Tauvaga tusiga-tala: Fa’aata i ‘upu ma fa’aupuga

29 February 2016, 12:00AM

Fa’aliliu e Maiava

 

Ua toe fa’agasolo nei mo le tausaga lona lima lenei, le tauvaga tusiga-tala e faia i tausaga ta’itasi a le Samoa Observer  mo fanau-a’oga i a’oga-tulagalua, a’oga maualuluga fa’apea fanau ua i iunivesete.

O le ‘autu o le tauvaga i lenei tausaga: “O lo’u Lalolagi” ma o lo’o lagolagoina e le Samoa Stationery & Books (SSAB) ma le kamupani a Eveni fa’apea nisi fa’ailoga fa’apitoa e saunia e le Bluesky Samoa. 

E pei fo’i o isi tauvaga ua mavae, ua manatu le Komiti o tapenaga fa’apea ma pa’aga lagolago i lenei fa’amoemoe, o le a tatala teisi i tua le tauvaga, ua tu’u ai se avanoa e fa’atinoina ai se tauvaga fa’apea mo o tatou tua’oi i Amerika Samoa.

O le vaiaso la talu ai, na talia fiafia ai e fanau-a’o’oga ma faia’oga lea tauvaga e fa’atinoina mo le teritori o Amerika Samoa, o se fa’aaliga lea a le Fa’atonu o Polokalame fa’aleA’oa’oga a le Samoa Observer, o Marj Moore.  

 “E le’i iai lava se tauvaga fa’apenei na faia muamua ai, se avanoa mo nai fanau-a’o’oga e filifili ai pe tusia tala i le fa’aSamoa pe fa’aPalagi fo’i ma fa’amalosi’au ai fo’i i fanau-a’oga, ia fa’aaoga le avanoa lelei lea e ‘auai nisi o latou,” o le fa’aaliga lea a Marj Moore. 

Na ta’ua, o le tauvaga tusiga-tala lea, ua atagia ai le taua ma le fa’amoemoe lelei o lea taumafaiga na totogo a’e i le Vaega o le Samoa Observer, aua le a’oa’oina o fanau. 

O le fa’amoemoe muamua lava, o le naunau lea ia maua se avanoa e fa’ata’ita’i ai fanau a Samoa ma ia si’itia lo latou tomai ma agava’a i tusiga-tala ma isi tusitusiga ma sa’ili fo’i i latou e aupito lelei o fanau nei, i tusiga-tala.”

“Na iloa lelei lava mai tausaga ua mavae, e tofu le tagata ma lana tala e fa’amatala ma sa tu’uina atu fo’i togi ma meaalofa i a’oga e aupito tele tala na fa’aulu mai i gagana e lua.” 

Na ta’ua fo’i e Marj, o le isi tulaga o le a ‘ese ai le tauvaga o lenei tausaga, ona o le a taumafai e galulue fa’atasi ma pa’aga-lagolago ina ia mautinoa ai, le taufai manuia fa’atasi o tagata uma  mai lea taumafaiga. 

 “Ua umi aso, ua tele fo’i tausaga – o le lona lima lenei, o a matou faiga-pa’aga ma Fiti Leung Wai ma le SSAB. O le polokalame ‘ia iloa faitau’ o se tasi sa matou galulue fa’atasi ai ma fa’alauiloaina ai fo’i le tele o a latou tusi, o ‘api ma isi vaega mo’omia mo a’oa’oga ae maise se tasi o a latou galuega sa fiafia iai, o le atina’eina lea a afio’aga ma alalafaga ae maise vaega i nu’u i tua.” 

“O le tausaga nei la, ua fiafia ai lava ina ua filifilia le kamupani a Eveni e avea o se tasi o matou pa’aga-lagolago ‘autu. Matou te fa’afetaia tele lo latou tula’i mai fo’i o se kamupani e malosi le fesoasoani mo le una’ia o fanau a’o’oga ma tupulaga laiti, e ala i le tapenaina ma fa’atau atu o lavalava a’oga, o lavalava ta’alo ma isi mana’oga tau-lavalava. 

“Ma e tumau lava la latou lagolago i tulaga taua ia,” o le fa’aaliga lea a Marj Moore.  

O kamupani uma fo’i nei, o lo’o lagolagoina le tauvaga tusiga-tala mo Amerika Samoa.

Mo le fa’atauaina atili o lea tauvaga, ua sauni ai le kamupani tau-feso’ota’iga o le Bluesky, e tu’uina atu ni fa’ailoga fa’apitoa mo i latou o le a mautulaga i tauvaga fa’apea a latou a’oga o lo’o iai. 

O le ‘autu lava lea e tasi “Lo’u Lalolagi” na ta’ua ai e Marj, e mo’omia e le Komiti ia fanau-a’o’oga, ia tusi manino tala e uiga i o latu tagata ma o latou si’osi’omaga o iai nei, po’o lalolagi fo’i e manana’o ia ‘auai i le lumana’i. 

“Matou te naunau lava i ‘upu ma fa’aupuga talafeagai lelei, e momoli mai ai ata o tala e pei o ni ata-moni ma ata-fa’asolo i le matou va’ai. O le fa’amoemoe lena, talosia, ia fa’amatalatala lelei mai.

Ui fo’i ina le fa’ataunu’uina le tusiga-tala a fanau i le 2015 ona o Ta’aloga a Tupulaga o le Taupulega 2015, a ua fa’ananau lava le Samoa Observer ma ana pa’aga-lagolago e fa’ataunu’uina i lenei tausaga ma una’ia ai fanau, e fa’asoa mai a latou tala a’o iai pea i a’oa’oga i lenei vaitau o le soifuaga. 

“E amata atu i le tausaga nei, o le a fa’aauau le tauvaga lenei ma faia i le ‘afa muamua o le tausaga, i tausaga uma o lumana’i. 

“Lona uiga, o le a le tu’ua-fa’atasi pe fa’alavelavea ai taimi o su’ega taua e masani ai i fa’ai’uga o tausaga ta’itasi. 

Ua tu’uina atu nei le fitu vaiaso e mafaufau lelei ai, e fuafua ma tusia tala o le tauvaga a’o le’i tapunia i le Aso Gafua, 18  Aperila i le itula e fa (4.00) i le afiafi. E fa’amanatu atu ai i a’oga uma, ina ia fa’alauiloa ane i fanau-a’oga uma ma una’ia le tusia o a latou tala i totonu o vasega pe fa’aauau fo’i aiga.

“O lenei fa’amoemoe, o se tasi o avanoa e maua ai e fanau ni avanoa e tusia ai tala e mea e tutupu i o latou olaga, i a latou lava fa’aupuga aua le soifua au-i-luma i tusiga-tala,” o le fa’aaliga lea a Marj.

Mo nisi fa’amatalaga e uiga i lenei tauvaga, fa’amolemole fa’afeso’ota’i so’o se Faleoloa o le SSAB i Upolu nei po’o Salafai, po’o Eveni i le Taulaga fa’apea le Ofisa o le Samoa Observer i Apia ma Vaitele pe telefoni mai fo’i ia Marj Moore i le numera 751 6766 po’o le tuatusi imeli: [email protected].

29 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>