Talosagaina se eletise mo lona aiga

Tusia Fetalai Tuilulu’u ma Aruna Lolani ,

78 Hits

Ia fa’aolaina mai le eletise fa’amolemole: Siaosi Tuamahalo of Solosolo.

Ia fa’aolaina mai le eletise fa’amolemole: Siaosi Tuamahalo of Solosolo. (Photo: Fetalai Tuilulu’u )

O le eletise e mana’omia i totonu o o tatou maota fa’apena fo’i pisinisi ina ia gasolo lelei fuafuaga e fai. O le eletise ua tele lona aoga mo tagata uma. 

Sa maua le fa’atalatalanoaga a le Fofoga o Samoa ma se tama mai Solosolo e 31 le matua o lona soifua, e igoa ia Siaosi Tuamahalo ma o lona manatu fo’i lea sa fa’aalia. 

Sa ta’ua e Siaosi o lona aiga e fa’aaoga ina moli uila i taimi e goto ai le la ae gasolo atu i le pogisa. 

Sa ia fa’apea mai fo’i e tele a itu e le tu lelei ai lona aiga ae o lo’o taumafai pea i aso uma. 

E fa’amoemoeina e ia le ma’umaga mo mea’ai ma e fa’afetai fo’i i lona malosi o lo’o maua aua le tausiga o lona aiga.

“O le tulaga o le vai, ia o lo’o lelei lava ae peita’i e le’o lelei le matou eletise,” o lana tala lea i le Fofoga o Samoa. 

 “Ua tasi nei le tausaga e le’o iai se tulaga lelei le matou eletise ma o se itu lena o lo’o mamafa i lo’u aiga. 

 “Ou te le gafatia ona totogi se eletise aua e le lava se tupe. 

“E to’afa la’u fanau o lo’o a’ooga nei ma e fai fo’i saogatupe a le nu’u fa’apea fo’i le lotu. 

O lo’o mafatia le aiga o Siaosi i nei itu. 

“O lo’u tiute fa’atama o le taumafai lea ia lelei le aiga mai la’u tausiga ao o le tupe e le’o se mea e faigofie ona maua. O se mafatiaga ma o se fa’afitauli fo’i lena itu. 

“E mo’i a e maua a matou tupe mai le fa’atauina atu o le talo ma le fa’i i le maketi ae e le lava ai se fa’asoa.  

E ui lava ina itiiti se seleni e maua e Siaosi ma lona to’alua ae e maua lava le lagona fesoasoani mai le la’ua aiga ma o se mafua’aga fo’i na e fa’afetai ai o ia. 

“E le’o matou o ni tagata e u’u ini ‘oa,” sa ia fa’apea mai.

 “E leai fo’i se matou eletise. Matou te tua i le ma’umaga aua a matou mea’ai.

“Ae o le itu ou te lagona ai le fa’anoanoa, aua e tausi la’u fanau ae e fa’apefea ona ou fesoasoani atu ai i isi itu pea leai se eletise?”

 “E le’o fa’apea o mea uma matou te mana’omia, na’o le eletise lava. 

 E faigata lava le olaga o Siaosi ae e taumafai lava o ia e maua le fiafia.  

“O lo’u nei fo’i tagata, ou te le fia fa’amoemoe i isi e tausi mai lo’u aiga, ma o le mafua’aga na o lo’o ou tauivi malosi ai ia lelei lo’u aiga. 

 “O le mafua’aga fo’i lena o le tele o a matou mea’ai e aumai le si’osi’omaga po’o le ma’umaga fo’i, aua o se galuega lena e fesoasoani ai le tausiga o le aiga. 

Samoa, a e fia fesoasoani ia Siaosi ma lona aiga, vili o ia i le numera 7733176. 

© Samoa Observer 2016

Developed by Samoa Observer in Apia