O LE LEAGA O LE FAATAUTALA

30 May 2016, 12:00AM

Tatou te faafetaia pea le alofa ma le agalelei o le Atua ia Samoa ma i tatou uma-ona o lenei ua tatou aulia manuia mai foi le amataga o lenei  vaiaso fou i le manuia.

E talitonu foi le faamoemoe-e le’i ‘asa lena vaiaso ua mavae atu ma faafitauli i lo outou soifua ma so matou ola-e le gata i faalavelave tutupu faafuase’i-ae o le maliu ma le oti ua motusia ai mafutaga pele ma matua-uso ma tuafafine-aemaise ai o le fanau pele.

Ae ui o lea-ua tatau ona tatou talitonu uma- ‘o le tele o tatou tiga ma le faanoanoa’-o le tele foi lena o le alofa ma le agalelei o le Atua-e faamafanafanaina ai i tatou! Ia ia te Ia pea le viiga ma le faaneetaga e o’o i le faavavau.

Ae alo maia-o le tatou talanoaga masani foi lenei-ma e i ai lo’u talitonuga-o loo manino ma malamalama lelei! Ia-o lena ua i luga le tatou ulutala-ma e faamanatu atu pea-o lenei tusitusiga-e le o se tau faaleaga-e le o tala ua fatu fua poo se faaoloataua-ae o le fia faailoa atu o le tulaga tonu o loo i ai lo tatou atunuu i le taimi nei-aemaise ai o faafitauli ua tulai mai ai.

O lo’u lava manatu- e lelei ona tatou talanoa i le upu “faatautala”. Ua ‘ou filifilia lenei upu-ona o lea upu- e mafai ona faapea-o le pogai lea o le mapuitiga o le atunuu. Aua ana leai le faatautala-e le nofo pologa Samoa e pei ona tatou iloa i le taimi nei.

O le upu la “faatautala”-a tuu i le gagana Samoa-‘o se veape!. Ma e pei lava ona tatou iloa-o le veape-o se vaega lea o le kalama na te faatinoina se mea. A toe faamalamalama atili-o le veape-o le vaega lea o le kalama na te faia le gaoioiga.

Mo se faata’ita’iga-“O loo tamo’e le tama.” A fesili la poo le a le mea a le tama o loo fai-o le tali-o loo tamo’e. O le “tamo’e” la-o le veape-leaga o le gaoioiga lea o loo fai e le tama-o le tamo’e. A faatu la se isi fuaiupu e pei: “Ua ututaia i matou i lona faatautala”-o le ‘ututaia’ o le  veape-aua o le mea lena na tupu i tagata-talu ai le “fou faatautala.”

O le uiga o le upu “faatautala” o le faaaoga sese o se mea a le isi tagata. O le ala lea e fiafia ai lo’u gutu e tautala i lenei lava upu-talu ai-o le mea tonu lava lenei o loo tupu nei ia Samoa-ma ua avea ma ‘mala tupu-i-fale’.

Ua ‘ou fai atu o le ‘mala-tupu-i-fale’-leaga e tua le faatautala i le faalumaina.Ae o le mea e sili ona leaga-e le tua le faalumaina i tagata na faia le faatautala-ae tua i tagata e ona mea ia-na fai ai le faatautala.

O le upu la lenei o le ‘faatautala’ –a’o tusia le tulafono a le Malo o Roma-sa ‘ilitata tele i ai tagata o Roma, ma o le ala le na matua faamalosia ai i totonu o ana tulafono-le aiaiga e faapea-‘o soo se ta’ita’i e tula’i mai-“ia ona tausia meatotino a tagata uma-ia pei lava o ana mea.

“Ia li’oli’o ma faapelepele i ai.” O lona uiga-a oti ai le ta’ita’i i le puipuiga o meatotino a ona tagata-“o le oti lena e faataatia i luga o le talita-ma fefataa’i solo i aai ma faoa-aai”-ae tauosi le lagi e tagatanuu uma.

O le pogai lena o le fai mai o le tulafono a Roma-‘o le sala o le faatautala o le ‘Sali ese o le mata-sali ese le ao  pe a faatautala-leaga o le faatautala-e leai se tagata Roma e fiafia i ai. Ae a la le faatautala lea ua i ai nei Samoa?

Faamata ana soifua mai nei le Tupu o Tavita-faamata e toe sui se fuaitau o lana Salamo….”pe ou te alu a’e i le Lagi, pe alu i Seoli, pe ou te lele atu i tulimanu o le lalolagi-faauta-“e te i ai lava? Aisea?

A su’e atu i auala, o lale e tu mai ai le Minisita, a su’e atu i le eletise-o la e tu mai ai le Minisita, su’e atu i Falepasi-o le la e tu mai ai le Minisita-su’e atu i le Lotto-o lale e tu mai ai; su’e atu i le papovi-o lale foi e tu mai ai; su’e atu i le fale falaoa-o lale foi e tu mai ai; su’e atu I le pamu penisini, o lale foi e tu mai ai; su’e atu i lea mea ma lea mea-o lale foi e sasa’o mai ai!

A faapefea la tatou Samoa? O lea la ua tatou o’o tonu lava i le mea lea na fai mai ai Leilua Pilia’e! O le a? “O lea ua ‘u’u le ua, ‘u’u le oga-manava, toe ‘u’u vae-ae o le a le mea lea o le a ‘u’u nei e tatou Samoa? E te silafia Samoa e fia ni au meatotino o totoe?

Ia ‘aua ne’i galo-ua uma ona faatau atu sea o le Faletupe o Samoa i Sisifo-ae le’i logoina tatou. Sa fuafua foi le faatauina atu o le Falepia o le Vailima; sa i ai foi ma le fuafuaga e faatau atu le Faleoloa o Mea Tau Faatoaga; ua uma ona aveese le Vaega o le Falemeli sa teu ai tupe-atoa ma le isi anoano o fuafuaga ua uma ona fai- ae le logoina lava le atunuu.

O le a la le igoa o lena mea? O LE FAATAUTALA-ae le o aafia ai le faitau miliona ma miliona o tupe a le atunuu ua maumau i faiga pi’opi’o a le faigamalo! Ae o le mea e sili ona leaga-e le o muta ai iina le tu’inanau o le faatautala-leaga e pei ona fai atu-“A matua le faatautala-ona fanau mai ai lea o le “maasiasi ma le faalumaina”.

Ae ia manatua-e le masiasi ma faalumaina ai le tagata faatautala-ae masiasi ai le atunuu! Aisea? Aua afai e fai mai le Malo-o tupe nei e fau ai fale tetele ma taligalu ma le tele o galuega tetele-‘o tupe faa-meaalofa mai Saina-ae emo ane le ata o ni faaunegatupe e toe totogi-o le a la le mea o le a o’o i ai Samoa?

O le tali-o lou atalii ma le atalii o lou atalii faatasi ai ma tupulaga e tolu ma le fa a Samoa-latou te totogiina nei mea uma. E faapefea la pe a le mafai ona totogi? O le ‘afu o tatou-e pule ai Saina ma atunuu uma na aumai ai nei tupe-o loo fai ai le faatautala.

A o’o la ina tupu se mea faapena, ona tatou o’o loa lea i le maasiasi ma le faalumaina. O lona uiga-‘ua maumau le toto o tatou matua na saili ai le malo sa’oloto o Samoa.

30 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>