’Au’aunaga a le TV3 mo Samoa

221 Hits

A ō gatasi lava ma fuafuaga, e ono maua le avanoa o Joseph e fusu ai i le fusi o le lalolagi i le fa’ai’uga o le tausaga, ma o le a ‘auai atu iai le TV3 e fa’asalalau tu’u-sa’o mai” – Hans Joachim Keil

A ō gatasi lava ma fuafuaga, e ono maua le avanoa o Joseph e fusu ai i le fusi o le lalolagi i le fa’ai’uga o le tausaga, ma o le a ‘auai atu iai le TV3 e fa’asalalau tu’u-sa’o mai” – Hans Joachim Keil

Ripotia e Maddison Clarey

Fa’aliliu e Maiava

 

Na i’u manuia le fusu’aga tele ua fa’amauina nei i tala-fa’asolopito o fusu’aga i Samoa.  

E fa’afetai tele ai i le TV3 na fa’asalalauina tu’usa’o lea fa’amoemoe, na mafai ai ona maimoaina e Samoa uma le alofaiva o le tama-fanau a le atunu’u, Lupesoli’ai La’auli Joseph Parker lea na fa’ato’ilaloina le agavale-Amerika o Jason Bergman i le ta’amilosaga valu.

Na matua fa’atumulia le Maota Ta’alo i Faleata i le silia i le lua-afe le mamalu o le atunu’u sa tapua’i leotetele ma tau’alaga i le tama-fusu Samoa. 

Ae mo le atunu’u sa le mafai ona ‘auai i Faleata, e leai se mea na fa’apopoleina ai.

Na momole e le TV3 lea fiafiaga tele i aiga uma o le atunu’u i fa’asalalauga o lea po atoa. 

Mo le atunu’u na vave tofafa e le’i matamata i le pa’u fa’atolu a si ali’i-Amerika, o le a toe fa’asalalauina e le TV le fusu’aga atoa i le aoauli-a-taeao. 

O le fiafia tele o le Ali’i Pule o le TV3 o Hans Joachim Keil i le fa’ai’uga mata’ina o lea fusu’aga, na saunoa ai, o le a fa’aauau pea i le lumana’i, ona taumafai le TV3 e fa’asalalauina fusu’aga uma a Lupesoli’ai aua le silasila ma le tapua’iga a Samoa uma. 

“Na matua manuia ma manaia le fa’asalalauina o le fusu’aga,” o lana saunoaga lea. “Na maimoa uma le atunu’u, le atunu’u atoa.” 

Na momoli le fa’afetai tele a le kamupani i le vaega o le Duco Events ona o le fa’aeaea maualuga ua mafai ai ona latou fa’asalalauina le fusu’aga ma ua fiafia tele e ‘auai e avea o se vaega e tapenaina  ma lagolago le fusu’aga a Lupesoli’ai.  

“Mata’utia le taunu’unga manaia o lea po, ua matou fiafia uma ma mitamita i tama-fanau a le atunu’u,” o le saunoaga le a Keil i le Samoa Observer.

Na fa’ailoa mai e le TV3, e leai se tagata Samoa e le matamata i fusu’aga uma a Parker e faia i le lumana’i, tusa lava po’o fea e fai ai. 

 “A ogatasi lava ma fuafuaga, e ono maua le avanoa o Joseph e fusu ai i le fusi o le lalolagi i le fa’ai’uga o le tausaga ma o le a ‘auai atu iai le TV3 e fa’asalalau tu’u-sa’o mai,” o lana saunoaga lea. 

Ua naunau fo’i le TV3 e galulue so’o-so’o-tau’au ma le vaega a le Duco Events i le lumana’i, ina ia ‘aumaia pea  i Samoa nei nisi fa’amoemoe tetele fa’apea, ma fa’alauiloa ai fo’i le anoanoa o tama-fanau a Samoa ua iloga i tulaga tau-ta’a’aloga aua le silasila a le atunu’u aoao.

© Samoa Observer 2016

Developed by Samoa Observer in Apia