O LA’U TALA FO’I

30 May 2016, 12:00AM

1.Matauina i Tala Fou fai mai ua falepuipui ni alii talavou se to’alua o Barry Mafi ma Ashley Wilson mo le fa tausaga-ona ua la ioe i se moliaga o le faao’o o ni manu’a tugā i se tasi.

O lea la mataupu sa fofogaina i luma o le Faamasino Sili-Lana Afioga Patu Tiava’asu’e Falefatu Sapolu-i le Faamasinoga Sili. O lea la mataupu e faasino i le fasiga o se tamaititi a’oga mai Fiti i le aso 6 o Fepuari 2016.

E tusa ai la ma le molimau a Leoleo-o lea alii Fiti na o atu ma ana uo i le R.S.A.i le po na tupu ai le faalavelave-e tafafao. O le taimi na sau i fafo lea alii Fiti-o le taimi lea na tau upu ai lea alii Fiti ma alii e to’alua ia ua faasalaina nei-ma tu’i ai loa le gutu o le alii Fiti.

Sa toe foi i totonu o le R.S.A. lea alii Fiti-ma o se taimi o le vaeluaga o le po- na o mai i fafo lea alii Fiti ma ana uo- ma savalivali solo ai- o le a toe fo’i i le mea na o atu ai. O le taimi lea na toe osofa’ia ai e Wilson ma Mafai ma latou uo ia alii, Na sosola ese uo a lea alii Fiti ae maua ai na o ia i lea faalavelave.

E le’i faavaivai i la’ua ia ua falepuipui nei- i le fasiga o lea tama Fiti-se’ia o’o lava ina matapogia. Ia –o se tala umi lenei tala-ae o le itu ua manino mai-o le aia fua o nisi i tagata sa tafafao fiafia i le RSA.

E leai se mafuaga e o ai fua e faalavelave i tagata sa tafafao-ae ona o le malosi o le mitamita vale o tupulaga talavou i nei aso- ae le o e nonofo lelei i o latou aiga! Ia manatua foi-afai ua onā se tagata sa tafao i se kalapu-e leai se latou fe’au e o ai fua e tuu o latou isu i pisinisi a isi! Ia o lea la ua falepuipui!

O le a le pogai? O le fia malosi ma le fia pule-ae le o la’ua o ni pule o le Taulaga o Apia! Afai la ua falepuipui-talosia ia maua ai se aoaoga-ona o ane lea e nonofo faalelei i o latou aiga i le po-ae le o le feoa’i solo ma faatupu faalavelave! O le a sou taofi? 

2.Matauina i Tala Fou fai mai o loo avanoa pea le Fale o le Faalapotopotoga o Eleele a Samoa i Tuana’imato ! O lona uiga- e leai se isi o faaaogaina-leai foi se isi e fia faatauina…! A tatou tilotilo la i lea fale-e mafai ona faapea o le fale aupito i logologoā, taugatā ma lauiloa i Samoa atoa…!

Aisea? E ala ona logologoa ona e faitau miliona ma mililona tupe a le atunuu na alu ai-e le aofia ai ma faiga pi’opi’o na fai i le taimi na fausia ai lea fale.

E le tau faamatalaina la le tala faasolopito o lea fale-leaga ua uma ona faaalia manino e le Pule ma Su’etusi Sili-toe faamaonia atili e le Komiti a Alii Ofisa o le Palemene-ae leai se mea e tasi o faia e le faigamalo- i ia faiga pi’opi’o-aua o lea lava sa matua aafia ai.

A silasila lelei la i lea fale-talosia ua uma ona fai lona lifi-lea foi e matua maoa’e lava le tau na fai ai. O lona uiga la- e manaia pe a tuu ai pea e faatu ai faapea-e avea ma ma’a faamanatu o le faitau miliona ma miliona o tupe a le atunuu na maumau ai- e gasolo mai tupulaga o lalovaoa o Samoa e tilotilo lelei i ai-ina ia latou iloa tino ai i latou tonu-na taulamua i faiga pi’opi’o i le taimi na fausia ai lea fale!

O le a sou taofi?

3. Matauina foi i Tala Fou le faateleina pea o faalavelave tau taavale i le alatele i aso uma-ma ua tulai mai ai pea le fesili-pe faamata ua lava taavale a Samoa i le taimi nei pe leai.

O le upu moni- ua le gata ina faateleina pea le aofai o taavale i totonu o Samoa-ae ua faapea foi ona faateleina ai ma faalavelave tutupu-ona o le mea moni- o le toatele o avetaavale o le tupulaga talavou-ae le gata i lea-o le fesili masani lava pe ua fai ni laisene o nei avetaavale?

Afai foi ua fai ni o latou laisene-o le isi fesili-na fai se su’ega mo i latou e tusa ai ma le tulafono tau auala ma le saoasaoa faatulagaina-faatasi ai ma le tele o isi mana’oga taua e tatau ona iloa e soo se avetaavale!

Afai la ua fai na o laisene ae lei ni a latou suega na faia-e le tioa la a tutupu so’o nei faalavelave! O atunuu uma o le lalolagi nei-o soo se avetaavale-e tatau ona aoaoina lelei i tulafono tau feoaiga i ala tetele.

E tatau ona matua suesueina i latou e ala i su’ega e faatino-ona faatoa mafai lea ona maua o latou laisene avetaavale-ae le o le iloa loa avetaavale- ona tuu loa lea i ai ma le laisene avetaavale-ae na te le ilafia se tulafono tau feoaiga i ala tetele! E pogai la ona faataua lea tulaga e atunuu uma-ona o le maualuga o le faataua e tatau ona tuuina atu i soifua o tagata! O le a la sou taofi?

4. Matauina ma le fiafia i Tala Fou le faaleleiga a le Ao Mamalu o le Malo ma lona nuu o Lufilufi! O lea la faaleleiga fai mai ua fai sina leva  o taatia se mataupu na mafua ai lea faaletonu! O le itu la e faafetaia ai lea faaleleiga-ona o le Tama a Lufilufi lea o loo avea ma Ao o le Malo-ma ona o lea tulaga-e le tatau ai ona tala le va o le Nofo ma lona nuu!

Ae ia manatua foi-o le lalolagi lenei tatou te nonofo ai-ma o le upu moni fai mai e pa’ῡ faatolu le amiotonu i le aso! Ma afai la o lea-ailoga la e i ai se tasi e leai sona faaletonu? A toe faaupu-e i ai lava e tasi e mafai ona faapena mai o “a’u nei e mamā….Ae o le mea sili-o a faaletonu o fatia ua alu-faafetafea na faaletonu i nuu e lē ainā! O le a sou taofi?

30 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>