ae le o le tafana ai o isi tagata!

Afai la ua tupu so’o lenei mea o le fana e le isi Samoa le isi Samoa-o lona uiga- e tatau ona i ai se mafuaga-ma o lea mafuaga-e faatoa mafai ona maua pe a galulue faatasi le Matagaluega o Leoleo ma le Pule Mamalu a Alii ma Faipule o afioaga ta’itasi! O le a sou taofi? 

3. Matauina foi i Tala Fou fai mai ua teena e se pagota ona moliaga-ma o lea pagota-o Lauititi Tualima. O se tagata faafitauli tele ma e le masino taimi na sola ese ai mai le falepuipui- ma fai isi solitulafono. O lona uiga la-e manino mai o lenei pagota-e fiafia lava ia e fai soligatulafono ina ia faaauau ai pea ona nofo i le falepuipui. Afai la e tofu i tatou uma ma fanau-faamata o le a le pogai o le ma’a’a-tu o le olaga o lenei pagota?

A silasila toto’a i mea na fai e lenei pagota-o le upu moni-ailoga e i ai se isi pagota e tutusa ma lenei lava pagota? Afai la o lea-o lona uiga-ua siliga ona sui e avea ma tagata fou –ma atonu o se mea lea e afua mai le mea na tupu mai ai!

Afai e le o se tamaitiiti sa leaga ona fai-ia atonu o se tamaitiiti ua lafoa’ina e matua ma le aiga! O le fesili la- o ai e tatau ona fesiligia pe a tulai mai ni pefea i le olaga o lenei pagota? O le isi fesili-faamata e mafai ona tuua’ia nisi e ese ai mai matua moni ma lona aiga? Afai la ua lafoa’ina lenei pagota-o le fesili taua lava-‘o le igoa o ai lea o loo ta’u ai? O Satani poo le suafa o le matua? O le a sou taofi?

© Samoa Observer 2016

Developed by Samoa Observer in Apia