O LA’U TALA FO’I

136 Hits

1. Matauina i Tala Fou le tulai mai o nisi o faauluuluga o matagaluega ma faalapotopotoga a le Malo e tali mai i atugaluga o le atunuu e pei ona faaalia! O le tulaga la ua aliali mai-maumau pe ana faapea ona tulai mai i taimi uma e tali mai-ae le o le faatalitali se’i faaalia e le atunuu nisi o faaletonu o loo latou vaaia e ono afaina ai le atunuu e pei ona ua leva ona afaina ai nei. O lea e matau atu ua toe ta’ua foi le faaaogaina o tupe leaga poo tupe sese!

O le fesili la-aisea ua le mafai ai ona matua saili i latou ia o loo taulamua poo faia ia faiga ma lafo i le falepuipui? Afai ua mautinoa o loo faaaoga ni tupe sese poo ni tupe leaga-o le a le pogai ua le saisai ai ma lafo i le falepuipui. Ua uma ona fai Tulafono e taofi ai na solitulafono-ae o lena lava e fai!

O le a la pogai e saga fai ai? Afai la ua mautinoa e le pulega e gafa ma lea tulaga o loo faaaoga pea ni tupe sese poo ni tupe leaga-o lona uiga-o tagata na o loo faalataina le atunuu-ma ua na o latou lava manuia o loo saili-ae matamata fua le atunuu! O se mea tatau la lea faiga? Aisea ua le faasaga ai le Malo e saili ma saisai nei tagata ma lafo i le falepuipui? O lona uiga e sa’oloto isi e fai mea leaga-=ae faasa le atunuu? O le a sou taofi?

2. Matauina foi i Tala Fou le Faatonu Sili Aoao o le Soifua Maloloina ma lana saunoaga-fai mai e leai se mea e popole ai le atunuu i le siama o le faama’I o le Zika-ma o lea la ua aumai ai ma le faamaoniga o lea mau e ‘aua le popole-talu ai e na o le to’atolu lava tagata o le atunuu na maua i lea siama i le tausaga talu ai! Afai la o lea fuainumera e faasino i le tausaga 2015-o lea ua tatou talanoa i lea siama i le 2016. Afai la e na o le to’atolu lava mai le atunuu atoa na aafia i lea siama i le tausaga talu ai-o lona uiga la-“na o’o mai lava i Samoa nei lea siama”

A tatou tilotilo la i le lalolagi atoa- o loo matua popole lava i lenei siama, ae o lea e fai mai le faatonu sili o le falema’i-‘e leai se mea e popole ai’ E faapefea la pe a toe maua ai nisi e toatele o le atunuu i lea lava faama’i i lenei tausaga? E mafai e le tatou Falema’i ona togafitia? Ia manatua foi fai mai le talitonuga o le atunuu o le mea e te manatu māmā I ai-o le mea tonu lava lena e te matua afaina ai! O lea ua fai mai e ‘aua le popole- ae le o ta’u maia pe o lava ni vailaau, tupe ma le aufaigaluega-e faafeagai ai ma lea tulaga! O le a la sou taofi? 

3. Matauina i Tala Fou o lea ua toe faatu se Maketi le tumau i le taimi nei e suitulaga i le Maketi lea na mu I le afi ma faaumatia ai le anoano o oloa a nai tagata faipisinisi o le atunuu. Ua uma ona tatala aloa’ia lea nofoaga ma e sili atu i le 200 tagata faipisinisi o loo faaaogaina-fai mai e ta’i $1000 na totogi atu ia i latou ta’itoatasi-ma o ia foi tupe o le fesoasoani mai Saina! O le fesili la-afai sa totogi e tagata faipisinisi ni tupe mo le faaaogaina o le Flea Maketi lea na mu-O AI LE MATAGALUEGA POO LE FAALAPOTOPOTOGA A LE MALO NA TOTOGI I AI? Ana le seanoa nei la Saina- faamata o fea e ono maua mai ai se fesoasoani mo ia tagata faipisinisi?

4. Matauina foi i Tala Fou o lea sa talanoaina e le Palemene faaunegatupe ona tofu lava lea o le Sui Faipule ma lana faamatalaga e uiga i ia faaunegatupe.Ae fai mai le faaupuga a le Palemia-“O soo se taimi lava tou te o ai i le Faletupe o le Lalolagi, e ala ona faamaonia faaunegatupe ona o loo ia i tatou le malosi e toe totogi ai. Ou te le’i fai atu ou te teena a outou fautuaga-ae sa ‘ou fai atu- e le faatali le malo i sa outou fautuaga-talu ai o loo ia i matou ta’iala matou te mulimuli ai”-o le faaaliga lea a le Palemia.

O le fesili la- afai e le faatali le malo i se fautuaga a le Tautua Samoa Party- e le aloa’ia foi e le Malo fautuaga a le atunuu! O le fesili la-o ai na tofia le faigamalo na te faafoeina le atunuu? Afai o le atunuu-o le a le pogai e le fausia ai e le Palemia finagalo o le atunuu e ui atu i o latou Sui Usufono i le Palemene? E mafai e le Palemia ma lana faiga-malo ona latou faafoeina le atunuu pe ana le finagalo ai le atunuu? E le o ni tofi o latou aiga poo ni tofi o latou itumalo-o tofi o le atunuu atoa. E mafai la e le Palemia ma lana faiga-malo ona latou pulega le malo pe a finagalo le atunuu e sui le faigamalo na te faafoeina lo latou atunuu? O le a sou taofi? O lea la ua manino mai- e ala ona toaga le Palemia ma lana faigamalo e fai faaunegatupe-ona o lea e mafai e Samoa ona toe totogi-ae le o le mafai e le faigamalo ona toe totogi.

© Samoa Observer 2016

Developed by Samoa Observer in Apia