To’ai manuia i fanua To’aletai David Tua

By Vatapuia Maiava 29 April 2016, 12:00AM

Ua to’ai i fanua se tasi o tama-fanau iloga a Samoa i fusu’aga, le Susuga a To’aletai David Tua.

Na taunu’u i le Malae Va’alele i Faleolo le va’alele i le 1.15 i le aoauli ananafi ae na fa’atoa ulufafo mai To’aletai ua ‘afa le lua.

Na vave lava ona aga’i-‘ese le sa na fa’atalia o ia ma fa’anatinati atu ai loa mo le koneseti a Annie Grace i le afio’aga o Nu’usuatia, na leai ai se avanoa e feiloa’i ai i nisi o lona aiga ma le nu’u, o Faleatiu. 

Talu ai sa le-‘auai i le polokalame sa fuafua e fa’atasi ai ma Annie Grace i le To’ese i Tafa’igata, na manatu ai e tatau ona fa’amalie nisi vaega sa le-‘auai, ona sa misia lana va’a i le po o le Aso Lulu.

Ae aisea ua mafua ai ona toe malaga mai i lona atunu’u?

O To’aletai o le a avea o se tasi o le koneseti a Annie Grace i le po o le Aso To’ona’i, lea o le a fa’aaogaina ai le tala’aga o mea sa tutupu ia te ia, a’o ta’afifili ma lagona o le le-mautonu, o fa’aosoosoga le-manuia ma isi lava fa’afitauli sa la feagai ma le fa’amoemoe, e aoga se fe’au o ia vaega mo tagata Samoa. 

Ae le uma ai pea le agaga o le fia fo’i mai i le fa’asinomaga ma le tupu’aga, o Samoa.

“E tumau pea le lagona fiafia e le mafai lava ona ‘ave’esea, le o’o mai i le atunu’u moni, e avea ai o se tasi o vaega mo lenei fa’amoemoe lelei e ta’ita’ia e le tama’ita’i logoloa o Annie Grace ma le to’atele o le Vaega,” o lana fa’aaliga pu’upu’u lava lea i le Samoa Observer a’o le’i fa’anatinati atu mo Safata. 

 “Na talosaga mai fo’i ‘ou te sau e fai sa’u tala i lagona fo’i na o’o ia a’u ma mafaufau e tau-pule i le ola, ae moni ai, o se fa’amanuiaga moni lava sa fesoasoani i taimi sa ‘ou mo’omia ai fo’i. 

E leai se isi tala, na o le manatu alofa lava mo Samoa.” 

E leai ma ni fa’ailoga po’o ni va’aiga, vagana le fiafia o To’aletai a’o fa’amatala le misia o lana va’alele. 

“Na le-mafai ona taunu’u anapo (po o le Aso Lulu) ae le-afaina, o lea ua i’inei ma e taulia a lena.”

E amata le koneseti a Annie Grace i le afa o le ono i le afiafi o le Aso To’ona’i, i lumā-maota o le Malo.

By Vatapuia Maiava 29 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>