Manatu o le Fa’atonu - O Ta’ita’i Faa-Polokiki matou te mana’omia

194 Hits

Tusia - Mataafa Keni Lesa

Faaliliu e Seagaitumua Tupuola

 

O le Ao o le Malo, Lana Afioga Tui Atua Tupua Tamasese Efi, o le ana faataapeina le Palemene i le asō i le faagasologa o se tauaofiaga faapitoa i Tuana’imato.

Ma talu ai o le fono mulimuli lea a Sui Usufono o le Palemene, e leai se tulaga masalomia o le a latou toe mafaufau i le lima tausaga ua alu, faatasi ai ma le to’atele o i latou o loo faamoemoe ua uma ona latou faia ni galuega se tele e faa-talitonu ai tagata palota ma toe faafo’i mai i latou pe a palota le atunuu i le Faiga-Palota Lautele i le as 4 o Mati 2016. E le toe foi mai i latou uma. A aulia le faaiuga o Mati, o nisi o i latou o le a fiafia ae o isi o le a maligi loimata.  Ae peitai, e le o le taimi nei e mafaufau ai i loimata.. A tatou toe tilotilo i tua i le asō, tatou te talitonu e anoano mea tatou te mafaufau i ai ma faamanatu. 

O lea matou te talanoa atu e uiga i le galuega tuufaatasi a le Palemene ma le malo i le faagasologa o le lima tausaga ua mavae e toe faaleleia ai galuega tetele, mai ala tetele i femalagaiga i fesootaiga, suavai ma le gaosiga o le eletise, taaloga, turisi ma le tele o isi lava atiina a’e. O le mea moni, e anoano mea e tatau ona tatou faafetaia. Ioe-o Palemene e faafoe e alii ia e lapelapea ma vaivai-o lo tatou Palemene e le ese mai ai lea. Ae ui o lea, e ui lava i nei lu’itau,  ae i le avea ma atunuu, sa tumau pea ona tatou malolosi. 

O le mea lea e tatau ai ona tatou faailoa atu ma le faafetai le galuega a o tatou sui faipule uma. 

Mai le Fofoga Fetalai o le Palemene, La’auli Leuatea Schmidt i le  Palemia o Tuilaepa Sailele Malielegaoi,  le Ta’ita’i o le Itu Agai, o Palusalue Fa’apo II ma isi Sui Usufono uma o le Palemene, matou te momoli atu le faafetai tele ia te outou. 

Faafetai tele mo mea uma lava ua outou faia mo Samoa. Ma a o tatou tilotilo i luma i le Faiga Palota Lautele, matou te tatalo ma talitonu o le a filifilia ta’ita’i sa’o, ia e le fefefe e fo’ia faafitauli ia matou te talitonu o loo taofia ai i tua lenei atunuu mai le ‘ausia o le tulaga e tatau ona tatou ‘ausia.  

Lea ua toe aumai ai i matou i tua i se tusitusiga na matou lomia faasalalau i se taimi ua alu , Sa faaigoaina “E sili atu ona lelei se :vale faata’ita’i” i lo le tele o ta’ita’i faa-polokiki e leai ni leo,” matou te toe fia faasoa atu lenei tusitusiga ia te outou. Matou te talitonu o lea faaupuga i lenna taimi o loo tumau pea lona taua ma e mafai foi ona aoga tele pe a tatou nonofo lelei i lalo ma faa-vasega sui faatutu ma i latou o le a tatou palota i ai ni nai vaiaso o i luma. O le Tusitusiga la lenei: 

“Mo ona vaivaiga uma-ma e matua tele lava-e tatau ona e faafetaia le lototele ma le talitonuga maumaututu o le ta’ita’i o le Itu Agai, o Palusalue Faapo II.  Fai mai isi tagata e le o is o se faipule polokiki e sili ona poto i totonu o Samoa ma atonu e sa’o fo’i i latou, pe a fua i nisi o mea e saunoa i ai. Ua loa ona faaigoa o ia o se “vale, ”  “o se vale faata’ita’i”e ese ai mai le tele o isi lava igoa felanulanua’i. 

Ae peitai, a tatou mafaufau i ai, o ai na te manaomia ni faipule popoto pe afai e pau le latou mea e fai o le nofonofo i nofo mananaia ae leai se leo e uiga i mataupu e afaina ai tatou? E leai se tulaga masalomia e faapea e anoano faipule atamamai o loo i totonu o le Palemene i aso nei. O lea matou te talanoa atu i faipule o le malo ma faipule o le Itu Agai. O le toatele lava o i latou e maoa’e lo latou aoaoina, ia e ta’ua so’o e le Palemia o lau’ia (i’a tetele). Na latou ulufia foi le Palemene ma ni tusi maoa’e o lo latou aoaoina ma ni fautuaga uiga ese mai le lalolagi atoa. E aunoa ma se masalo-ua ia i latou le anoano o mafaufauga lelei e faasoa atu, pe a latou maua le lototele e faatino ai.  

O le faafitauli e faapea latou te le o faatinoina. E le gata ina fefefe ia poo le faapea foi e le o kea i ai. Ma a pa’ia loa mataupu ogaoga, e pei o le tulai atua e tete’e i faiga pi’opi’o , faiga sese, faaaoga sese o le paoa ma meatotino a le malo, o lo latou gūgū e mafai ona faauigaina o le lagolagoina lea i se faiga e le tuusa’o o tagata e faatupuina faiga pi’opi’o.  Ma o le vaega lena e popole ai. Ua outou silasila la, o le a le aoga o le poto pe afai e fusi o latou laugutu pe a pa’ia mataupu ia e faavavau o afaina ai tagata na palotaina i latou i totonu o le Palemene? 

O le a le aoga o le i ai o ni fai’ai popoto ae leai sou fatu e tuina atu mo le faaaogaina tatau? 

I le taimi nei la ma le faalogologo atu i le Palemene i le faagasologa o nai taualumaga ua mavae atu, o le faalogogoa lena e lagona e se tasi. O le mea moni, toetoe lava a mafai ona e mate’ia pe o ai o le a lauga ma o le a latou lauga o le a fai.  O le itu ua fai ma faatiga e faapea o le toatele o nei alii polokiki atamamai sa tumau pea o na leai se leo. Ioe, o loo latou gūgū ua fai ma faatiga taliga, O le pogai lea ua avea ai Palusalue-ma atonu ma nisi lava Faipule o le Itu Agai-ma leo o mafuaga tatau i totonu o se Maota e pule toatasi ai le malo mai le amataga e o’o i le faaiuga. 

Ae ia ‘aua lava nei faaseseina outou, i Samoa i aso nei, o loo tumau pea ona avea le Palemia o Tuilapea ma se tasi e aupito i sili ona poto masani, ma e le finauina foi lona avea ma tagata polokiki e sili ona poto ma sili ona malosi ia i latou uma lav a. O nisi taimi, e mafai lava ona e vaaia ma faalogo i le faiga o loo tamo’e faataamilo ai o ia i totonu o ana paaga faipule.   O le isi itu, afai e te faalogo lelei i taualumaga, o loo i ai lava se fuafuaga a le H.R.P.P.latou te faaaogaina i le faagasologa o taualumaga e aofia ai Minisita filifilia o le Kapeneta. Mo se faata’ita’iga, a maua Tuilaepa i le tulimanu, toetoe lava a mafai ona e ta’ua le suafa o le fea o ana Minisita o le Kapeneta o le a tula’i mai e lavea’i o ia. O loo i ai lava se faatonuga ma se itulagi o le osofaiga latou te faaaogaina ma e taunuu lava i le tele o taimi. Ma o le itu lena e le o maua e Palusalue. E le gata o le Tautua Party e tusa ai ma lo matou manatu, e le o i ai se fuafuaga i totonu o le Palemene e lelei ai ona lagolagoina Palusalue e sui o lana pati. E ese ai mai lana sui taitai o A’e’au Peniamina Leavai, e te tau mafaufau pe o fea o i ai isi sui. E mafua lea tulaga ona o i latou e tutula’i- latou te le fesiligia Palusalue ma e o’o ane i le faaiuga ua matua fete’ena’i lava ma ia. 

Ma o le pogai lena ua matua faigata ai lava le galuga a Palusalue, pe a tuu i le faafeagai ai o ia ma se vaega’au malosi e pei o Tuilaepa ma le masini a le H.R.P.P.

Ae peitai, ua na o se vaega lena o lana faafitauli. O le lu’itau aupito i tele, e tusa ai ma lo matou manatu, o le ta’ita’iga lea o le vaega o tagata polokiki na te le mautinoa lelei pe o fea tonu le latou vaega. Ua matou fai atu faapena ona a fua i mea sa faailoa mai e sui o le Tautua Party, o nisi o i latou e peiseai ua latou sopo’ia le isi itu o le maota. 

.E peiseai ou te manatu afai e le o faasaina i le tulafono o loo i ai nei le sopoia o le itu itu e aunoa ma se faiga-palota laititi, atonu o nisi o i latou ua uma ona latou faailoa mai o latou lanu moni. 

O le itu lea e tau faailoa atu e faapea o le taimi lava tatou te manatu ai o loo i ai ni faafitauli a le Palemia o Tuilaepa ma lana Vaega Faa-Upufai e Puipuia Aia Tatau a Tagata (H.R.P.P.) o le tepa faanatinati i le isi itu o le Maota i le Tautua Samoa Party o le a ta’u atu ai ia te outou e le o tulaga lelei foi lo latou fale. 

O e fia i ai la i seevae o Palusalue? 

E le gata ina ua faafeagai o ia ma se pa sima e tusa ai ma le tulaga o le malo, ae o le le lava o le lagolago ma o le itu e sili ona taua-o se fuafuaga maopoopo ma se fuafuaga tau osofaiga ua tuua ai o ia i se tulaga leaga lea e faailoa atu i le tele o taimi. 

O se itu lea e faanoanoa ai ona o lea ua i ai le taitai o le Itu Agai lea o loo tau alaga atu i le isi itu ma tuua’ia le malo ona o le mavaevae o lana itu ae o loo i ai lipoti i lea itu ma lea itu e uiga i sui o lana lava vaega ua fuafua e auai e auai i lea lava vaega ua tuua’ia. I le toe vaai la i tua, matou te malamalama e faapea e le faigofie mo sui auai o le itu agai. E anoano mafuaga ua pogai ai. Ae faapefea le faatosia a o latou tagata o i totonu o le malo ma le ono maua o tofi faa-minisita i le isi malo-pe a fua i le mea moni o loo faifai malie lava ae ua mautinoa ua malepelepe-o ai o le a le tofotofoina? 

A tatou foi la ia Palusalue, o se mea uiga ese ona e ono mafai ona avea o ia ma Sui e toatasi o le Palemene ua kiki i fafo ma le Maota i le faagasologa o le taualumaga o loo faagasolo nei.

E anoano faaupuga o lena mea.Ua e aveeseina upu faa-pata mai totonu o le Maota e uiga i le aganuu a Samoa ma le manaomia o le faaaloalo lea na mafua ai le faaiuga a le Fofoga Fetalai, ae o le mea moni lava ia- e na o Palusalue lava sat u-poupou ma tulei tuaoi ma fai fesili sa tatou mana’omia uma tali. 

Faaigoa pea o ia o le “faavalevalea” ma o le “vale faata’ita’i” poo le a lava, ae saili ia te a’u ona i ai se “vale faata’ita’i” e avea ma alii lototele, talitonu i lona talitonuga, faiga faavae  ma taofi mamalu e avea ma ta’ita’i i lo le tele o polokiki atamamai e na o le nofonofo i luga o le aupa ma faa-foliga o loo lelei mea uma ae o lea e faifai malie lava ona pala le pogai ona ua toe alofia foi e le malo le talanoaina o se mataupu o loo taofia ai pea i tatou i tua. O le a sou taofi? 

 

Ia outou maua se Aso Faraile uiga ese Samoa, ma ia faamanuia atu le Atua!

© Samoa Observer 2016

Developed by Samoa Observer in Apia