Silia i le tausaga e le’i maua lava pagota sosola
O lo’o ta’afifili pea le Matagaluega o Leoleo ma le ‘Au’aunaga O Falepuipui ma le Ola Toe Fuata’ina ma le tau-sa’ilia o pagota na sosola-‘ese lava mai le falepuipui i le amataga o le tausaga ua mavae.
O i la’ua ia o Valufitu Fiu Uolilo ma Pati Chong Nee.
O Valufitu e fa’apea na tu’ua le atunu’u mo Ausetalia ma o lo’o taumafai pea leoleo e sa’ili po’o gafea o lafilafi solo ai.
Na ta’ua e le so’o-‘upu o le Falepuipui, o Sagaga Galu Frost e fa’apea, ua leva ona tu’uina atu le mata’upu lea a Valufitu, i le Matagaluega o Leoleo mo su’esu’ega.
Peita’i e le’i maua mai lava se fa’amatalaga lata mai Leoleo e uiga i lenei mata’upu.
Na fa’amaonia mai fo’i e Sagaga le mataupu ia Pati Chong Nee, e le o iloa lava po’o le oga-lalolagi o eva ane ai le pagota lea.
E le’i maua lava le nofoaga tonu o lo’o iai, e ui o lo’o su’esu’ea pea e leoleo.
O le pagota o Valufitu, e lua tausaga o lo’o fa’afalepuipui ai ona o le fa’ao’olima ma le umia o ni ‘aupega mata’utia.
Na saunoa le ofisa mo fa’asalalauga a Leoleo, o Maotaoali’i Kaioneta Kitiona e fa’apea, latou te le’i maua lava se tala mai Ausetalia, i le oga-lalolagi ua o’o iai le pagota mai Savai’i.