Tatala le Faitoto’a o le Alofa i le Kafetala o Imakulata

28 December 2015, 12:00AM

Ripotia e Deidre Fanene

Fa’aliliu e Maiava

 O le Kafetala o Imakulata i Mulivai, le ulua’i Malumalu Katoliko i Samoa nei, ua iai se Faitoto’a o le Alofa.

I fa’asalalauga i upega-tafa’iLagi o le “Tagata Asiasi i Aso Sa” o lo’o fa’ailoa ai, o le tatalaina o le Faitoto’a Pa’ia o le Alofa i le Paselika o Sagato Petelo i le Aso 08 o Tesema 2015, na fa’ailoga ai le amataga o le Iupeli o le Tausaga o le Alofa. 

O lo’o talosagaina e le Tama Pa’ia, Pope Faranisisi, o itumalo ta’itasi uma, o malumalu ma fale-tapua’i uma ua fa’apitoa mo tapua’iga, o le a iai fo’i ni fa’amanatuga o le tatalaina aloa’ia o le Faitoto’a Pa’ia ma Malumalu uma i le Lalolagi ina ia mafai ona ‘auai ma maua le moni o ia  folafolaga  i lenei Tausaga o le Iupeli.

Na fa’aalia e le Sui Ta’ita’ifono o le Komiti o le Kafetala, o Mulipola Tiufea e fa’apea, o le tausaga lenei, na tonu ai i le Kafetala o Imakulata, ia faia o se fa’amanatuga o lenei tausaga o le Iupeli o le Alofa. 

 “Na o le tasi lava le nofoaga i le lalolagi aoao o lo’o iai le ituaiga faitoto’a lea, na o le Paselika o Sagata Petelo i Roma,” o lana fa’aaliga lea. 

“Ua matou fa’ailogaina i le tausaga nei le Iupeli o le Alofa ma ua tonu ai i le Tama Pa’ia o Pope Faranisisi, e tatala le avanoa i nofoaga uma o le lalolagi ia fausia ai le “Faitoto’a o le Alofa”.

  “O le fa’amoemoe taua o lenei faitoto’a e fa’ailoa ai le Alofa o le Atua mo tagata agasala uma.

“O le taimi lava e ulufia ai lenei faitoto’a, o le a latou lagonaina ai le Alofa o Le Atua ia tatou uma ma e ao ai ona tatou fa’asoa atu lea Alofa i o tatou uso uma ma tuafafine ma fa’amagalo atu ia latou e pei fo’i ona fa’amagalo i tatou uma e lo tatou Matai.”

Na ta’ua fo’i e Mulipola, o le a tatalaina lea faitoto’a i taimi uma, 14 itula i aso ta’itasi mo so’o se tasi lava e ulufale i le Kafetala e tatalo.

“E tapunia uma isi faitoto’a o le Kafetala vagana ai le faitoto’a lea.

“O le fa’amanatuina o le Iupeli o le Alofa, na amata i le Aso 8 o Tesema ma e mae’a i le tausaga fou i le Aso 26 o Novema ma o le ‘umi lena e tatala fa’asoloatoa ai.

“O le a faia se misasa e fa’amanatu ai le tapunia aloa’ia o le Iupeli o le Alofa ma tapunia ai loa le faitoto’a lenei mo tausaga e 25 vagana ua toe aulia le isi Iupeli o le Alofa e fa’amanatuina ai.”  

28 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>