“Ia e mata’u i le Atua, ma e’ana’ana i ana poloaiga”

Tusia Petaia Setu ,

378 Hits

Rev. Petaia Setu

Rev. Petaia Setu

O le faavae lea o le olaga o le tagata mai lava i le amataga. Ia iloa e le tagata ona ola. Ola e vivii ma auauna i le Atua ma le fiafia. Auā o lo tatou ola ua faapei o le puao lava ia; o mea uma foi o loo tatou ola ai ma siomia ai lo tatou ola i lalo o le la, e leai lava sona faavavau (3:1-15).

O le manatu laualuga lea o le Failauga ina ua vaai o ia ma mautinoa, e matua   faatauvaa, e matua faatauvaa, e faatauvaa mea uma lava (1:2). Auā foi ua iai le mutaaga o mea uma; e pala mea uma; e galo mea uma; e mavae lava ia, a o le mata’u i le Atua i lalo o le la, e faamălieina i luga atu o le la.

O le anaana i poloaiga a le Atua i lalo nei, e tuusaolotoina i le olioli e faavavau i tua atu o le lalolagi nei. O le aotelega lea o le poto o le Failauga – Ia e mata’u i le Atua, ma e ‘ana’ana (usitai) i ana poloaiga; auā  o mea ia e tatau i tagata uma. 

E le o se Atua taufaamata’u lo tatou Atua. Ae moomia ona tatou mata’u i le Atua mo le lelei ma manuia o tatou uma. E le o se Atua sauā; ae fūa. E ala ai ona fuā, ina ua e ano tele i mea e ‘ai e le matagi i lalo o le la. 

O le mata’u i le Atua, o lou aloaia ma lo’u amanaia lea o le Atua i o tatou olaga. O lou faalogo ma lo’u taliaina lea o lona finagalo moni ma lona finagalo pule i o tatou loto taitoatasi. O le maliega lea o loo mafai ona faailoa mai i foliga paia ma natura mamalu o le Atua ua ia te i tatou taitoatasi. I le, e tautala la le faamaoni ma le amiotonu i o tatou olaga i aso uma, e molimau i le tino mai o lou aloaia ma lo’u amanaia o le Atua; o lou ava ma lo’u mata’u i le Atua na faia oe ma a’u, ma mea uma lava.

O si manulauti lea ua taumafai le Failauga o Solomona e faapupula mai ina ua taugagaifo le la o lona soifua, ma ua ia iloa atu le iuga o mea uma – e faatauvaa.

A talanoaina le poto, le malosi, le tamaoaiga, ma le mamalu mai le Atua, e leai se tasi i luma atu poo tua mai o Solomona. E ui i lea, e le alofia le mau a toeaiina – e leai lava se faiva e ‘asa ma se maumau; e le o se sisi foi ma se sao; e sē lava le aku i ama.

Na i’u faaleiloga le poto o Solomona, auā ua filogia i le valea o fafine o nuu faapaupau. Ua faoa lana tōfā, auā ua faaliliueseina lona loto e ana avā (I Tupu.11:1-8). Ua mou malie ese atu lona mamalu, auā ua le o ni tofi e tumau. Ua mavae atu le malosi, auā e leai se tasi e tu faa mauga. Ua galo atu le feagaiga osi, auā ua le aloaia ma amanaia le Atua moni (I Tupu.11:9-13).

E leai lava se mea i lalo o le la e le i maua e Solomona. E leai foi se mea na faia e le i ola fiafia ma ola saoloto ai le Failauga. Ua ia iloa ua gase mea uma, ma e faatauvaa mea uma lava, o le ‘ai e le matagi mea uma. Ua manatu le Failauga, e le faatusalia le lalolagi ma mea ua tumu ai i Lē na faia ia mea uma. E le mafai ona faamălieina le tagata i mea uma ua i lenei lalolagi, a o le Atua Soifua e toatasi. O le taualuga lea o ona manatu ma lona talitonuga – Ia e mata’u i le Atua, ma e tausi i ana poloaiga. O le finagalo o le Failauga – o tagata uma! Ia mata’u tagata uma i le Atua. Ia anaana tagata uma i poloaiga a le Atua. Auā o mea ia e tatau ona ola ai tagata uma. 

E le mafai ona tatou usita’ia se poloaiga a le Atua pe afai tatou te le amanaia ma le taliaina o ia i o tatou loto.

E le mafai lava ona tatou olaina sona finagalo ona ua faufaulala’i o tatou mana’o.

Le au uso e, o a ni foliga o le Atua o ia te oe? Ae e te talitonu, o iai se vaega itiiti o foliga o le Atua o ia te oe? Afai o iai, o le a le lagisoifua o le faamaoni, o le iai?

Silasila foi outou, o le mata’u i le Atua, o le inoino lea i le leaga (Fai.8:13) A o le inoino i le leaga, e iloa ai le tagata poto (9:10).

O lona uiga, e matua inoino lava le Atua i le amio leaga. A o le amioleaga, o lou manao lea e faafiafia i tagata, ae le o le Atua. O lou taumafai lea e faamalie le manao leaga o le tiapolo, ae tuu le finagalo faaola o le Faaola. Fai mai Tavita, “Auā o oe, e te le se Atua e fiafia i le amioleaga….Ua e inoino ia I latou uma o e fai amio leaga….E fano ia te oe o e tala pepelo; e matua inosia e Ieova le tagata ua toto lima ma le tau’ole’ole (Sal.5:4-7).”

Se a se isi failoga e faailoa atu ai lou mata’u i le Atua, e ese mai i le tautala i le faamaoni, ma faailoa i luma le amiotonu ua finagalo ai le Atua?

’A ua iai ea se isi poloaiga e sili atu i lo lenei: “Ia e alofa atu i le Alii lou Atua ma lou loto atoa, ma lou manatu atoa, ma lou agaga atoa. O le poloaiga muamua lena ma le sili. E faapena foi lona lua, “E te alofa atu i le lua te tuaoi (tagata ma’i, tagata mativa, tagata fia maua se fesoasoani), ia pei o oe lava ia te oe (Mat.22:37-39).”

O le finagalo tuu sa’o lea o le Atua i tagata uma. Afai la o ’e faasaga ese ai, ua le o ia te oe la foliga o le Atua. E te le mata’u lava foi la i le Atua na faia oe!

Samoa e, ‘aua e te manumanu i ou tofiga; ‘aua e te manatu i lou taualoa; a ia manatu i lou faatauvaa.

 Ioe, e faatauvaa tatou uma.

E le i manatu Iesu o ia o se tupu, 

Ae na lafoai lona ola ina ia e le ola faanununu

E le i manatu maualuga lava, o ia se Alo o le Atua, 

A ua manatu faatauvaa o ia ia te ia lava ina ia togiolaina ai tā’ua.

Sole, Suga, ia e mata’u i le Atua, ma tausisi i lona faamaoni ma lana amiotonu. Auā e faamasinoina e le Atua mea lilo uma lava.

Amene

E-mail: petaiasetu@gmail.com

7737063/7783782

© Samoa Observer 2016

Developed by Samoa Observer in Apia