Ia ola finafinau

By Aruna Lolani 16 May 2017, 12:00AM

O lea le talitonuga o Sam Leota, 64 le matua o le soifua o Satapuala i le Fofoga o Samoa.

Na ia fa’ailoa o le ola finafinau o le itu aupito sili lea ona taua i so’o se tagata soifua, ma o se itu e ao ona silafia lelei e nai o tatou tagata aua le aga’i atu ai le lumanai.

“Ia ua o tatou tau fai iloa uma lava le tulaga o lo’o ua i ai nei si o tatou atunu’u ma o se itu e ao lava ona silafia lelei.

“O si o matou aiga, ia o lo’o taumafai atu ai lava, ma o lo’o sologa lelei mea uma i le alofa ma le agalelei o le Atua.

“Ia o le uiga o la’u tala, e moni lava e tutupu mai fa’aletonu i le tele o taimi, ae pei o le loto lava ma le ola finafinau aua le lelei o aiga o lo’o fai ai lava.

 “E pei o lea le tulaga o lo’o i ai si o matou aiga i le taimi lenei, o le a lava le faigata ae o lo’o taumafai lava ina ia lelei le aga’i atu ai le lumana’i.

 “O a’u e laititi ai lava i le fanau a nai o’u matua, e moni lava la e faigata ae o lo’o mafai lava ona maua nai vaega aua le tausiga o aiga mai lea aso i lea aso.

 “O a’u o lo’o i ai si a’u tama’i ma’umaga e le mamao atu tele i gauta, ma o lo’o fesoasoani tele mo si o matou aiga.

 “E pei o le vaega tele lea o lo’o fa’alagolago ai le taimi lenei si o matou aiga, o le uiga o la’u tala a le mafai lava ona maua se tupe, ae pei o lo’o tua lava i le ma’umaga i le tele o taimi.

 “Ia o a’u ia pe i ai se tupe pe leai, e sili ai lo’u alu ou te galue i le fa’ato’aga e aveese mai ai le mafaufau, ia aua a leai se tupe ae la e mafai ona ola mai le ma’umaga.

 “O nisi o tagata e pei ua matua’i lelavava lava i le tele o le mau mea o lo’o fa’atinoina ae galo ai le tulaga o le taumafai pea.

“E le maua ma se filemu se mea, e tatau lava ona o tatou galulue.

“Aua o le a fesoasoani tele i nai o tatou aiga.

By Aruna Lolani 16 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>