Lauga - “Ia outou saili ia Ieova… saili le amiotonu”

By Rev. Petaia Setu 28 October 2018, 12:00AM

(Sefanaia. 2:3)

O muagagana faale natura o mea e faapea, e fofō lava e le alamea le alamea. Ua lata ina ui le ma’i, e manaomia se laveai. A o taimi foi faapea o loo aumai ai e le fai Salamo o Tavita le faasinomaga, Faasaga a’e o’u mata i mauga, e oo mai ai lo’u fesoasoani. O lo’u fesoasoani mai ia Ieova lea, o lē na faia le lagi ma le lalolagi (Salamo. 121:1,2). A o le mătua foi lea o le lauga a Iesu i luga o le mauga: “Ia outou mua’i saili le malo o le Atua ma lana amiotonu…” (Mata. 6:33). O se faamanatu faifai pea lea mai ona po o le Feagaiga Tuai i auga perofeta, e pei foi ona faamamafa nei e lea foi perofeta o Sefanaia, Ia outou saili ia Ieova; ia outou saili le amiotonu.

E fai lava si faigata o le taimi o le perofeta nei, ona sa fetaui ma tupu sa sili ona amio leaga i luma o le Atua. O loo malosi pea loto o le nuu o le Atua i mea mataga ma amioga leaga uma. Ua leai se tuaoi o le agasala.  Us suamalie i tagata. O loo pulea pea le olaga o aso uma i faiga piopio ma le ola soona fai o mea fai tele ma le saolotoga o tagata taitoatasi. O leaga ia sa matuā tulai mai i taimi o Manase ma Amone, o tupu sa faia le amioleaga tele lava i luma o le Atua. A o se sao tele lea o le perofeta o Sefanaia i le tapenaina o le toe fuataiina o le nuu o le Atua i le tulai mai o le tupu talavou o Iosia. O se ‘fuataiina’ na fanau mai ai le suiga tele i fafo (outward change), peitai e le i matuā atoatoa ona liliuina ai loto o loo masofasofa ma faataugāina ai le nuu e le agasala.

O le nuu nei o le nuu o le Atua. Na osi feagaiga ma le Atua. Sa fai upu ma le Atua. O le ala lea o le finau a Sefanaia, e le mafai e se malosi o Asuria, Aitiope, Filisitia, Moapi ma Amoni ona laveai le nuu i le toasa o le Alii. O nuu faapaupau ia o loo avaga ma faitaaga solo ai Isaraelu, ma ua tupu tele ai lo latou tetee ma le mamao ese atu ma le Atua sa osi feagaiga ma ona tua’ā. Ia outou saili ia Ieova. O le sulufaiga tonu lea. O le sailiga sa’o. Ua lata mai le aso o le toasa o le Alii. O le aso e faamasinoina ai e le Atua e le gata i lona nuu, a o malo tuaoi uma o Isaraelu ma Iuta. 

Samoa, e iai ona tua o le tautala sa’o. Le loto ua liliu ma le faamaulalo. Ua salamō faamaoni. Ua mata’u i le Atua. O le pogai lea e saili ai ia Ieova. Ina ua malamalama i le uiga paia o le Atua. Ina ua mautinoa i le loto, o le Atua e telegese lona toasā, ae tele lona alofa (Salamo. 103:8). O le amiotonu ma le agamalū, o le natura paia lava lea o le Atua. A fai lea ma o tatou sulufaiga, ona natia lea o i tatou e Ieova na i lona toasā. Ona lilo lea o au amioleaga i ona luma. Ona le toe manatu lea o ia i o tatou tagata tuai. 

O Ieova o le Atua o Isaraelu, o le Atua Fuā. O lona fuā, o lona tiga o loo afīfī ai i totonu lona alofa. E alofa mutimutivale ma alofa fua mai le Atua. O ‘i la, o loo talanoa atu ai Sefanaia i le nuu. Ua lata mai le aso faamasino. Ua manaomia ona faapotopoto faatasi o tagata uma. Auā ua iai le avanoa mo le faasaoina o le nuu ina ua onosai ma faapalepale le Atua.

Uso e, o le taimi ma le avanoa ua aumai e le Atua mo oe, o le mea sili lea ona tāua. O la Isaia i le nuu o le Atua, ia outou saili ia Ieova manū o mafai ona maua o ia; ia outou valaau atu ia te ia manū o latalata mai o ia! (Isaia. 55:6). Manino lelei le finagalo o Isaia. E le o taimi uma e maua ai le Atua. Ua le o aso uma foi e latalata mai ai. Saili nei loa.

Ae faapefea la ona tatou sailia le amiotonu a le Atua? O gafea o lo tatou ola e fua mai ai la lea amiotonu? Vaai i ou faiva! O sa’o ona fai o lau galuega? O ‘e pule ma le alofa ma le lē faaitu’au? O mamā au faaiuga fai? E le o manu’a se isi tagata i lou le faamaoni? Faamata e le o oe o loo afaina ai le faamaoni o le isi uso i lou matapeapea ma lou faufau ia ma’ona lou tuinanau? Poo sa’o ona e a’oa’o lau fanau e tusa ma le tala lelei a lo tatou Alii? Poo e tausisia le feagaiga sa osia faatasi ma le Atua? Poo mafai ona faapaiaina lou ola e te anaana atu ai i le Alii lou Atua na o ia lava? Poo e savali i au upu ma folafolaga tatau? Ae faapefea ou tiga ma ou faafitauli, o ‘e oono ai pea ona o lou talitonu i le Agaga faaola o le Atua? O mafai ona e faatoese i lou toalua? O ‘e iloa faamaulalo i ou mātua, i ou uso, tuagane/tuafafine, ma ou tuaoi? Poo maua e oe le loto faamagalo? A o oe o se tagata tatalo? Poo e faamaoni i le taulaga sefulua’i a le Atua? O mafai ona e faamaopoopo ma faafealofani lou aiga ma lau fanau? Faapefea le aulotu/ekalesia? Pe le o oe o loo malepe ai le nuu, ma tele ai le faanunununu? Uso e, poo e laugaina le alofa faaola o le Atua ma lana faauuga, poo e faasilasila le tausiga o lau susuga, ma lau pule i mea uma? O le toe fesili Samoa: Poo e saili moni ea i le Atua, poo e tausinio pea i Seoli e fai ma ou fanua?

Samoa pele e, e lelei le Atua; e faavavau lona alofa. O le uiga lea o le Atua ua le i malamalama lava iai lona nuu. O le pogai lea ua iloa tino ai le suiga i le vaaiga i fafo. O la tatou tautua i le Atua e le faatusalia. O le fefete o fafo e ala ai ona tatou faapea, e leai se tuaoi o mea lelei. Le au uso e, o le amiotonu a le Atua e afua mai i le loto ua lelei, ae le o mea lelei. Ua tatou iloa le mitamita o Paulo ia Keriso. A maua Keriso, ua seki mea uma. Se a se isi mana’o i tala atu o Iesu, le Alo e toatasi o le Atua Soifua? Le au pele e, o Iesu Keriso o le Amiotonu ia a le Atua. E le mafai la ona atoatoa le ‘fuataiina’ (revival) ina seia e maua le Alii, ma avea Iesu Keriso ma Amataga fou o lou olaga. Na te pulea ma taitaiina oe i mea uma lava i aso uma lava. Samoa, ua le masino le mau faama’i leaga o loo vevesi ai nei le lalolagi. E anoanoai lava foi faafitauli o aso uma. Ae leai se mea tatou te popole ma atuatuvale ai pe afai o le Alii lo tatou Atua o loo taula’i iai lau sailiga. O ai tatou te fefefe ai pe afai ua tatou maua le amiotonu a le Atua, o Iesu Keriso lea?

Salamō nei loa ma foi i le Atua. Ia toe fuataiina lou ola ia Keriso ona e ola mamā lea. Ona ta’uleleia lea o lou tausaafia i luma o le Atua atoa ma tagata. Ona tonu lea ma paia galuega ma faaiuga uma e te faia. Ona lilo lea o oe i le aso o le to’asā o le Atua.

 

Amene.

 

7737063/7783782

E-mail: [email protected]

By Rev. Petaia Setu 28 October 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>