Maua e Vaega-su’esu’e se fa’amata’u fou i le alamanuia o le taro i Hawaii

Tusia Maiava ,

186 Hits

Na matua fa’ate’ia le ‘au-galulue i le nofoaga o su’esu’ega a le Iunivesete o Hawaii i Waimanalo, ona o le vave o le sosolo ma le pepesi o le fa’ama’i.

Na fa’ailoa e le vaega-su’esu’e i le Kolisi Fa’aFa’ato’aga, na pei o le pepesi o se fa’ama’i o le flu le vave o le afaina o fa’ato’aga-taro a le Iunivesete.

“’Ou te manatu o le mafuaga o le tele o lenei fa’aletonu, ona e le’i maua muamua ai la’au nei i lea fa’ama’i, e fou,” o le fa’aaliga lea a Michael Melzer, le ali’i su’esu’e o le Iunivesete o Hawaii.

E talitonu latou nei, o le fa’ama’i lea e sosolo i totoga-ola o le lau-talo, sa fa’apea o le isi ituaiga fa’ama’i e fa’ale-malosi tele, lea e ta’ua o le Dasheen Mosaic virus

O le fa’alavelave o le fa’ama’i fou lea, e matua pe ai lava le taro, e fa’aitiitia ai le lautalo mo lu’au ma taro mo poi.

“E ta’u mai lava e le fa’ama’i le mea e sau ai. O totonu o lau o taro. E poloka atoa vaega-ola o lau ma lanu-sasama atoa ai ma afaina loa,” o le fa’amatalaga lea a Melzer.

E le’i leva tele ona tonu i saienitisi a le Kolisi Fa’aFa’ato’aga, o se fa’afitauli lea e ao ona matua silasila toto’a iai. 

 “Na matou iloa lelei le saoasaoa tele o le sosolo a le fa’ama’i i isi motu, e aofia ai Kauai, Maui, Molokai ma le Motu tele.  E le o iloa i le taimi nei, po ua o’o i Lanai. Ae i le matou su’esu’ega na faia i Oahu, matou te le’i maua iai le fa’ama’i a’o lea ua o’o mai ma sosolo vave na’ua,” o le fa’aaliga lea a Melzer.

E silia i le 70 ituaiga-taro ‘ese’ese o lo’o totoina i lenei fa’ato’aga.

“O taro nei sa totoina pe ua tolu nei masina a’o lea ua va’aia fa’ailoga o le fa’ama’i lea,” o le fa’aaliga lea e Melzer. 

E le o matua iloa lelei le mafuaga o lea fa’ama’i. Ae o lo’o masalomia manu-nini’i pei ni afiti, po’o tagata fo’i o lo’o faia lava ma le le-iloa le fa’asalalauina o le fa’ama’i. 

“E le o iloa fo’i po’o le a iniseti po’o se manu o lo’o fe’avea’ia siama e mafua ai. E fa’aleai ni fa’amatalaga e uiga i lea fa’ama’i ua iai i le taimi nei. Vaga le itu i sauté o le Pasefika. A’o i’inei, e le o iloa le mafuaga ona e leai ni su’esu’ega na faia muamua iai,” o le fa’amatalaga lea a Melzer. 

Pau le tulaga lelei o iai, ona o le taro o se la’au e ‘anagata ma malosi ma e talosia o le a mafai ona toe tula’i mai lea alamanuia, lea fo’i ua nofouta iai le Iunivesete mo nisi galuega puipui.

© Samoa Observer 2016

Developed by Samoa Observer in Apia