Ripotia e Sarafina Sanerivi

Fa’aliliu e Maiava

E le o toe mamao ae maua e le mamalu o le atunu’u o alala i Vailima ma Tapatapao le suavai taumafa ua mae’a ona fa’amamaina.

Ua saofaga lea tulaga ona o se Poloketi o Suavai Mama e sefululima-tesi-fa miliona tala Amerika (USD$15.4 miliona tala Amerika) a le Vaega o Fesoasoani Fa’ava-o-malo a Iapani (JICA) lea ua fuafua e fa’amae’a i le fa’ai’uga o Aukuso.

O le tasi lea o vaega o Poloketi mo le Fa’aleleia o le Suavai Taumafa mo Nu’u i tua a le Pulega o le Suavai, lea na amataina i le 2014. 

O le fa’amoemoe o le poloketi lea, o le fa’aleleia lea o le suavai i fa’atanoa-vai fou i Vailima ma Tapatapao ma le fa’atanoa-vai tuai o iai nei i Alaoa.

E le gata i lena, o lo’o va’ava’ai fo’i i le fa’aleleia o vaega mo le pu’eina o le suavai, o le fa’alelei o vaega o paipa mo le tufatufaina atu o le suavai fa’apea le fa’atutuina o mita. 

I lea poloketi, o lo’o fa’aaogaina ai le oneone mo le fa’amamaina o le suavai ma e fa’aigoaina o le ‘Auala fa’aleNatura mo le Fa’amamaina o le suavai, e le fa’aaogaina ai se ‘eletisi.

Na fa’aalia e le Faufautua o le Poloketi, le ali’i-Sapani o Tetsuji Nakasone, o le fa’aaogaina o le oneone mo le vaimamaina o le suavai, na ulua’i amata mai Sikotilani. 

“Ona fa’atoa fa’aaoga ai le i Egelani,” o lana fa’aaliga lea. “O le faiga la lea na pu’e mai e Iapani, peita’i ona o le ‘uti’uti o ‘ele’ele ma le fa’ato’ateleina vave o le aofa’i o tagata, na le aoga ai lea faiga.” 

Mo Samoa lava ia, o le tele o le ‘ele’ele mo lea poloketi, na una’ia ai latou e fa’atino loa le faiga lea e fa’aaogaina ai le oneone, mo le fa’aleleia o le suavai taumafa i Samoa. 

“O lo’o iai le fa’amoemoe, e fa’aaoga le ‘auala lea e mautinoa ai le maua e tagata uma i lenei vaega o le atunu’u, se suavai mama. O le ma’ea ai la o poloketi nei, o le a fa’aopopoina ai fa’atanoa fou e tolu, i fa’atanoa ua iai nei,” o le fa’aaliga lea a Tetsuji.

E leai ni fuafuaga e faia lea ‘auala i le motu tele o Salafai i le taimi nei.

 “E fa’alagolago mea uma i le mana’o o le malo o Samoa, pe manana’o e fa’aauau le faiga lea i Savai’i mo le atunu’u o iai.”

O Samoa le atunu’u lona lua o le Pasefika ua fa’aaogaina lea faiga e mulimuli atu ia Fiti.

“O lo’o fa’aaoga nei e Fiti lea faiga ma ua malamalama lelei fo’i i le aoga o lea faiga e fa’aleleia atili ai le suavai-taumafa mo le atunu’u atoa,” o le saunoaga lea a Tetsuji.

 “E silia i le 200 vaega laiti fa’apea ua fa’atuina i Fiti, i nofoaga i tua aua ua iloa lelei e le malo le aoga. Ma ‘ou te talitonu, e tele atu nisi mea fa’apea e manana’o le malo o Samoa e fa’atuina pe a malamalama ma iloa lelei lona aoga i le lumana’i. Atonu o le a fa’asolo atu ai loa i nu’u i tua.”

O le a fa’atuina fo’i se isi fa’atanoa fa’apea i Vaivase-uta i lalo lava o le poloketi lenei. Sa fa’atinoina e le Vaega lea a Iapani (le JICA) se asiasiga fa’apitoa a tusitala ma vaega fa’asalalau i nofoaga ia i Tiapapata i le Aso 19 o Fepuari.

O le a ‘auaina nisi o ata o lea asiasiaga i lomiga o lenei vaiaso.