Tatala avanoa mo le Kuota

Tusia Ilia L Likou ,

98 Hits

Ua tatala aloaia ai avanoa mo le lesitalaina o suafa o i latou uma o loo fuafua e fia saili ni avanoa mo le se‘i e pei ona masani ai, poo le Kuota lea e faia i tausaga uma, mo Samoa ma isi foi atumotu ua filifilia o le Pasefika.

E pei ona silafia ai e  toe tapunia lenei avanoa i le aso 29 Iuni i Samoa ae fa’atoa fa’ailoa i le aso 7 o Iulai i latou ua fa’amanuiaina.

O atunuu o le Pasefika o loo aofia i lenei fuafuaga, e iai Samoa, Toga,Fiti,  Tuvalu ma Kilipati. O le polokalame lava lenei a le Matagaluega o Femagalaiga a Niu Sila lea e talosaga ai tagata mai nei atunuu o le Pasefika, mo ni avanoa e faamaonia ai lo latou nofomau i Niu Sila, i lalo o le polokalame o le 2011 Samoa Quota (SQ) ma le Pacific Access Category (PAC).

E pei ona silafia, o le Kuota a Samoa o loo faatagaina ai le aofaiga e 1100 tagatānuu Samoa e mafai ona talosaga mo avanoa nofomau, e oo atu i le 75 tagatānuu Kilipati, 75 tagatānuu Tuvalu, ma le 250 o tagatānuu Toga ma Fiti.

O se fuafuaga e faagasolo i tausaga taitasi i le va o Niu Sila ma nei motu o le Pasefika. O aiaiga o lenei avanoa, e tatau i le tagata o loo autū i le talosaga, ona iai sana galuega ua maua ma faamaonia o le a faigaluega ai, mai se falefaigaluega i Niu Sila.

O nei polokalame o se faailoaga lea o le sootaga vavalalata ma le faapitoa i le va o Niu Sila ma Samoa, faapea foi isi atunuu ia o le Pasefika.

Ae lei lafoina le talosaga e  manaomia foi ona faamautinoa ua lelei ona faatumu na pepa taloasga.

O loo faamanatu mai foi le tatau ona faamautinoa e le tagata o loo faia le talosaga, ia tusi uma i lalo igoa o tagata taitoatasi o lona aiga totino lea o loo fuafua e tatau ona latou malaga faatasi, ina ia faafigofie mea uma a o faagasolo galuegafai a le ofisa mo a latou talosaga.

O i latou sa lei faamanuiaina i isi se‘i i tausaga ua mavae, e mafai foi ona toe taumafai mai i le se‘i o lenei tausaga, ae moomia lava ona toe faia se isi talosaga fou.

© Samoa Observer 2016

Developed by Samoa Observer in Apia