Manatu o le Fa’atonu - Timuga, le la ma le oneone

29 February 2016, 12:00AM

Tusia - Marj Moore

Fa’aliliu e Maiava

 

A fai se ripoti o galuega a le Vaega o Polokalame Fesoasoani a Iapani (le JICA) o lo’o fesoasoani mo atunu’u tau-atia’e, e mautinoa lava, e tatau ona aofia ai se fa’aupuga fa’apea, “o se tautua le-leoa”.

O le tautua le-leoa lea, o le a saofaga ai se vaega to’atele o le mamalu o le atunu’u, i se fa’asoa le toe-motusia i aso ta’itasi, o le tasi o mana’oga ogaoga o le soifua, le suavai. 

O le JICA - na fa’atuina ia Aukuso o le 1974 sa iai isi fesuia’iga fa’aopopo na faia iai i le 2008 ma avea ai o se tasi o vaega fesoasoani aupito tele i le lalolagi, ma aupito ogaoga i galuega tau-atina’e e pei ona ta’ua i Upega-tafa’iLagi. 

I se saunoaga a le latou peresetene, o Shinichi Kitaoka, na ta’ua ai, o lo’o taumafai malosi le fa’alapotopotoga i galuega ‘ese’ese mo le ‘ausia o fa’amoemoega ua fa’ata’oto mo Atina’e mo le Meleniuma, o le tausiga o le filemu, o atina’e mo le saogalemu ma le soifua manuia o tagata lautele.   

I le lalo o le fu’a o galuega tau-atina’e, lea e aofia ai le Poloketi mo le Suavai Mama e 40.8 miliona tala, ua fuafua e fa’amae’aina ia ‘Aokuso o le tausaga nei, ua alagatatau ai ona fa’afetaia e Samoa lea fesoasoani aoga ua talafeauga lelei mo lenei vaitau. 

Ae ui fo’i i le mau fesoasoani fa’apea mai isi atunu’u sa agalelei mai i le 30 tausaga talu ai, ae maise le fa’atumauina o le suavai mau mai le timu e masani ona o’o atu i le 3 afe milimita i le tausaga, e iai lava fo’i vaitau e matua leai ai se suavai e maua mo le atunu’u lautele, talu ai le le-lava o le suavai e pei ona ta’ua so’o, po’o le palapala o le suavai e maua mai paipa, e le mafai ona fa’aaogaina mo le fofoga-taumafa. 

O lea fa’afitauli e foliga le-manuia pe a manatu ane i le tele o taimi, e susulu malosi ai le la – e silia i le 3,500 itula, ae o lo’o fai-fai-malie lava galuega a le malo e tau pu’e ai le malosi mai le la, e suia ai lo tatou fa’alagolago tasi i isi malosi’aga e taugata atu. 

Ae tatou toe fo’i atu i le suavai. 

E le’i fa’amalieina lava le atunu’u i tali o fesili e tu’uina atu pea i le Pulega o Suavai, pe aisea lava e saga tupu so’o ai lea tulaga, o le le-lava o le suavai-taumafa, e le gata i vaitau-matutu ae fa’apea fo’i le vaitau o timuga ae maise le fa’aletonu pea o nofoaga o iai fa’atanoa e teu ai le suavai. 

O taumafaiga fo’i a le ‘aufaigaluega e ‘auina atu loli-vai i aiga mo se taimi vave, o se faiga le manuia mo le to’atele e le taitai gafatia  totogi o ni tane lapopo’a e teu ai le suavai. 

E foliga mai e leai se tasi e popole iai fa’atasi la ma tali fa’atiga-loto mai le Pulega o le Suavai, lea e tu’ua’ia ai le ‘aufaifa’ato’aga i le so’ona fa’alaloina o la’au i ‘ele’ele maualuluga, ua palapala ai le suavai ma le-lava fo’i tane e teu ai, ua fa’aopopo ai le le-fiafia ma le le-mautonu o le atunu’u. 

Ua atili fa’atiga ai i tagata, le mau-fa’asalalauga fa’atosina i televise, lea e fai mai o le vai, o le ola, pei e foliga o tatou e le iloa lea mea, ae maise la le fa’amaumauina o nei mau seleni e talitonu le to’atele, sa tatau ona fa’aaoga mo le fa’aleleia o fa’aletonu uma o le fa asoasoaina atu o le suavai. 

I le taimi nei, o le fa’ato’ateleina o le faitau-aofa’i o Samoa ae maise fo’i isi mau atina’e o fuafua, ua atili tuai ai pea ona maua o le suavai. O le tulaga lelei la, mo latou e gafatia lea ‘au’aunaga, ua maua ai e tagata faipisinisi se avanoa fa’a’auro e gaosia ai tane i so’o se lapo’a, o se tali mo lea fa’afitauli mo isi tagata Samoa.  

E foliga mai lava, e le iloa se taimi e muta ai lea fa’aletonu.

O le tala la mai nai Sapani agalelei fa’apea e le o toe umi ae mae’a le latou poloketi, o se fa’aolatotoga lea mo le to’atele o le atunu’u. E fa’apena fo’i le tala, e ono fa’asolosolo atu lea poloketi i isi vaega o le atunu’u o lo’o afaina pea i fa’afitauli tau-suavai.

Ae manaia tele fo’i, aua o le poloketi lea, o lo’o fa’aaogaina ai le oneone e fai ma fa’amama – lea e pei o le la ma timu, e matua tamaoaiga ai tele tatou i Samoa. 

29 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>