Ua tu’umalo lē sa avea muamua ma Fofoga Fetalai o le Palemene- o Leota

By Ilia L. Likou 29 April 2016, 12:00AM

O se tamalii sa avea muamua ma Sui Usufono o le Palemene ma sa avea foi ma Fofoga Fetalai o le Maota-o Leota Leulua’ialii Itu’au Ale, na tuumalo ananafi. Na tuumalo o ia i le Maota Gasegase o Tupua Tamasese Meaole ona o se gasegase faafuase’i.

O le matua o lona soifua ua 75 tausaga.. O le tuumalo o Leota na faamaonia e se tasi o lona aiga, o Ale Vena Ale.

Sa le fia talanoaina e Ale le mafuaga o le tuumalo o lea alii vagana ai lona faamaonia e faapea na tuuina atu Leota i le Falema’i i le po o le Aso Sa.

O le isi tagata o le aiga lea na talanoa ane i le Samoa Observer-ae ia ‘aua ne’i faailoaina lona suafa-fai mai o le tuumalo o Leota ua matua faate’ia ai lava i latou. “Sa matua malosi o ia,” o le faaliga lea a lea tamaitai.

“E le’i faa-ta’otolia i se gasegase poo se isi lava mea faapena. Sa matua fiafia lava o ia ona ua uma ona ia toe faalelei ma Solosolo. “Sa faanoanoa o ia –talu ai ona sa tauva mo le faiga-palota ae ua le faamanuiaina-ae na te le’i faaalia lava soo se uiga e faapea o le a tupu se mea faapenei.”

I le amataga o le masina, sa toe faalelei Leota ma Solosolo ina ua mavae se tapu o le olaga atoa na tuuina atu ia te ia ma ua toe fiafia ai le aiga..Ua leva ona soloa i le ‘au-fuefue  mo le olaga atoa Leota e le fono a le nuu ae na maua le maliega ‘autasi e toe faauiese ai lea tapu.

O se eseesega i le va o Leota ma isi i totonu o le nuu na mafua ai ona susunu lona maota talimalo i le 2012 faatasi ai ma taavale a lona aiga ma fale na matua faatama’ia ai.

E lua ni poloaiga eseese mai le Faamasinoga o Fanua ma Suaga mo le nuu ina ia faamuta le tapu ae sa le mafai ona faatinoina  e o’o mai lava ia Mati talu ai nei. Fai mai se matai o le afioaga o le suiga o le finagalo na taunuu ai i se faaleleiga ma le fefaamagaloa’i i le va o itu e lua ina ia faaalia ai le agaga moni o le Eseta.

Na avea Leota ma Sui Usufono o le Palemene i le 1970. O le 1976 i le 1978, na avea ai o ia ma Fofoga Fetalai o le Palemene- e sili ona la’ititi. O le faiga-palota lautele talu ai nei na vaaia ai fo’i Leota o tauva mo le nofoa o Anoamaa Sisifo, lea sa tauva ai ma le Sui Palemia i lena taimi-o Fonotoe Pierre Lauoafo.

By Ilia L. Likou 29 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>