O la’u tala fo’i
1. Matauina i Tala Fou se ulutala fai mai ua uma ona momoli le faamalo a le Palemia ia Latafale e tusa ai ma lana taumafaiga i le Tausala o le Lalolagi lea sa auai talu ai nei.
Ae o le isi itu uiga ese o loo aumai ai i lea la Tala Fou- e peiseai o se faaseā a le Palemia i tagata o le atunuu ia na faaalia lo latou le fiafia i le Palemia-talu ai ana upu na fai ia Latafale ma lana taumafaiga –lea lava na ia ta’ua ai…….’e na o pa’upa’u e maua e Latafale mai lea tauvaga!
Ia-o lea foi e aumai ai ma le faatonuga ia i latou na faitioina le Palemia.
Fai mai o le mea e le o malamalama ai le to’atele o tagata faitio-e leai se tasi e mafai ona tauva i le lalolagi ma faaaoga le igoa o Samoa ma lana Tagavai e aunoa ma se faatagaga mai le Taitai o le Malo!
Ia- e fou foi sia mea i le faalogo- ma o le fesili la-afai la o i ai ni faatagaga tusitusia na tuuina atu e taitai o faigamalo ua mavae i isi tamaitai Samoa sa tauva muamua i lea tauvaga o le Tausala o le Lalolagi- e mafai la ona aumai ni faatagaga tusitusia faapena e faamaonia ai lea mau se’iloga e faataga muamua e le Taitai o le Malo- ona faatoa mafai lea e se tamaitai Samoa ona tauva mo le Tausala o le Lalolagi!
O le tasi fesili taua –o ai le faigamalo na faatinoina lea faiga faavae? O se tulafono na fai ina ua Tuto’atasi Samoa pe o se tulafono na fai e Tofilau Eti -pe o lea faatoa fai nei i le taimi o le Palemia o loo i ai nei?
O le a le pogai e aia ai fua le Malo i mataupu e gata i tamaitai?
O se Samoa a le Malo poo se Samoa a tagata Samoa? O le Malo o Samoa o le Malo o Tagata Samoa ae le o se Samoa a le Malo!
O le atunuu lea na tofia le faigamalo e vaaia ma faafoe lona malo -ae le’i fai atu le atunuu e pule ai le Malo ma faasa le atunuu ina ia ‘aua nei auai i soo se tauvaga i le lalolagi nei-vagana ai ua ioe i ai le tagata e to’atasi!
E lei fai atu le atunuu e tou te pulea vagana ai le vaai faalelei o le atunuu.
Aisea e aia ai fua i mataupu a tamaitai-ae le tago e fai se faiga e toe maua mai ai le faitau miliona ma miliona o tupe a le atunuu ia ua maumau talu ai faiga pi’opi’o a le taitai o loo i ai nei ma lana faigamalo! O le a sou taofi?
2. Matauina i Tala Fou se taumafaiga e taofi ai le pule i le ola….!
Tatou te ioe uma i le mataga o lenei mataupu- ae peitai-ua aliali mai ua matua faateteleina lava i le taimi nei.
Ua matauina foi i le Televise ma nusipepa ni vaega poo ni faalapotopotoga ua faavaeina mo lea faamoemoe-ae paga lea-e peiseai ua atili ai ona faatetele lenei faafitauli.
Afai la ua loa ona i Samoa lenei faafitauli-ae le o mafai lava ona faaitiitia-o lona uiga la-e tatau ona i ai se isi vaaiga fou i lea faafitauli-faatasi ai ma ni taumafaiga fou e fo’ia ai lea faafitauli.
O lona uiga- e le o lava le taimi o loo tuuina atu i lenei faamoemoe-aemaise ai o le faasalalauina atu o le latou fe’au. Ae ia manatua foi-o lenei faalavelave e mafai ona tupu i soo se tagata, soo se aiga, ma soo se nuu.
O le mea moni- e peiseai ua noa lava i tagata lea faafitauli. O le fesili la- afai o se tasi lenei o faafitauli tele ua aofia ai Samoa-o ai lava la e tatau ona gafa ma lenei faafitauli?
O le uiga o le fesili-poo ai tonu lava matagaluega a le malo poo faalapotopotoga e tatau ona una’ia malosi ina ia matua faasaga mai tagata uma e matua aveese mai Samoa lenei mea mataga !
O le uiga la o se manatu- e tatau ona galulue faatasi le Malo ma Ekalesia, itumalo ma nuu taitasi uma ma aiga e fo’ia lenei faafitauli O se tasi lenei o mataupu e tatau ona ave i ai le faamuamua a matua, aiga, nuu ma itumalo! O le a sou taofi?
3. Matauina i le Televise le matagofie uiga ese o tapenaga a Malo i fafo mo le faamanatuina o le Kirisimasi o lenei tausaga 2015. O le matau manino i ai- e le gata ina auai taitai uma o le Malo i ia sauniga-ae o tagata foi latou e matua auai uma o latou aiga e o’o lava ia latou fanau.
O ia la sauniga- o loo faaauau pea ona faasalalau mai e Televise i fafo. A tatou tilotilo la ia Samoa fai mai e faavae I le Atua-ae tatou te le o vaaia ni sauniga faapena o tapena ma faatino i Samoa nei!
Ua le malamalama la le mafaufau! Talu ai- tatou te fai mai o Papalagi e le talitonu i le Atua……ae a matau atu i ia sauniga tetele uma i fafo ia o loo faasalalau mai e Televise-e o’o lava i le Tupu Tamaitai o Peretania Tele-e auai ma lona aiga ma tagata uma o lona atunuu- e faamanatu le Kirisimasi ma fiafia faatasi.
Ae leai ni mea faapea o faatino i Samoa nei-ae fai mai foi e faavae i le Atua!
Afai la e le o faapea ona faamanatuina e tatou nei-ia atonu ua alu lava le tagata ia e saili se faiga e faamanatu ai lana Kirisimasi- ae ua faagalogalo lava le Atua ae faasili mea tatou te manana’o i ai. E manaia lava pe a sasi i luga o le ala-ae leaga ona sasi ona o le musu e fai le mea e tatau ona fai! O le a sou taofi?
Ia, afai la o le Alo o le Atua o le meaalofa sili lea a le Atua i le Lalolagi-o lona uiga-e amana’ia tatou e le Atua ma e faasili i lona finagalo le manuia o le tagata na ia faia! Afai la e taua lenei Kirisimasi ia i tatou-ia atonu ua tatau foi ona sui lo tatou soifuaga e afua mai taitai o le Malo e o’o lava i le atunuu atoa.
Afai o le tonu a o tatou matua na fai- ia faavae lo tatou Malo i le Atua-o lona uiga- e i ai le mafuaga-ma o lea mafuaga- e na o le Atua lava e malu ai lenei atunuu.
A tatou toe tepa i tua ma le sailiga o lenei Malo Tuto’atasi- e le o se mea na pa’ū mai le Lagi-ae o lona finagalo –ia iloa e Samoa le faigata o le olaga sa’oloto ma le aia tatau e faaali ai lou manatu!
E ui lava la ina leai ni a tatou sauniga tetele e pei o atunuu i fafo e faamanatu ai le soifua mai o le Mesia-ae o le mea sili-ia tatou lagona ma le faafetai le sa’olotoga ua tatou maua e fai ai le finagalo o le Atua ma ia viia o ia e Samoa e o’o i le faavavau! O le a sou taofi?