Fa’amuamua la’u aoga
O le Mariota Uta ua 14 ona tausaga mai le afio’aga o Siumu.
“Ia o a’u le taimi lenei ia o lea e fa’amuamua lava la’u aoga, ia o le tausaga fou lea ua ou fuafua atu ai mo le Kolisi o Leulumoega Fou.
“E pei o lea lava la’u fa’amuamua i le taimi lenei ona ou te iloa lava e a’u ia o le aoga lava e ala mai ai manuia ma tele ai nisi o vaega e mafai ona ou fa’ataunu’uina.
“Ia o a’u na fa’ai’u le tausaga lenei la’u aoga i le aoga tulaga lua o lo matou nu’u i Siumu ia lea la ua amata fo’i ona mafaufau atu i le aoga lea o le a ou alu ai le tausaga fou.
“Ua aoga fo’i faigamalologa lenei ua i ai, ia e fa’asili malosi ai fo’i mo i matou ma le fanau i le isi la’asaga o lo’o i le lumana’i.
“O le agaga fiafia ia lea ua toeititi fo’i a’e aoga.
Na ia fa’ailoa o le a tele lava sona ese’esega i le aoga ai totonu o Siumu ma le Kolisi o Leulumoega lea o le a ia sauna mai ai.
“Ia e pei o le mea masani lava sa i ai, ia e la’ala’a lava i le aoga i aso uma, ia ae o lea o le a alu le pasi , toe sau le pasi.
“O le a tele fo’i tupe fa’aalu a nai matua ma o le a ou taumafai lava e fa’atino o so’o se vaega e sefe mai ai le so’ona alu o tupe ona ua ou iloa e le toe faigofie ona maua tupe i lenei vaitau.
“I a te a’u ia ou te sauni fo’i ma lo’u iloa o le a i ai isi tupe fa’aopopo mo la’u aoga i le tausaga fou ia e tatau la ona ou alu i le aoga ma fai lelei a’u meaaoga ina ia manuia lo’u olaga.
O le a se miti o lo’o e nofo ma oe le taimi lenei?
“O a’u ou te mana’o e avea a’u ma tama lakapi pe a ou matua, ua leva lava ona ou mana’o ai.
“Ae pei ona ou ta’ua muamua ia lea o le a ou alu e fai muamua lava la’u aoga ina ia maua le poto e faigofie ai na feso’ota’i ma isi tama ta’a’alo pe a maua se avanoa e alu ai e ave le igoa o le atunu’u i se au lakapi i le lumana’i.
“Ia ae mo lenei lava taimi ia lea o le a fa’amuamua la’u aoga.