Tofiga Maualuluga

192 Hits

Minisita o le Matagaluega o Tupe Maua, Tuiloma Pule Lameko ma le Minisita o le Matagaluega o Fa’ato’aga ma Faigafaiva, Le Mamea Ropati Mualia.

Minisita o le Matagaluega o Tupe Maua, Tuiloma Pule Lameko ma le Minisita o le Matagaluega o Fa’ato’aga ma Faigafaiva, Le Mamea Ropati Mualia.

Ripotia e LanuolaTusani Tupufia

Fa’aliliu e Maiava 

 

E to’alua sui fou ua fa’aopoopo nei i le Fono a Sui Tofia. O la’ua o sui-matutua o le Palemene ma o Ali’i Minisita fo’i o le Kapeneta, o Tuiloma Pule Lameko ma Le Mamea Ropati Mualia.

O Tuiloma o lo’o tau’avea le Matagaluega o Tupe Maua ma Le Mamea, o le Matagaluega o Fa’ato’aga ma Faigafaiva. 

O le Afioga a le Ali’i Palemia, Tuila’epa Sa’ilele Malielegaoi, na fa’atuina le lafo i le Palemene ma pasia ai lava i le afiafi o le Aso Lulu. 

Na fa’ailoa e Tuila’epa, o tofiga fou nei, o le a atoa ai le va’a-se’e-tolu o le Fono a Sui Tofia, lea o lo’o se’ei ai i le taimi nei, na o lana Afioga a Tuimaleali’ifano Va’aleto’a Sualauvi II.

O Tuiloma ma Le Mamea, e le toe tauva i Faiga Palota Lautele o loma nei. 

Na saunoa le Ali’i Palemia, o tofiga nei ua leva ona avanoa ma o e umia ia tofiga, e taua tele ae maise pe a to’esea le Ao o le Malo ma le atunu’u.

“O le mafuaga lea e le tatau ona tu’ua ai fa’apea tulaga-tofi nei, e tatau lava ona tofia iai nisi,” o lana fa’aaliga lea. “E le o se mea talafeagai le avanoa pea o nei tofiga ae o lo’o iai le tulafono e limata’ita’ina ai le tofia iai o nisi ae maise fo’i, pe a o iai seleni ua fuafua mo ia tofiga.

“O le mafuaga lea Lau Afioga a le Fofoga Fetalai, e le o toe po se silafaga a le Maota nei, i fa’aaliga a nisi o sui-matutua o le Maota, o le a le toe-tauva (i Faiga Palota Tele a le atunu’u o loma nei).

 “O sui-faipule nei e to’alua, ua loa tausaga o iai pea i le Maota lenei ma o sui-fa’avae fo’i o le Vaega Fa’a’Upufai e Puipuia Aia a Tagata (le HRPP).

“O le mea lea, ‘ou te fa’atu se lafo mo le fono faitulafono, ina ia fa’amaonia le tofia o Tuiloma Lameko ma Le Mamea Ropati, o sui o le Fono a Sui Tofia.” 

O lea lafo na lagolagoina e le Maota ma fa’asilasila aloa’ia ai loa e le Fofoga Fetalai, La’aulialemalietoa Leuatea Polata’ivao, ua pasia. 

Na fa’amalo le Ta’ita’i o le Itu Agai, Palusalue Fa’apo II, i sui fou ua tofia mo ia tofiga.

I le Palemene ananafi, na momoli ai le fa’afetai a Tuiloma ona o le avanoa ua tu’uina atu mo ia, e fa’aauau ai pea o lana tautua mo Samoa. 

E fa’apena fo’i Le Afioga a Le Mamea, lona fa’afetaia o le fa’aeaea ua matu’u atu. Sa ia momoli le fa’afetai i Le Atua ona o le tofiga ua faia ma fa’afetaia ai le Palemene ona o le fa’atuatuaga ua tu’uina atu e tautua ai i lea tulaga maualuga. 

 “Sa iai lava la’u fuafuaga e malolo-ritaea peita’i, o lea ua ‘aumai le pule a le Palemene, ua tofia ai mo lea tofiga,” o le saunoaga lea a Le Mamea. “E fa’afetai ai i Le Atua i le avea pea o a’u e fai ma Ana ‘au’auna ae maise le avanoa e fa’aauau ai la’u ‘au’aunaga mo Samoa.” 

O Le Mamea, ua 71 tausaga o lona soifua. O se tasi e tomai fa’apitoa i vaila’au mo togafitiga o gasegase na avea ma faipule o le Palemene i le 1979. I le 1982 na avea ai ma Minisita o ‘Ele’ele ma Fuagafanua, Fale Meli ma Fa’asalalauga.

Mulimuli ane avea ma Minisita o A’oga, Autalavou, Ta’aloga ma Aganu’u ma le  Matagaluega o Leipa i le faigamalo a Tofilau ‘Eti ‘Alesana. 

I le tausaga e 2001 – 2006, na avea ai ma Ta’ita’i o le Itu Agai, le Vaega Fa’a’Upufai a Samoa Temokalasi.

O Lana Afioga o le Failautusi o le Komiti o Tupe a le Ekalesia Fa’apotopotoga Kerisiano Samoa.

O le Afioga a Tuiloma, ua 80 tausaga o lona soifua. 

O ia le ulua’i Samoa na tofia e avea ma Pule o le Fa’alapotopotoga o Va’a a Samoa. Na ulua’i ulufale i le Palemene e avea ma faipule mo le Itumalo o Safata mai le 1979 – 1996. Mai le 2001, sa ia tau’avea ai se tasi o nofoa mo le Itumalo o Falealili.

© Samoa Observer 2016

Developed by Samoa Observer in Apia