Fa’atonu e le Minisita le Komesina ia fa’ato’ese

183 Hits

<p>Minisita o Tina ma Tama’ita’i, Atina’e o Nu’u ma Agafeso’ota’i, Tolofuaivalelei Falemoe Leiataua.</p>
<div><strong><br /></strong></div>

Minisita o Tina ma Tama’ita’i, Atina’e o Nu’u ma Agafeso’ota’i, Tolofuaivalelei Falemoe Leiataua.


Ripotia e Pai Mulitalo Ale

Fa’aliliu e Maiava 

Ua fa’ailoa le le-fiafia o le Minisita o Tina ma Tama’ita’i, Atina’e o Nu’u ma Agafeso’ota’i, Tolofuaivalelei Falemoe Leiataua ona o lafoga a le Komesina o Leoleo, Fuiavailili Egon Keil e uiga i le fa’amatai i Samoa nei. 

Sa saunoa Fuiavailili Egon, o le fa’amatai i Samoa nei, e leai se ‘ese’esega ma tulaga fa’amiliteli ma lona fa’atinoga.

Na ta’ua e Fuiava, o le fa’atamo’ega o le Matagaluega a Leoleo, e pei o se vaega fa’amiliteli ma e leai se ‘ese’esega mai le fa’amatai, lea e le toe fesiligia ai o se fa’ai’uga ua mae’a ona fai. 

 “E tatau ona fa’ato’ese ona o ana saunoaga ia,” o le fa’aaliga lea a Tolofua.

“Moni ua tele ma tele tausaga o iai faiga fa’amiliteli nei i Samoa,” o lana fa’aaliga lea.

O le mata’upu lea na laga, e se tusi na fa’asalalauina pe lua vaiaso talu ai e le Sunday Samoan, mai nisi o leoleo na tu’ua’ia le Ali’i Komesina, ona o lona fa’atamo’ega o le Matagaluega, e pei o se nofoaga fa’amiliteli. 

Na fesiligia e vaega fa’asalalau se finagalo o le Ali’i Komesina e uiga i se tusi na fa’asea ai nisi o leoleo o lo’o talitonu, o lo’o fa’atamo’e e le Komesina le Matagaluega e pei o se “vaega fa’amiliteli, ae le o se pisinisi.” 

O lea tusi sa fa’atuatusi i le Afioga a le Palemia, Tuila’epa Lupesoli’ai Sa’ilele Malielegaoi ma sa ‘auina atu ni ata i isi Minisita o le Kapeneta, le Komesina o Sulufa’iga, le Komesina o Leoleo ma le Samoa Observer.

Ua leva ona silafia e le Ali’i Komesina lea tusi ae maise fa’aseā o iai, peita’i o lo’o tumau pea lona talitonuga i le fa’atamo’ega o le Matagaluega e tatau ona iai.

Na ta’ua, e tutusa uma le fa’atamo’ega o ofisa o leoleo i so’o se atunu’u o le lalolagi, e pei o se nofoaga fa’amiliteri ma e o’o lava fo’i i la’ei ma toniga o lo’o latou fa’aaoga, o aga fa’amiliteli e aofia ai ma pulou.

E iai fo’i le fa’atulagana o tulaga ma le ‘auala e fa’atino ai fa’atonuga ma feso’ota’iga.  

Na ta’ua e Tolofua: “E iai lava ta’iala e puipuia ai le fa’amatai i lalo o le Tulafono o le Fono a Nu’u po’o Ali’i ma Faipule. E le talafeagai ai ia lafoga aua e le pulea fa’afitafita le aganu’u a Samoa.

E le tu’ufaua foi fa’aiuga a matai ae fetu’unai ma soalaupule lelei, ona fa’ato’a faia ai lea o se fa’aiuga  ma e sosolo lava i luga o alafua o tu ma aga faa-Samoa,”

Na fa’aalia fo’i, ana fa’ataga i Samoa nei lea ituaiga faiga, o le a matua tele fa’anoanoaga e tutupu mai. I totonu o le malo, o lo’o ‘auai fo’i sui o nu’u ta’itasi aua o latou nei o sui o le Aganu’u fa’aSamoa.

Na ta’ua fo’i, e le talafeagai i le Komesina o Leoleo ona fa’aluafesasi i le fa’amatai ma faiga fa’afitafita aua tatou te sa’ili lava le amiotonu i fa’ai’uga fa’avaea ae ‘aua le tosoina atu pulega fa’amatai i totonu.

Na fa’aalia e le Ali’i Minisita, ua fai lava si ogaoga o saunoaga a le Komesina o Leoleo ma e tatau ona toe fa’afo’i ana saunoaga ia, ma tatau fo’i ona fa’ato’ese i le atunu’u.

© Samoa Observer 2016

Developed by Samoa Observer in Apia