TALATUU O LEULUMOEGA

722 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer. 

 

O LE FONO I LE MALAE O MAAUGA (LEULUMOEGA) –Fai mai faamaumauga a Papalagi a faapea o le a fai se Fono i Aana; ona faasaga lea o Leulumoega e teu le Malae. Ona aumai lea o Nofoa e iva ua faatūtū i le Malae; ae filifili Leulumoega poo ai nisi e fai ma Savali; ona potopoto atu lea i le Malae Fono o Maauga i Leulumoega. Ona usu lea o le Fono-ona o atu lea i ai o ituaiga e iva o Leulumoega, ona latou filifili lea o ni e ti’eti’e i nofoa-e ta’ito’atasi mai le ituaiga.

O i latou la e nofoia ia nofoa- e tutū faatasi uma lava i luga i le taimi o le Faatau e saili ai se tasi na te faia le Ati.

A maua le tonu a le To’aiva i se toatasi na te faia le Ati-pe o Alipia poo Lemana poo se tasi lava o le To’aiva- ona nonofo uma lava lea i lalo o isi. Ona filifili lea o nuu e lua o Fasitoo-tai ma Fasitoo-uta, pe o ai so la’ua na te talia le lauga a Leulumoega. Ona faapea lava lea ona fai, ona faatoa auaua’i ai lea o lauga a nuu uma lava o Aana. Ona toe tu lea o se tasi o Leulumoega ma fai atu ‘ava o le fono.

Ona pati loa lea o le nuu o Falelatai; ona tapa lea o le ipu a Misa; a uma ona taumafa le Alii- ona la’u ane lea o le anoano o taumafa; pua’a, i’a, moa ma le tele o mea lelei- e ta’u ia taumafa-o “Fono o le ‘ava a Misa” ia Leulumoega.

Ona alaga lea o le ipu a Vaili; ona laga mai lea o le toatele o tagata e su’e le ipu e ave ai le ‘ava a Vaili. E su’e solo i toga’ulu e tusa ai ma Sa o le Malae. Ona tapa lea o le ipu a Afamasaga, ona ili lea faa-sefulu o pu e tusa ai ma Sa o le Malae o Maauga; ma muta ai Sa o le malae. Afai e finagalo Leulumoega o le a fono na o Tumua o, Lufilufi, Leulumoega ma Pule-ona fono lea o Leulumoega-ona tu’u lea o Umaga e faatinoina le Savali.

Ona tofi lea o se tasi o Leulumoega e o i Atua, ma se tasi o Leulumoega e o i Safotu ma Asau, ina ia potopoto mai, o le a fai le Fono Tele i Maauga. Ona sauni uma lea o Tumua mo lea fono. Ona tapena lea e Leulumoega ma Aana taumafa mo le Fono. A amata le Fono, e muamua lava le lauga a Leulumoega, pe afai e fono i Maauga.

Ona filifili ai lea o se Tumua na te talia le lauga a Leulumoga. Ae talu ai ona o Atua ma Aana e leai so la Alataua e pei o Savaii ma le Tuamasaga lea o loo umia e Safata le Alataua; o lea e faatinoina ai e Leulumoega ma Lufilufi lea tulaga.

O se tala la lenei o le a ono maua ai se ata tonu o lea fuaitau-“Alataua.” Fai mai o se tulaga lea sa avea ai Tuua ma temoni tagata e faaosofia e temoni o latou aiga ma sa avea foi ma temoni o itumalo. O lea tulaga o loo faamatalaina ai le paoa o ia alii ma sa faaigoaina ai o “Aitu Tagata.” E tusa ai ma suesuega a Papalagi, aemaise ai lava i taimi o taua a Samoa-fai mai o le tele lava o nuu sa tapua’i i manu e faapea sa nonofo ai temoni.

O le mea lea o le aitu o Taua a Manono o le Matu’u; o Sale’imoa o le Lulu. Fai mai a lele ane sea manu i luga a’e o se ‘autau, ona faapea lea- e manuia le taua; ae afai e lele faasaga mai i se ‘autau-ona toe solomuli lea. E faapena foi le Vaimauga i Apia- fai mai o le Faititili e pa ma gogolo i le vaomatua poo le sami- o le si’ufofoga lea o le Fe’e.

I taimi o taua, e seāseā lava ona ‘au-faatasi Lufilufi ma Leulumoega; e nonofo lava latou i o latou aiga ma nuu ma tatalo ina ia manuia le taua; o lea faiga e faaigoa o le “faa-Alataua” poo e tutusa lava lea ma le upu ‘tapuaiga’ e pei ona ta’ua ai Falealupo ma isi nofoaga e pei o Tutuila ma Manu’a. Afai la o le a fai se Fono Tele i Maauga a Leulumoega ma Aana atoa-e muamua lava ona fono ma aitu.

A o’o i le vaeluaga o le Po, ona teteu lea o Galu ma Lemana i ‘ietoga ma siapo. Ona usu lea o le Fono i se Faletele i Leulumoega ae tatu’u uma i lalo pola o lena fale; ae tasi lava le pola e sisi i le itu i tua. Ona o mai lea o na alii e to’alua, maulu i le fale- e tofu i la’ua ma le Tala e nonofo ai; ae o le isi tagata e nofo ma niu e 4.

Ua tita’e- ona ave lea o le tasi niu ia Galu, ae ave le isi ia Mana; ave le isi i le pou i luma, ae ave le isi i le pou i tua.E matua sa lava ona tautala se tasi o i la’ua; Ona nonofo lava lea o na alii. Ona o’o lea ina tafa ata, ona alu lea o le tagata sa na avatu niu -e aumai aano.

A faapea e tago atu i niu o i ai pea suāniu; ona iloa lea- e le’i usufono aitu. Ona faanoanoa lea o Galu ma Lemana; ae a tago atu ua uma ona inu; ona iloa lea sa usufono aitu. Ona la fiafia lea. Ua malama le taeao, ona usu mai lea o Aana uma lava. Ona lafo atu lea o le mau. Ona uma ai lea o le fono.!

© Samoa Observer 2016

Developed by Samoa Observer in Apia