Iva tausaga fa’atoa toe fo’i i le aiga

Tusia Maiava ,

279 Hits

TOE O’O I FANUA MA ‘ELE’ELE : O lo’o tau-silasila le toe’aina o Unasa i lona fale ma le fanua talu ona fa’ate’a i le iva tausaga ua mavae.

TOE O’O I FANUA MA ‘ELE’ELE : O lo’o tau-silasila le toe’aina o Unasa i lona fale ma le fanua talu ona fa’ate’a i le iva tausaga ua mavae.

Ua toe taliu atu nei Unasa Farani Vili O’Brien ma lona aiga i le afio’aga o Fale’ula, talu ona fa’ate’a-‘ese mai le nu’u i le iva tausaga talu ai.

“Ui lava ina tele a matou mea-totino ua leai…o totoga o ta’avale, o fa’amalama ma isi mea-fale ma le tele lava o mea sa iai ina ua matou o-‘ese, ae “tu’u ia i Luga”.

“Ioe, o lea o le a toe taumafai e fa’amaopopo mea uma ma aga’i loa e atina’e le aiga e pei ona sa iai muamua.” 

Na ta’ua e Unasa, na alia’e muamua lava lenei ‘ese’esega i le va o Ali’i ma Faipule o Fale’ula ma lona aiga.

“Na ‘ave lea o le mata’upu i le fa’amasinoga i le 2008 ina ua tonu i le pulega a ali’i ma faipule, e fa’ate’a lo matou aiga ona e le fiafia ia a’u ma a’u amioga-fai.

Na talia e le Fa’amasinoa o Fanua ma Suafa i lena taimi, le fa’ai’uga a le nu’u.

“Sa latou tu’ua’ia a’u i lo’u fa’ao’o-lima i isi tagata o le nu’u ma ‘ave le upega a le nu’u ae le se upega a Fale’ula, o le meatotino a le nu’u o Tuana’i,” o le fa’aaliga lea a Unasa. 

 “Sa latou tu’ua’ia fo’i lo’u to’alua ona o le fa’atupu-vevesi i le Komiti a Tina ma Tama’ita’i, ma fai mai na gaoia e la’u fanau mea mai le faletua o le fa’afe’au.

“Ua ‘umi tausaga o matou finau e fia fo’i mai, pau le mea matou te manana’o ai o le nofo-filemu. Na ta’ua fo’i e le faletua o Anasatgasia O’Brien, sa le-fiafia lava i fa’ai’uga a le fa’amasino peita’i sa latou talia pea.

“Ae maise lava, o fanua umia-sa’oloto lea matou te nonofo ai, e le ni fanua fa’aleAganu’u ma e leai se aia a’o se pule iai a le fono a le nu’u,” o le fa’aaliga lea a le faletua. 

 

 “O le taimi atoa lava lea na fa’ate’a ai matou, e matua tele tele tupe na totogi ai se fale na matou nonofo ai ma le ma fanau, e matua taugata lava.”

Ile 2013, na talosaga ai e le aiga lea, le toe iloiloina o le fa’ai’uga a le Fa’amasinoga, peita’i, e le’i manuia.

Peita’i le masina nei, na fa’afiafiaina ai.

E le gata ua toe taliu ni i lo latou fanua, a ua latou maua fo’i se fa’amalamalamaga o le muta’aga o le pule a le Fono a le nu’u. 

Na fa’afetaia e Unasa ma lona aiga, le fa’ai’uga a le fa’amasinoga, ua fa’amalamalamaina ai le mata’upu.

O se vaega o lea fa’ai’uga e fa’apea: “O le pule a ali’i ma faipule o so’o se nu’u, e le aofia ai: So’o se tasi e le o se mata o le nu’u ae o lo’o nofomau i le nu’u, i se fanua umia-sa’oloto pe o se ‘ele’ele-lisi ma e le ‘auai i tu ma aga masania o lea nu’u e fa’atino ai se tautua i se matai o lea nu’u.” 

Na fa’amaonia fo’i e le fa’amasinoga, o le fanua o lo’o nonofo ai Unasa ma lona aiga, o se fanua umia-sa’oloto. 

 

© Samoa Observer 2016

Developed by Samoa Observer in Apia