Faitau fa’ailoilo

By Fa’aliliu e Maiava 04 June 2016, 12:00AM

Toe mafaufau tasi lava…I le po o le Aso 14 o Aperila i tausaga e tele ua mavae, na lalata ai lava le va’a e igoa o le Californian, pe toe 1500 maila taunu’u i lona nofoaga, le Uafu o Boston i le Iunaite Setete o Amerika.

O le taimi tonu lea, i le tu-lua-o-po-ma ao, na taunu’u ai le Ali’i Seila o Herbert Stone e tiute i le va’a. Na tau atu, o autilo ma tau-mata’i e lana seila-fa’ata’ita’i se isi va’a e tau le-iloa i le pogisa, e fa’aaogaina ai se mea-va’ai. Sa tau iloa atu si tama’i-malamalama o le va’a lea, ma fa’atonu loa e Stone le seila-fa’ata’ita’i, e taumafai e feso’ota’i iai e fa’aaoga ai ualesi-‘omi’omi (Morse Code). Peita’i e le’i tali mai le va’a lea.   

Ae te’i i le ‘emo fa’alima mai o moli o le va’a lea, toe soso’o ma le isi ‘emo fa’afa, ma vala’au ai loa e Stone lana kapeteni. Na fa’atonu e le kapeteni le fa’a’emo’emo iai o ni moli-fa’ailoilo peita’i, e leai lava se tali na maua mai ai.

Pau le mea na latou iloa, ua le-toe iloa atu moli o le va’a, e foliga o lo’o malaga ‘ese atu pea ma latou. O le 1.40 i le vaveao, ae va’aia loa e Stone le ‘emo’emo lona valu o se moli, ma o le ‘emo’emo mulimuli fo’i lea i le po-pogisa. 

O le ta o le fa (4.00) i le taeao, na fa’atoa latou iloa ai le moni ua tupu i le isi va’a na latou va’aia.  E le’i malamalama le Ali’i Seila o Stone ma lana kapeteni o moli na ‘emo’emo mai le isi va’a, o fa’ailoilo o se fa’alavelave.

O le po lava lea, le po o le Aso 14 o Aperila, na poloka ai ma taofia le va’a o le Californian i le ogatotonu o le Vasa Atalani, ona sa matua mata’utia le ‘aisa o luga o le sami. Ao tu lo latou va’a e fa’atalitali, na latou va’ai ai moli mai le isi va’a i se mea mamao lava.   

Na ‘auina mai e le isi va’a lea, moli ma fa’ailoilo o fa’ailoga o le fia maua o se fesoasoani, semanu e fa’atopetope atu iai le Californian sa na o le iva maila le mamao ‘ese, e fesoasoani e lavea’i mai, ae ma’umau e, pe ‘ana leai lava le fa’aletonu e tasi.

Sa ‘auina mai fa’ailoilo o moli fa’apea fo’i i le leitio, peita’i, sa moe le ali’i-talavou sa gafa ma le va’aia o le leitio a le Californian. O le po tonu lea, e le’i iloa e le Ali’i-Ofisa o Stone ma lana kapeteni, o moli sa fa’a’emo’emo mai, o se vala’au fa’anatinati mo se fesoasoani mai le va’a na goto…le Titanic.  

O Iesu lava na fetalai, o le fa’anoanoaga aupito ogaoga, o lou va’aia lea o ‘Oe lava ma tagata e pele ia te ‘Oe, o goto ifo i le malaia, ua fa’a’ese’eseina mai Le Atua ma pa’u’u atu i le loloto o tiga ma mafatiaga. O fetalaiga ia a Iesu Keriso!

A o le fesili aupito taua: O le a e faitaua ma mulimulita’i i fa’ailoilo mo le saogalemu? Manino lava ma malamalama le ‘aumaiga o le fe’au, e le tatau ai lava ona tatou le-malamalama. Ae tatalo nei e fa’amagalo ‘Oe ona o ou talitonuga sese, lou fatu ma le agaga ua fa’aseseina ma e agasala ai. Tatalo ia Iesu e suia ma pulea e Ia lou ola atoa, ma ou ala i aso o totoe o lou soifua. Pau lea o le ‘auala na fetalai Iesu, e te maua ai le sa’ogalemu atoatoa mo lou va’a a’o aga’i ifo i lalo i le po-nanei, a’o e sauni lelei e feagai ma Ia: Lou Fa’aola, Lou Fa’amasino ma Lou Ali’i. Toe mafaufau tasi lava…                                                                       

By Fa’aliliu e Maiava 04 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>