O’o i Savai’i le ulua’i fa’aaliga fa’asolo

169 Hits

<p>O le a fa’aalia fo’i le ata-tifaga “Ufi le tama ua Gase” i afio’aga ma alalafaga ua filifilia mo fa’aaliga i Savai’i.</p>
<div><strong><br /></strong></div>

O le a fa’aalia fo’i le ata-tifaga “Ufi le tama ua Gase” i afio’aga ma alalafaga ua filifilia mo fa’aaliga i Savai’i.


Ripoti e Pai Mulitalo Ale

Fa’aliliu e Maiava 

Ua tutu-fa’atasi le vaega fai-ata-tifaga o le ETV Production ma le Fa’alapotopotoga o le Fa’ataua Le Ola (FLO) e fa’atino mo le ulua’i taimi se fa’aaliga fa’asolo mo le motu tele o Salafai i le asō.

O lea fa’aaliga o le a aofia ni ata-tifaga se lua na tu’ufa’atasia e le Vaega o le ETV, ma o lo’o momoli mai ai se fe’au taua.

Na ta’ua e le Fa’atonu o le Kamupani, o Toepo Eliza Hunt, o ata-tifaga nei e lua – “E lelei Le Atua” ma le “Ufi le tama ua Gase”, e iai lona aoga ma o lo’o momoli mai ai se fe’au aoga. 

 “’Ou te le-so’ona faia se ata ina ia maua ai na o tupe; ‘ou te faia se ata e momoli atu ai se fe’au mo o tatou tagata.”

Na ta’ua e Toepo, o le ata muamua na ia tu’u-fa’atasia, o le ata “E Lelei le Ali’I” ma o se ata e uiga i le sauaina o tina ma fanau.

O le “Ufi le tama ua Gase”, e fa’atatau i le taua o le so’otaga a le tina ma le tamaititi ma lona aiga. 

Na pu’eina lea ata i le 2014 a’o fa’agasolo le Vaega Lona 7 o le ata o le Silamanino ma o le mafuaga lea o le fa’atuai ai, ona sa mana’o e ‘ave le fa’amuamua i le ata fou lea. 

“O le tala i se ali’i e masani ona galue fa’avaitaimi,” o le fa’aaliga lea a Toepo.

“Sa fesoasoani tele ia te a’u i le pu’eina o le ata o le Silamanino peita’i na pule i lona ola i Vailoa.” 

Na ta’ua, o se fa’anoanoaga tele ia latou ina ua tupu lea fa’alavelave ma o i’ina na maua ai se manatu, ma taofia atoa ai mea uma ae tu’u-tasi le va’ai i le  faiga o le ata, ‘Ufi le tama ua Gase”.

Sa tatala fa’atasi le ata lea ma le Vaega a le Fa’ataua le Ola talu ai, e iai se vaega o le ata o lo’o ‘auai le peresetene o le FLO.

Na ta’ua fo’i, o lo’o ‘aumai atoa lava e le ata le fe’au, e ao i tagata ona fa’atauaina o latou soifua. 

O lo’o fuafuaina, na o nisi o nu’u i Savai’I e fa’aalia ai nei ata uma.

E muamua fa’aalia i le afio’aga o Pu’apu’a ona fa’asolo ai lea o ni feutaga’iga ma talanoaga ma sui uma o le nu’u o le a ‘auai.

O le fa’aaliga lona lua e faia i Fagamalo ma fa’atino ai fo’i le polokalame lava lea i le afiafi. O le a soso’o ma Sasina, lea o le a fa’aaogaina ai le po e fa’aali ai ata-video ma faia ai fo’i fetufaa’iga ma nisi o le a ‘auai. 

O le polokalame o lea fa’aaliga, e ta’itasi lava aso e faia ai peita’i, o lo’o vala’aulia ai isi nu’u tua’oi pe a fia ‘auai atu iai. O le a tufa-fuaina fo’i nisi o DVDs o ata nei mo nu’u o le a fa’atino ai ia polokalame, ma le fa’amoemoe, ia aloa’ia ma malamalama lelei i fe’au o lo’o momoli mai ai.

Na ta’ua e Toepo, o le a fa’aauau pea la latou fa’aaliga i isi vaega o le motu tele ma fa’atoa fa’asolo ai i Upolu pe a mae’a Savai’i, i le lumana’i.

O le ata o le “Ufi le tama ua Gase, o le a tu’uina atu i le Fa’ataua le Ola e avea o se vaega mo a latou polokalame fa’alauiloa mo le puipuia o le pule i le ola, a’o le ata “E Lelei Le Atua”, o le a fa’ameaalofa atu i le Vaega o To’omaga mo e Puapuagatia. 

© Samoa Observer 2016

Developed by Samoa Observer in Apia