O le aiga le faleaoga muamua – Alatoa

Tusia Vatapuia Maiava ma Ilia L. Likou ,

171 Hits

Alatoa ma nisi o le fanau i le E.F.K.S. Lotofaga Safata.

Alatoa ma nisi o le fanau i le E.F.K.S. Lotofaga Safata.

O le  talitonuga o le ali’i talavou i a Alatoa Ama, 20 o Safata o so’o se tupulaga talavou e lelei lona fafauina mai i totonu o lona aiga e le taumate le manuia i le lumana’i.

I le fa’atalatalanoaga ai ma le Fofoga o Samoa na ia fa’ailoa ai le taua tele o le sao o tupulaga i totonu o aiga, nu’u, ekalesia ma le atunu’u.

“Ia e pei o le aiga lava ma matua le faleaoga muamua  i le tapu’eina mai ai o le olaga o le fanau.

“Ia e o’o mai i totonu  o lona aoga, o mea e fai o le ekalesia ma so’o se mea lava e aga i ai le olaga nei ua iloa lelei ona tu, savali ma le nofo.

“O le sao fo’i lea o aiga mo le olaga o talavou o le tapu’e lelei, i upu lelei e atia’e ai, ia fa’atonu i so’o se faiga e mautinoa e mafai ona ola lelei ai i lona olaga.

“Ia masalo o lea lava le fa’amoemoega o so’o se matua i fanau, ia ae o lo’u iloa i ai , a o’o ina matutua e pei e faigata ai lava e matua ona fa’atonu.

“Ae o lo’u iloa i ai, ia aua lava ne’i mapu le fa’atonu a matua.

Na ia fa’ailoa o le isi lava itu e mautu lelei ai le ola tupu a’e o so’o se tupulaga talavou o le to’aga i le lotu ma so’o se fa’atasiga fai.

“O lo’u iloa i ai o le itu lava fa’alegaga ia a’oa’oina, o le aoga lea o mea e fai i i totonu o le lotu e mo  tupulaga i le isi ituaiga level o le olaga.

“Ia iloa ai le tupulaga le tala i a Iesu, ia o le sao taua lava o tupulaga talavou i lenei vaitau o lo’o ua i ai, ia lelei le amio ma ia tosina mai ai le tupulaga e aoa’i atu ai totonu se isi ituaiga level o le olaga.

“O le tele lava o fa’afitauli e o’o le olaga o tupulaga talavou ina ua mamao mai ma mea fai e le ekalesia aemaise ai lava le mafutaga ma matua.

“I a te a’u o le isi lea mafua’aga ua lelei lava le mafutaga i totonu o le aiga ia o le tali lava lea.

 “O lona uiga a misi le tulaga lea ia ua tele ina leaga ai tupulaga talavou , a lelei tupulaga e manuia aiga, nu’u ma le ekalesia.

“O la’u ia  lu’itai i tupulaga o tatou lava e leaga ai o tatou foi e lelei ai.

© Samoa Observer 2016

Developed by Samoa Observer in Apia